Gobierno y Minister di Husticia “fake” ta bay investiga ‘fake news’

 In AVP

Na momento c’un pais tin un Minister di Husticia kende ta insisti pa no realisa cu su pueblo tin un problema serio cu criminalidad, ta surgi un situacion sumamente delicado.

Parlamentario Mike de Meza a mustra cu e ola di atraconan cu a bin ta tumando luga, ainda no por haya atencion debido di Minister di Husticia Andin Bikker kende durante di campaña a sigura pueblo cu e lo elimina criminalidad asina cu e bira minister.

“Ultimo tempo por mita un tendencia serio den comportacion di e Minister di Husticia aki, kende ta bin dilanti prensa local, ta papia di cantidad di cos pero ningun momento con e ta bay soluciona e  situacion cu tin na e momentonan aki.

Practicamente tur momento cu e presenta dilanti di microphone di medionan di comunicacion, Minister Bikker tin un plan of ya e tabatin un plan pero aparentemente e unico plan cu e tin ta di no actua contra di atracadonan, kendenan ta sigui comete nan fechorianan contra comunidad.

Bikker a priminti pueblo camara di seguridad na tur cas rond Aruba pero te dia di awe ningun momento el a cumpli cu esaki y mesun cos el a priminti di lo bay pone cantidad di polis riba caya bek pero den dos aña di tempo e unico grupo  di polis nobo cu a subi caya, tabata un klas cu a inicia bou maneho di ex Minister Arthur Dowers di AVP.

Algun siman atras Minister Bikker a bin dilanti pa hustific su maneho, a papia di cifranan di 10 pa 15 aña pasa, pa trata di convence comunidad cu criminalidad ta bahando y dado momento el a cuminsa papia di otro soño cu e tin, esta di bin cu ‘drones’ pa hiba control den cayanan di Aruba.

E no a papia di financiamento pa e proyecto aki, e no a papia con e ta bay crea e departamento aki pero ta mesun pensamento cu e tabatin cu camaranan di siguridad.

Siman pasa despues cu  otro atraco a tuma luga, Minister Bikker a bin dilanti y papia cu su persona y su gobierno, a inicia un  proceso pa bay over na investiga “fake news” caminda hasta e lo a pidi un experto riba e materia aki pa traha un plan.

Pa colmo na momento cu Minister Bikker ta papia di “fake news” cu su gobierno y su persona ta bay atende “fake news” cu man fuerte, dos caya su tras caminda e tabata den conferencia di prensa, atracadonan a bolbe atraca hende den nan cas.

Ta increibel con Minister di Husticia Bikker y por lo tanto cualkier minister di gabinete Wever Croes, kier atende cu “fake news”, buscando un forma pa traha un ley caminda por actua contra esunnan cu ta plama “fake news.”

Sinembargo Minister Bikker ta forma parti di un gobierno cu tabata e “fake” politico di mas grandi cu Aruba a yega di conoce den su historia, sigur  ora cu nan  hiba “fake” promesa pa pueblo, cu nan lo atende finansa publico sin tuma medida, pa bira despues suta pueblo cu aumento di BBO y un inflacion cu tin hopi famia den problema serio.

Prome Minister Evelyn Wever Croes a sigura pueblo cu “fake promesa” cu si ta existi 1% di posibilidad pa habri e refineria e lo haci esaki pero siman cu a pasa e refineria a manda practicamente tur hende cas.

Minister Glenbert Croes di Asuntonan Social a lansa un “fake” promesa cu e lo soluciona problemanan social den comunidad, abusonan sexual y fisico contra mucha y hendenan muhe, a pone un fondo un banda pero ainda ningun hende ta mira fruto di esaki.

CFT a bin y a obliga gobierno y Minister pa e fondo cu a wordo poni un banda pa e plan social aki, bay bek den presupuesto normal pero ta algun hende so yega na gobierno a haya trabou.

Minister di Finansa Xiomara Ruiz Maduro hunto cu Prome Minister a lansa e “fake” promesa cu nan tin solucion pa e situacion financiero di gobierno pero a bin cu medida tras medida y ainda tin mas medida hinca den presupuesto 2020 cu ainda no a yega Parlamento.

Minister di Serlimar of ex Minister Otmar Oduber a priminti di drecha Serlimar cu otro “fake” promesa cu den dos luna ora cu a bira Minister di Infrastructura, e lo cera dump na Parkietenbos pero dos aña despues y bayendo cu retiro, dump ta habri y ta kimando y Serlimar a wordo hinca den mas problema financiero.

E unico logro di e ex Minister aki ta cu el a logra un contract di huur pa un di su sponsornan cu e edificio na Pos Chikito pa cual tin cu paga 41 mil florin pa luna.

Minister Bikker mester splica pueblo cu e ley contra fake news lo ta dificil pa wordo logra ya cu e ora ta henter su gobierno “fake” lo tin cu bay  y su persona lo por ta prome pa subi e bus aki<’ Parlamentario Mike de Meza a mustra.

Recommended Posts
Pregunta?

Manda nos un e-mail of message nos via Facebook. Danki pa e sosten.

Not readable? Change text. captcha txt

Start typing and press Enter to search