Gobierno ta ciego y sordo pa cifranan y realidad cu ta confirma sufrimento di pueblo

 In AVP

“Momentonan sumamente preocupante ta loke comunidad ta bibando den ultimo tempo. Despues di bishita cantidad di famia den barionan den tur skina di Aruba, nos mes a constata cu tin un probresa creciente y alarmante den comunidad.” Asina lider di partido AVP mr Mike Eman a declara enfaticamente. Ela sigui bisa: “Na e momentonan akitin centenares di famia cu den ultimo dos añanan ta sufri mas y mas di e consecuencianan di e aumento drastico y dramatico di costo di bida. Henter Aruba ta experencia e olanan di medida cu gabinete Wever-Croes a introduci. For di momento cu gobierno a presenta su pakete di medida, por a mira e impacto devastador cu esaki tin pa henter pueblo. Awor e ta wordo confirma, atrobe!”

ACTUA PA INFORMA PUEBLO

Mes ora cu a wak e maneho y e desaroyo aki, partido y fraccion di AVP a bay den pueblo. AVP tabata tin encuentronan cu pueblo den tur bario, pa asina informa y discuti hunto riba e impacto cu e medidanan aki tin y ta bay tin riba henter nos comunidad. Partido AVP a haci hopi presentacion tur rond di Aruba. Y no a wak simplemente e calculacionnan di loke tabata intencion di gobierno cu su pakete di medida, cu nan a duna e bunita nomber di Reforma Fiscal. AVP a basa supresentacionnan tambe riba e experiencia cu Aruba a pasa aden caba durante di otro gobierno di MEP den pasado. E tempo ey tambe MEP a impone medidanan similar. E tempo ey MEP a introduci e BBO cu tambe tabata tin un impacto negativo enormemente grandi. Ela causa un aumento di costo di bida cu a pasa 10%.  Basa riba e experiencia ey, basa riba analisis profundo cu partido mes a haci y tambe usando e analisisnan cu Banco Central a haci, nos a anticipa e tempo ey un situacion sumamente dificil. Awor MEP ta bolbe sigui e mes un caminda ey y ta ripiti e mes un mal maneho cu ta hiba na e mes un consecuencia desastroso pa famianan, companianan y pa henter Aruba.

ANALISIS NOBO TA CONFIRMA E SITUACION NEGATIVO

Awe tin un rapport nobo di Banco Central,  e ‘Economic Outlook’ den cual Banco Central ta notifica nos comunidad cu Aruba a cay den un recesion na 2019. Esaki kier men cu no tin crecemento economico y Aruba ta experiencia e efectonan di esaki den tur skina di nos pais. Tambe por mira cu institutonan importante den nos comunidad cu ta duna asistencia na esnan di menos recurso, a cuminsa bati alarma cu e cantidad di personanan cu ta acerca nan pa yudansa, a aumenta dramaticamente. Mike Eman: “Esakinan ta cifra y raportnan cu ta confirma loke AVP a anticipa y loke Pueblo completo ta sinti awor. Nan ta e efectonan negativo di e maneho di medida di e gobierno aki. Pensionadonan ta sinti esaki, empleadonan ta sinti esaki, esunnan cu ta biba di un salario minimo ta sinti esaki severamente. Esnan cu tin solamente onderstand ta sinti e efectonan aki severamente. Bo ta mira cu empobrecimento a bolbe yega asina leu, cuhopi famia no por pone pan riba mesa pa nan yiunan cu e entrada cu nan tin. Nan gastonan a subi mucho halto dor di e inflacion causa door di e medidanan di e gobierno aki. Sinembargo Aruba tin un gobierno cu ta ciego y sordo pa tur cu ta sosode den pueblo. Mescos cu e gobierno aki a yega na poder cu gañamento, nan ta bolbe purba gaña y bagatelisa e cifranan aki. E realidad sinembargo no ta duna espacio pa otro interpretacion: Aruba a bolbe cay den un resecion, situacion pa famia y companianan ta birando mas deplorabel tur dia y pobresa ta cuminsa crece. Tur pa motibo di e maneho di medida di e gobierno aki!”

Recommended Posts
Pregunta?

Manda nos un e-mail of message nos via Facebook. Danki pa e sosten.

Not readable? Change text. captcha txt

Start typing and press Enter to search