Parlamentario, drs. Mervin Wyatt-Ras durante conferencia di prensa di fraccion di AVP a trece padilanti cu gobierno ta anda na un forma “nonchalant” cu Covid-19.
Despues di a habri frontera na Juli Aruba a bin ta haya su mes confronta cu e segundo ola di Covid. E prome ola a ser domina, e.o. dor di cera frontera. Ora a habri fronterae prome turistanan y localnan a drenta cu e virus y despues nos ciudadanonan a sigui contagia otro. Segun informacion e segunda ola a inicia despues cu hobennan a bishita un club nocturno serca di hotelnan. E contagio a sigui y a yega den un cantidad di hogar aki na Aruba. Actualmente mas o menos 70% di tur contagio ta tuma lugar den seno familiar, cual sin duda ta un situacion preocupante ya cu no ta solamente hendenan straño manera turistanan ta carga e virus aki, pero nos propio hendenan tin esaki. Aki Parlamentario Wyatt-Ras ta haya falta cu gobierno ta actua den un forma mas stringente pa atende cu situacion aki pa proteha nos hendenan di edad y tambe esnan cu tin malesanan chronico den nos hogarnan. Contact tracing, isolacion y cuarentena ta medidanan cu mester ser tuma y vigila di serca. Pa loke ta e follow up esaki mester ser fortifica y aki por bisa cu gobierno no ta cumpli cu loke pueblo ta spera di dje y por bisa cu gobierno ta nonchalant.
Banda di esaki e specialistanan den hospital a cuminsa bati alarma. Nos por a tuma nota cu den entrevista cu un specialista el a trece padilanti cu e capacidad di hospital no ta manera cu e mester ta. Segun informacion cu e Minister encarga cu Salubridad a suministra Parlamento a amplia e capacidad di ICU di 12 pa 33 cama y e opnames te na 60 cama. Sinembargo segun specialistanan cu ta traha den hospital di dia y anochi nan no por cumpli cu e demanda cu tin. E cantidad di patientnan ta mas. E cantidad di profesionalnan medico no ta suficiente. Enbista cu tin ta birando malo. Tambe ta carece na diferente tratamento cu no por ser haci ni operacionnan cu por tuma lugar. Na un dado momento no por carga mas e cantidad di pashentnan cu ta drenta hospital y tin informacion cu tin mas y mas pashent ta acudi na Eerste Hulp of na hospital pa asina nan haya tratamento. Sin duda cu esaki ta un situacion hopi preocupante.
Di otro banda nos por mira e Minister di Salud bin dilanti den medionan di comunicacion y bisa cu e ta bay baha e cantidad di Covid. E no ta profundisa riba e situacion cu tin na e momentonan aki, pero simplemente ta bisa cu e ta bay baha e cantidad y ora cu nos como parlamentario dirigi pregunta na e Minister, su persona no ta duna contesta.
Di un total di 228 pregunta cu Wyatt-Ras a dirigi na Ministernan di e gabinete actual, un total di 18 so el a ricibi reaccion ariba, cu ta cuadra cu 7.9% di e total di preguntanan cu a ser haci. Di e cantidad grandi di preguntanan cu miembronan di Parlamento a haci na ministernan, cu ta un total di 1328 pregunta, solamente 536 a wordo contesta, cual ta cuadra cu 40.4% di e totalidad haci. Aki por mira claramente cu na momento cu miembronan di Parlamento, kendenan tin e tarea y obligacion di sali na defensa di nos pueblo den Parlamento, pa medio di preguntanan ta cuestionagobierno pa asina nos por haya informacion di loke gobierno ta haciendo pa por influencia maneho di gobierno, nan no ta haya contesta. Pues gobierno no ta cumpli tampoco cu su deber di duna informacion y di ta transparente. Esaki tambe ta parti di nan actitud nonchalant.
Nonchalant di parti di e minister encarga cu Salud Publico ta ademas cu ora cu dirigi pregunta na su direccion den Parlamento, e ta sinta hari y cherche y haci bofon sin contesta e preguntanan. Sin duda esaki no ta e forma con pa anda cu e situacion delicado cu pueblo di Aruba ta confrontando tur dia. Segun Wyatt-Ras esaki no ta momento di schwercha ni haci bofon.
Na Corsou por mira cu un ‘epidemioloog’ ta atende conferencianan di prensa y ta su persona ta duna informacion corecto y veridico na pueblo di Corsou relaciona cu Covid mientras cu na Aruba tin profesionalnan ta bin dilanti, pero ta e Minister Presidente semper mester tey y e ta zundra tur hende, ta manda tur hende bay cas y keda cas. Contrario na loke e ta bisa por tuma nota ariba facebook cu e propio Minister aki ta sacapotret den weekend na beach y ta haci como e ta bay di un beach pa otro. E mesun Minister aki ta reacciona rabia ora cu den fin di siman polisnan mester a bay na diferente beach pa hala atencion di publico cu ta eynan, pero en realidad tur hende a sigui ehempel di e Minister aki. Aki por bisa cu si e Minister aki kier pa su conseho yega na nos pueblo e mes mester duna e bon ehempel. No por ta asina cu e Minister ta hinca den su cabes cu su persona si por bay beach y otro hendenan no mag di haci esaki, anto e ora e Minister aki ta bon ekiboca. Esaki ta otro ehempel di con nonchalant gobierno ta cu su mensahenan y consehonan na pueblo y tambe cu ta haci falta di un vision y plan integral pa anda cu Covid-19.
Un otro ehempel di e forma nonchalant di gobierno ta apertura di skolnan. Enbes cu e minister encarga cu Ensenjansa a bai na skolnan pa por tuma nota di loke ta necesario pa e skolnan habri na un bon manera el a laba man y a pusha tur cos riba schoolbestuurnan. Tin diferente skol cu ainda ta carece di material necesario y espacio pa garantisa seguridad pa e muchanan y tin mester di material adecuado di hygiena. Awor resultado di esaki ta cu tin diferente contagio, tin diferente scol manera Conrado Coronel, St Annaschool. St Paulusschool, tambe Abraham de Veerschool, cu a conoce brote, ocasionando panico entre e maestronan tambe, sinembargo gobierno mes ta keda aleha y no ta ni bin scucha kico e situacion ta, sikiera pa duna skolnan y nan maestronan un sosten pa mira con pa sigui.
Parlamentario Wyatt-Ras y su coleganan ta ricibi yamaday mensahenan di maestronan, kendenan ta hopi preocupa pa nan alumnonan y salud di nan mes. Ora Wyatt-Ras a puntra Minister di Salud encuanto uso di ‘mondkapjes’ pa nos muchanan di basis pa proteccion di nan mes, pero tambe di e maestro, e no a ni contesta, mientras WHO ta indica cu uso di mondkapjes por pa muchanan di edad di skol basico den caso tin contagio den vecindario. Esaki ta un otro ehempel di actitud nonchalant di gobierno. Wyatt-Ras ta aplaudi mayornan cu si a skohe pa manda nan yiu cu mondkapje pa proteccion. Aki si nan a warda riba e ehempel di e minister nan lo por keda warda sin fin.
Pa loke ta trata nos hendenan sin empleo tambe ta un situacion tristo cu hopi hende a perde trabou y ta depende di kico nan por haya di gobierno pa por sobrebibi. Ta di lamenta cu FASE cu caba biaha cu nos hendenan mester haya un suma nan tin cu cana tras di esaki. Tur luna tin cu lucha pa bolbe bin na remarka pa FASE. Nos hendenan no a skohe pa nos tin Covid, nos a haya nos den e situacion aki y awor mester haci’e mas facil pa yuda esnan den necesidad.
Regardando e area di salubridad Wyatt-Ras a base di su contactonan cu diferente ciudadano y profesionalnan a manda 15 pregunta pa e Minister encarga cu Salud y ban wak si e biaha aki si e ta haya contesta ariba nan.
E preguntanan ta dirigi ariba hospital, e referencianan cu tin pa specialistanan den e periodo maart-augustus compara cu 2019, cuanto operacionnan den periodo di maart-aug 2020 en comparacion cu 2019, testnan di laboratorio, si testnan di Breastcancer ta continua, capacidad di camanan di hospital y ICU y e lansbesluit BIG, si a combersa cu stakeholders.
Wyatt-Ras ta trece padilanti cu ta keda cu gobierno mester informa Parlamento y delibera cu Parlamentarionan y no na television of via facebook. Sinembargo na momento cu partido AVP a organisa un Brainstormsession pa haya informacion di stakeholders riba tereno di salubridad,encuanto nan experencia y desafionan cu Covid-19, e minister a tuma esaki hopi na malo. El a acusa. El a core yama un reunion den parlamento pa purba stroba cierto profesionalnan pa no bin e sesion cu AVP, tog e mester a cancela e reunion. Eynan ta bisto cu e kier a boycotea eactividad di AVP. Pero nos partido kier forma un vision, nos kier forma parti di e diferente solucionnan cu mester tin pa nos pais y mester a consulta cu diferente profesional pa haya e informacionnan, di cual Wyatt-Ras y su partido ta hopi agradecido na e profesionalnan aki.
Minister tambe a tira culpa riba AVP cu informacion di patientnan a leak. Segun Wyatt-Ras gobierno mester carga su responsabilidad. Na momento cu bo tin informacion importante di patientnan especialmente informacionnan di estado di salud di un persona bo mester ta hopi cauteloso. E lista ey no por ta den Kokolishi. E lista ey no por lastra tur caminda. Hopi biaha ta core culpa profesionalnan, pero e fout ta serca e politico nonchalant. Ta duna hendenan cu no mester e listanan y asina ta leakinformacion. Tur esakinan ta ilustra con nochalant e minster ta. E no ta cuida informacion di privacidad di hende. Su atencion no ta bij y ta cla pa tira culpa riba otro.
Segun Wyatt-Ras e Minister di Salud mester ta uni cu e veld y no bringa cu nan. Pa di berdad nos por combati e malesa aki mester di informacion y cooperacion y un vision dirigi. Paso e malesa aki ta devastador pa henter mundo y pa Aruba.
