Gobierno lo mata companianan priva y estatal si pasa e ley!

 In AVP

Parlamentario di AVP, Benny Sevinger a duna e realidad den un sala di Parlamento completamente yen cu trahadonan preocupa riba kico lo bira nan destino si acaso e ley aki pasa. For di comienso di su discurso parlamentario Sevinger a keda alcaso y enfoka riba un solo meta, cu ta trece dilanti e preocupacion principal di locual ta tumando luga.

Ley di Maciaveli ta e prome palabranan di e Parlamentario ora di referi su mes na e ley cu kier purba di pasa awe. Un ley traha pa un Minister cu no tin ningun otro intencion cu mata companianan local y despues mata compania estatal, Serlimar.

Motibonan contundente pakico tin cu pasa e ley aki awe, segun Benny Sevinger, a keda splica den un forma habri y basa riba documentonan y pruebanan cu el a presenta. Na prome luga ta papia di e destaho publico, caminda cu enfaticamente ta duna clarificacion di e intencion maligno tras di esaki. Si no por garantisa e compania priva cu lo keda encarga pa maneha desperdicio y si e lo haya entrada, e no ta bay haya niun hende pa forma parti di e destaho aki. 

Cordando cu 3 luna pasa caba niun hende a mustra interes na e aanbesteding cu a tuma luga. Mirando cu ningun compania ta bay duna un prijs sin cu Gobierno duna un garantia. Ta na e momento aki e Minister en cuestion a bin cu e ley aki y asina duna palabra y compromete su mes cu e lo por paga. PESEY e ley aki tin cu pasa y pasa AWE!

Na di dos luga, Parlamentario Sevinger ta menciona e poder cu e Minister aki kier demostra ta ken ta manda den e pais aki. Esaki sigur na e Parlamentarionan di coalicion sinta den Parlamento cu tin cu sigui su peticion y vota voorpaso ta danki na dje nan ta eyden y pa mustra e famia De Veer cu ta e ta manda na Aruba.

No por papia di e ley sin papia di e destaho publico! 

Parlamentarionan mes no a menciona esey awe henter dia, ta locual cu Sevinger ta remarca. E Ley ta pa garantisa e destaho publico. Algun colega a menciona cu ta Serlimar lo ta esun encarga pa haci e destaho publico, pero den su discurso Parlamentario Sevenger a desbarata e ponencia ey di biaha. Riba Pagina 12 di e destaho ta menciona e contracting authority riba e destaho ta e Minister di Infrastructura y Medio Ambiente Otmar Oduber, no ta Serlimar. Eynan caba e problema a cuminsa. 

Si ta bay haci un destaho riba PPP cu pueblo ta bay paga y NO bin den Parlamento pidi mandato di e Parlamento y ta e Minister ta bay firma un contract di 20 aña, nos tin un problema, tabata palabra di Benny Sevinger. Tambe ta corda e Minister cu si acaso e firma un contract y e no por cumpli, ta su persona ta keda responsabel y di nan banda nan por bay demanda e Minister pasonbra t’e tabata e autoridad encarga pa cu e destaho, sin mandato di Parlamento di Aruba.

Riba pagina 21 di destaho, Minister ta papia di “Compania NOBO” Solid Waste Treatment Facility ( paso no tin nomber ainda) lo ta e compania cu lo bay maneha desperdicio di sushi riba pais Aruba. Realidad a keda presenta na momento cu Parlamentario Benny Sevinger a duna como ehempel e Ley existente cu Serlimar tin den nan man, cu ta propio y ta duna espacio pa nan cobra 25 florin na tur cas. Pakico e Minister lo kier cambia e ley ey mientras cu e placa ey ta drenta 100% pa Serlimar ? No ta mira e motibo pakico lo kier haci un cambio asina. 

Pero Parlamentario Sevinger a bisa cu e motibo ta uno contundente, pasobra den futuro no ta Serlimar ta esun cu lo bay procesa e sushi. Mayan ora e compania nobo bin, Serlimar por wel di cobra e 25 florin di dje, of e 10/15 florin di Ecotech/Ecogas pero den Ley e compania nobo ta bisa cu ta di dje e placa ey ta paso ta e ta procesa e sushi y ta cambio cu e Minister a efectua. No tin otro motibo, no tin pakico cambia e ley!

Recommended Posts
Pregunta?

Manda nos un e-mail of message nos via Facebook. Danki pa e sosten.

Not readable? Change text. captcha txt

Start typing and press Enter to search