Gobierno ta declara e aña aki como aña di famia pero ta haci net contrario dor di e medidanan

 In AVP

Den conferencia di prensa di partido AVP, drs. Mervin Wyatt-Ras a elabora encuanto sector social. Gobierno a menciona cu e aña aki lo ta aña di famia y cuido di nos muchanan. Wyatt-Ras ta di acuerdo cu gobierno ta dedica atencion na nos famianan. Famianan ta e pilar di nos sociedad y den un famia un mucha ta crece y haya tur ingrediente pa por bira futuro di mañan. Gobierno anterior a pone famia hopi central, a sostene famianan en grande. A hisa bijstand pa esnan mas humilde. A duna reparatietoeslag pa esnan cu tin menos cu salario minimo y na pensionadonan, a hisa salario minimo, a duna mayornan di menos recurso schoolkinderentoeslag pa por paga uniform pa bay scol y material necesario pa cu scol. Trai Merdia a ser amplia, tambe esun pa hobennan. A introduci e ley di kinderopvang cu a ser pasa den Parlamento y cu lo mester ser implementa. Tambe a ehecuta e plan integral pa nos hubentud pa crea hobennan fuerte cu alabes ta haci trabou pa comunidad.

Gobierno nobo mester sigui cu trabounan cu ya caba a ser inicia, segun Wyatt-Ras. Fraccion di AVP a sostene e fondo di e plan social cu ta regarda 32 miyon pa yuda hobennan cu tin problema. Esaki fraccion ta considera como un continuacion di loke gobierno anterior a bin ta haci pa nos hubentud. Alabes en bista di tur e medidanan e fondo aki lo yuda.

Contrario na gobierno anterior cu a fortifica famianan, entre nan esnan vulnerable, e gobierno aki a bin cu medidanan. A hisa BBO y a bin cu reforma fiscal cu a dal specialmente nos famianan humilde straight den nan curason. E famianan aki tin cu bay lucha mas pa sobrevivi. Den tiendanan prijsnan (t)a subi(endo) y e famianan vulnerable ta sinti esaki directamente den nan cartera. Tambe dor di e reforma fiscal cu lo exigi di comerciantenenan pa no print e diferente BBO’s riba recibo lo haci cu por hisa prijsnan sin cu esaki ta transparente. Di e forma aki e control lo bira mas dificil.

Esaki ta bay liña recta cu declaracion di e aña aki como aña di famia. Pueblo a spera  algo otro. Envez di subi, gobierno alabes lo bay kita e reparatietoeslag pa cierto gruponan di entrada entrante februari. Esaki lo ta otro medida contra di nos hendenan y nan famia. Nos hendenan a verwacht hopi mas di e gobierno, entre otro cu gastonan lo baha pero a sosode net lo contrario. Segun e parlamentario gobierno mester hinca man den su propio cartera. Gobierno mester baha su gastonan. Envez di pone su hendenan tur caminda, kita directornan pa pone esunnan di dje, gobierno mester bay refleha y pone mas atencion pa comparti y pone e hende mas central. 

 Netamente e aña di famia gobierno mester refleha pa envez di corta den famianan pa yuda nan. Pa haci posibel cu famianan tin tur condicion rond di nan pa garantisa miho educacion y futuro di nos hobennan.  Wyatt-Ras ta spera cu aña aki si ora e haci pregunta na ministernan e por haya contesta. Aña pasa esaki no tabata e caso. Su preguntanan no a haya contesta. Apesar di esaki Wyatt-Ras lo sigui haci pregunta den caso ta necesario. Sea cual gobierno t’ey e y su fraccion lo boga pa miho calidad di bida pa nos hendenan.  

Recommended Posts
Pregunta?

Manda nos un e-mail of message nos via Facebook. Danki pa e sosten.

Not readable? Change text. captcha txt

Start typing and press Enter to search