Industria petrolero ta plat pero Prome Minister ta bay habri refineria bek

 In AVP

Diahuebs den oranan di anochi, Prome Minister Evelyn Wever Croes ta declara na prensa cu el  a caba di firma e acuerdo cu CITGO  pa terminacion di e contact cu tabata vigente y a menciona cu tambe a firma Minister di Finansa Xiomara Ruiz Maduro y Minister Marisol Lopez Tromp.

Un logro segun Prome Minister hopi grandi, cu a tuma hopi esfuerso segun su persona.

“Ora cu pueblo scucha Prome Minister Evelyn Wever Croes papia, tur hende por compronde ta dicon gobierno di Hulanda ta actuando manera cu el a bin ta haciendo cu gabinete Wever Croes, pa loke ta maneho di 1.3 biyon florin cu a wordo pidi como ayudo.

Sigur ora cu e Prome Minister a keda sumamente contento cu un schikking di 17 miyon di dollar cu CITGO. Pues e compania Mericano biyonario no a paga ningun cen preto mas, a bay sin keda responsabel pa desmantela y haci e tereno limpi, caminda Aruba lo mester a haya mas cu 300 florin di garantia pa incumplimento di contract di CITGO.

Sinembargo no ta esey so kisas ta stroba Hulanda di no confia gobierno di Evelyn Wever Croes pero ora cu e bin dilanti y bisa cu tin “hopi” interes pa lease e tankinan na San Nicolas y cu dentro di un luna lo caba di inspecciona e tankinan y “nan” lo cuminsa manda crudo pa Aruba, e situacion ta bira mas serio ainda.

Ta kende por fix crudo den un luna di tempo abiendo tambe e situacion deplorable  di e terminal na Zeewijk. Tur esaki ta duna e impresion cu tin un fixmento formal caba palabra cu anticipacion, sin cu pueblo of parlamento sa di esakinan ya cu den un periodo cu industria petrolero ta practicamente plat, ya caba tin crudo cu lo yega Aruba den un luna di tempo. Esaki ta un fantacia increibel y un aventura irresponsable di parti di Prome minister Evelyn Wever Croes!!!

Kico mas ta confirma cu ya caba tin gruponan particular cu a regla tur cos pa nan haya for di gabinete Wever Croes e tankinan, ta e hecho cu segun Prome Minister Evelyn “ entrada cuminsa drenta cu ta wordo calcula na 4 pa 5 miyon florin pa luna si logra verhuur tur e tankinan.”

Esaki  simplemente ta duna e impresion cu cosnan ta regla caba, cu ta pesey tur e desaroyonan rond di CITGO durante di pandemia di covid-19 ya cu gruponan yega na gobierno di Prome Minister, tabata insisti pa yega na e areglonan aki, den un periodo cu gobierno a impone toque de queda y shelter in place. Atrobe por remarka cu aki tin cosnan hopi straño ta tumando lugar!

Medidanan cu a paralisa henter e pais, henter pueblo pero caminda si no a paralisa negociacionnan asina rapido cu gruponan interesa den e tankinan di e refineria.
Loka sigur ta hopi tristo y aki tambe nos ta kere ta confirma di con Hulanda no por confia gobierno di Evelyn ta caminda e ta declara cu e di dos trayecto importante den e terminacion di e contract cu CITGO, ta reapertura di e refineria.

Negoshi di petroleo ta plat, prijs di petroleo ta na suela, cu excepcion aki na Aruba caminda pueblo no ta haya combustibel barata pa producion di awa y coriente debi na hedging di gobierno di Evelyn pero e Prome Minister tin cu curashi di sinta declara na pueblo cu e ta trahando na reapertura di e refineria cu el a caba di firma pa e cera definitivamente. Algun siman caba tabata conosi cu e lista di 25 companianan interesa ya a bira un lista di 4 compania so, cu ahinda ta hopi dudoso.

Si ey bou no tin cosnan “fishi” tumando luga anto simplemente Aruba tin un Prome Minister cu simplemente ta experto den manipulacion di tur loke e haci. Prome minister a actua contra interest general di Aruba cu ningun base huridico y a laga Citgo bai cu un regalo di 300 miyon florin,” Parlamentario Mike de Meza a declara.

Recommended Posts
Pregunta?

Manda nos un e-mail of message nos via Facebook. Danki pa e sosten.

Not readable? Change text. captcha txt

Start typing and press Enter to search