fbpx
Edit Content

Duna nos Luz Berde

Danki na Bo sosten partido AVP por a sirbi Aruba durante añanan largo. Den periodo 2009-2017 nos a traha duro pa haci nos isla miho, mas bunita y mas solido. Nos a logra hopi. Pero tin hopi mas pa haci. E trabou cu nos a haci durante ultimo e periodo aki ainda ta visibel tur caminda: kilometernan di caminda a wordo construi y hopi mas a wordo reconstrui. Barionan y areanan publico cu tabata decai awe ta bunita y dushi pa biba y pasa tempo aden. E hospital nobo t’ey awor pa duna miho servicio na comercio y miho cuido na ciudadanonan. Scolnan cu tabata den mal estado a wordo reconstrui y a traha scolnan nobo. Cada un di e proyectonan aki a contribui na crea trabou y miho servicio. Nan ta embeyece nos pais y crea oportunidadnan nobo pa nos hendenan y nos economia.

Tuma contacto cu mi

 Gobierno a inventa crisis y awor a crea crisis real pa castiga pueblo

Rene Herde di partido AVP ta mustra cu Aruba tabata den desaroyo, un desaroyo economico tin biaha poco poco y dificil, añanan largo a lucha pa lanta turismo y pa habri refineria pero nos por a wak un grafico con Aruba a logra di sali for di un  abismo di menos 13% pa un crecemento economico.

Turismo cu ta e pilar principal, a crece aña pasa y pronostico pa e aña aki ta indica cu e lo crece cu e lo bolbe crece cu 4.4%. Desempleo cu tabata na 12% a baha y no tin ningun indicacion cu lo tin cambio drastico a corto plaso.

Inversionnan den un pais, cu ta esencial pa desaroyo economico y financiero, nos por mira cu inversionnan den sector publico ta continua y inversion den sector priva, ta continuando.

Kiermen tur indicador di un desaroyo of di un crisis, no ta cuadra c’un crisis ya c’un crisis ta ora bo sistema economico, financiero, social, hudicial, enseñansa y salubridad pega, ora cu e no ta funciona mas, ora cu servicionan pega, ora cu inversionnan pega, ora cu desaroyo pega ora cu inversionnan cay, e ora por papia di crisis.

 

Sinembargo gobierno MEPPORRED a declara for di momento cu nan a tuma gobernacion di e pais, nan a inventa nan triki politico insistiendo cu nos pais ta den  crisis pero tur indicador standard di economia di desaroyo, ta mustra net lo contrario.

E logica di gobierno aki su pensamento ta cu nan ta crea un esfera di crisis y dor di esey pueblo ta bay acepta e medidanan cu nan a tuma. Medidanan cu ta esunnan mas pisa den historia di nos pais, loke ta accijns, aumenta BBO, aumenta BAZV, hunto cu desaroyonan internacional di inflacion grandi cu lo conduci na aumento di prijsnan di productonan basico.

Un combinacion cu nunca prome Aruba a conoce mientras cu tur indicador di desaroyo economico y desaroyo general ta mustra otro pero caminda ya caba pueblo ta sinti e efecto di un falta di vision, un falta di capacidad pa dirigi e pais y awor ta for di cartera di pueblo gobierno ta rancando placa.

Aruba tabatin problemanan financiero 10 aña pasa y tur hende por corda con e deficit a cay, baha y keda baha tur aña dor di austeridad y dor di inversion pa e economia crece, no tabata facil, no tabatin problema pero si tabatin un maneho riba tur tereno pa percura pa e situacion cu tabatin na 2008 no continua.

Un situacion na 2008 caminda economia a cay, desempleo a aumenta te na 12%, entradanan di gobierno a cay enormemente, refineria a cera , Banco Central a describi con economia y turismo en special a cay. Aworaki nan no ta den caida, nan ta den crecemento tin biaha chikito  pero nan t’ey y tur indicador di crisis ta contrario na loke gobierno ta bisa.

No cu no tin problema pero e problemanan cu t’ey financiero of riba otro tereno, ta rekeri maneho a largo plaso y maneho diario y ta esey nos falta awor y esey no tin.

Den ausencia di un maneho adecuado y cu grito di un crisis, gobierno a dicidi di inventa un crisis y tabata e forma cu gobierno ta purba tapa tur cos cu e palabra crisis, e creacion di esfera di crisis pa hustifica medida y pa pueblo acepta esaki.

Sinembargo ta dificil pa pueblo acepta esaki ya cu for di dia prome di juli e impacto y efecto di pakete di medida cu gabinete Wever Croes a impone riba pueblo, ta ser sinti den tur cas na Aruba.

Ocho aña largo gobierno di AVP a atende cu hopi problema den maneho di e pais pero nunca a scucha crisis, al contrario a scucha e optimismo na tur momento di desaroyo y esey a crea e esfera cu a conduci na e desaroyo cu a saca nos pais for di e crisis.

Ya caba e efecto di medidanan ta wordo sinti riba tur nivel den comunidad, pa esunnan di menos entrada pero tambe negoshinan cu ta confrontando problemanan serio pa motibo cu e forma di haci negoshi, a bira mas caro cu e maneho di gabinete Wever Croes.

Un desaroyo cu no ta un sorpresa ya cu for di luna di october di aña pasa, ainda gobierno no a presenta su plan di maneho na pueblo y ta sigui papia di crisis y tur cos ta indica cu e maneho principal na e momentonan aki, ta di tuma medida contra pueblo,” sr Rene Herde di partido AVP ta mustra.