Gobierno mester carga su responsabilidad pa cu e “uitvoeringsagenda” di landspakketten cu el a firma cu Hulanda

 In AVP

Parlamentario drs. Mervin Wyatt-Ras a trece padilanti, durante conferencia di prensa di fraccion di AVP, cu nos pais a ser azota pa e pandemia COVID-19. Nos ta encontra nos mes den e tercer “wave” of ola di e pandemia aki cu a exigi bida di varios di nos ciudadanonan. E Parlamentario a extende palabra di condolencia na tur esnan cu a perde nan sernan keri. Pa esnan cu ta traha den e sector aki ta desea nan forsa pa sigui cu e mesun dedicacion cu nan tin pa nos por domina e malesa aki.

Por bisa cu dia 6 di januari 2021 tabatin 110 caso pa dia y awor den februari tin entre 30-40 caso nobo di COVID. Corsou y Boneiro tin actualmente 0 caso. Ademas a constata diferente caso di e variante di COVID. Ta spera di por domina e virus aki pronto.  

E consecuencianan financiero-economico-social di e virus aki ta grandi. Segun Wyatt-Ras nos a y lo ser confronta cu diferente medida, cualnan lo ser introduci den nos pais, pa medio di e landspaketten cu gobierno y Hulanda a bai di acuerdo cu otro pa introduci. Lo bin dos Rijswet of 2 ley di Reino, manera un otro version di CAft, esta Raft y COHO. COHO lo haci cierto investigacion y trece cambionan y medidanan. Tabatin den Parlamento presentacionnan al respecto. Gobierno a firma e “uitvoeringsagenda” of sea e agenda di ehecucion di e landspakketten dia 1 di februari ultimo, mientras gobierno a bin pa duna informacion na Parlamento te dia 3 di februari. Esaki dor di e informacion cu a circula pa medio di un “voicenote” den cual a trece padilanti e preocupacion cu gobierno lo bai kita empleadonan publico for di trabou y lo introduci un BTW. Asina ey a haya gobierno den Parlamento. Segun Wyatt-Ras, esey no ta e forma di traha. Gobierno mester a bin duna splicasion di antemano. Pa yega na un mihor resultado pa destino di nos pais ta di importancia pa gobierno consulta no solamente cu gremionan y stakeholders, sino tambe cu Parlamento di Aruba. Den dos presentacion siman pasa por confirma cu lo bin medidanan. Sinembargo e ministernan no kier admiti nan responsabilidad pa tuma dicho medidanan. Ministro Presidente mes a trece padilanti cu lo bai analisa e sistema di empleadonan publico, teniendo cuenta cu resultado di un analis cu Hulandesnan lo haci. Ta bai investiga y analisa e sector publico, eficiencia y con esaki ta funciona pa asina yega na decisionnan. 

Pa loke ta trata finansas publico e minister encarga cu Finansas Publico a trece padilanti cu lo haci un foto di con nos finansas publico ta. El a haci un comparacion entre BTW y BBO. Segun e mandatario e diferencia ta tres letter. Pero loke nos ta mira ta cu den e landspaketten ta ser menciona e asunto di BTW. Lo bai cambia e sistema di impuesto y esaki sigur lo tin su consecuencianan. 

Pa loke ta trata salubridad publico ta haya mesun impresion cu e minister no kier carga e responsabilidad pa loke ta e consecuencianan. Den salubridad tin puntonan cu a ser tresi dilanti caba. Den e landspakket cu gobierno a firma y pues a bai di auerdo cun’e por nota cu Aruba lo mester cumpli cu condicionnan pa atende cu COVID. Den sentido di e.o. material, personal, ICU y  capacidad di hospital, etc. Pa loke ta trata vacuna e freezers mester ta adecuado, mester tin un plan y tur otro asunto cu ta regarda e vacuna mester ta regla. 

Den e “uitvoeringsagenda” ta menciona alabes cu e cooperacion entre e paisnan mester ser fortifica. Aki Aruba lo mester paga 250 miyon Euro. Tin e preocupacion cu esaki lo bai a costo di nos pueblo. E minister a trece padilanti cu e.o. lo bai traha hunto tambe pa loke ta trata compra central di medicina y firma diferente protocol tocante e.o. calamidad. Wyatt-Ras ta trece padilanti cu AVP a traha riba e cooperacion cu e diferente partners den Reino, pero tambe nos pais tabata trendsetter den esaki. Nos ta mas adelanta cu otro paisnan den Reino dor cu nos tin e.o. un AZV, nos tin un hospital bon equipa, nos a traha riba un instituto pa haci tratamento di radiologia na Aruba y nos por ofrese servicio di interventiecardiologie, Tur esakinan a ser desaroya den un proceso. Nos tin hopi como pais pa ofrese, esey tambe ta bon pa trece padilanti. Segun Wyatt-Ras ta necesario pa nos ta riba nos “qui vive”, paso si corta asina hopi den sector di cuido, nos no por realisa cuido di calidad. 

E preocupacion ta alabes cu nos pashentnan lo ser manda den paisnan den Reino pa cuido medico, dor cu kier elimina Colombia como pais unda lo manda pashentnan. Den cuido lo investiga alabes, segun e “uitvoeringsagenda”, e efectividad di cuido,  esta si loke ta ser inverti den cuido tin bon resultado. 

Segun Wyatt-Ras no ta husto cu na e momento aki cu nos ta memei di un pandemia y mientras Hulanda a yuda otro paisnan den Reino, Aruba so mester corta den cuido. Por menciona cu na Boneiro hasta ta duna bonus na esnan cu ta traha den cuido. 

Drs. Wyatt-Ras tin palabra di elogio pa tur e stakeholders cu dia 12 di januari ultimo a presenta un carta na Parlamento den cual a mustra nan inquietud y nan preocupacion tocante e situacion den cuido. Nan a haci un presentacion na Parlamento y gobierno a hay’e obliga di lanta un Task Force of comision pa wak kico ta nan preocupacion y kico ta nan deseonan. E hecho cu nos fraccion a bishita hospital tambe a hunga un rol pa gobierno actua. Por a nota si critica fuerte di esnan di coalicion. 

Segun Wyatt-Ras ta necesario pa sostene stakeholders na e momento aki, kendenan ta esnan cu ta cuida nos pashentnan bou asina hopi presion. Ta un lastima, segun Wyatt-Ras, cu e ministernan ta haci comosifuera nan no a forma parti di decisionnan cu Hulanda a tuma pa loke ta trata diferente asunto y nos cuido. Den un carta di Secretario di Estado Raymond Knops, fecha dia 27 di oktober 2020, como contesta ariba un carta di Stichting Respaldo, den nomber di stakeholders encuanto “specifieke korting op het zorgstelsel van Aruba”, por constata lo siguiente. Den e carta aki el a indica cu a base di locual CAft a duna como conseho, Aruba mester a corta 5 miyon florin pa luna. Esaki a base di un rapport cu Aruba mes a pidi pa haci e investigacion of sondeo. E rapport aki ta titula “Doorlichting kostenontwikkeling AZV” van PWC na anja  2019. E consheho ta pa “de kostenbesparingen in de gezondheidszorg met voorrang te implementeren”. Es decir pa duna prioridad na implementacion di recortenan den gasto den cuido di salud. 

CAft a duna e conseho pa corta den cuido. Secretario di Estado Knops ta declara den e carta cu; ”de wijze waarop Aruba de taakstelling invult is een lokale aangelegenheid. De uitvoeringsorganistatie AZV heeft hiertoe een bezuinigingsplan opgesteld. De ministerraad van Aruba heeft besloten dit bezuiniginsplan uit te voeren”. Aki Knops ta bisa bon cla cu ta trata di un asunto local. Cu AZV a traha un plan di recorte den cuido y cu Ministerraad di Aruba a dicidi pa ehecuta e plan di aki. Segun Wyatt-Ras enbes cu e ministernan haci comosifuerta ta Hulanda ta impone recorte ta nan mes a dicidi esaki den conseho di minister pa ehecuta e plan di medidanan den cuido di 5 miyon pa luna. Pueblo mester sa e berdad y gobierno mester contesta preguntanan di Wyatt-Ras dirigi na dje dia 22 di januari di 2021 encuanto liquidez di AZV den 2019 y 2020. Wyatt-Ras ta keda bisa cu gobierno mester carga su responsabilidad pa loke ta bin cu n’e na medida y no tira esaki ariba Hulanda, comosifuera “yo no fui”. E falta di transparencia ta crea “onrust” of intrankilidad den nos comunidad.  

Recommended Posts
Pregunta?

Manda nos un e-mail of message nos via Facebook. Danki pa e sosten.

Not readable? Change text. captcha txt

Start typing and press Enter to search