| Diahuebs dia 2 di mei den e synagoge Beth Israel a tuma lugar un ceremonia solemne pa recorda y tur persona cu a lucha y/of perde nan bida na un forma hororoso durante segunda guera mundial. En particular hudieuwnan a ser discrimina y masacra dor di Adolf Hitler y su seguidornan Nazi y antisemitista. A discrimina tur otro cu ta diferente di e rasa arico. Parlamentario Mervin Wyatt-Ras ta di opinion cu ta di importancia pa recorda e historia y preveni actonan como tal. Ta nos deber sinja nos futuro generacion pa preveni cu tal actonan por ripiti nan mes. Despues di diferente discurso, e.o. di Rabbi Kripper y representantenan di diferente religion, a sende bela pa descanso di victimanan di e Holocaust. Despues tabatin presentacion di un documentario impactante titula Defiant Requiem.Den e documentario e compositor Rafael Schächter y otro prisoneronan den e campo di concentracion Terezin na Czechoslovakia a uza e poder di musica pa lucha contra e Nazinan y nan masacre. Apesar di e maltrato e prisioneronan tabata bin hunto tur anochi pa practica. Nan a duna un presentacion di e composicion di Guiseppe Verdi na Latino dor di cual e Nazinan no por a compronde nan grito pa libertad. Wyatt-Ras ta gradici pa e oportunidad pa e y su esposo por a forma parti di e ceremonia bunita y cu gran valor historico. |
