Gobierno a faya pa proteha Aruba door di afspraken cu Hulanda

 In AVP

Un delegacion di Parlamento di Aruba a biaha pa Sint Maarten, unda cu a topa cu delegacion di Corsou, Sint Maarten y Hulanda. E agenda ta yena cu diferente topico pa Parlamentarionan trata. Un di e topiconan importante ta over e topico di Venezuela di cual ultimamente e situacion ta birando uno mas dificil.

 

Parlamentario di AVP, Robert Candelaria a expresa cu nan a ripara cu medionan di comunicacion ta papiando di pirateria. Antes e botonan tabata bin treciendo arma y droga, pero awo ta un paso mas leu. E ta gradici cu ainda aki na Aruba no a mira esey, pero ta un desaroyo den e area di Trinidad unda cu piscadonan no ta pisca mas y a cambia pa haci uzo di strategianan di pirateria. Nan ta kitando boto for di otro, secuestra piscado y tripulante di cua ta exigiendo placa pa libera nan. Esaki ta cosnan cu por mira den otro parti di mundo caba y awo aki nan tambe.

 

Esaki ta un topico cu na varios ocasion treci padilanti y a bisa esaki den e reunion cu a yega tempo pa gobierno di Aruba tuma medidanan fuerte. Den pasado a trece dilanti cu ora a pasa e ley di LTU esaki tabata un oportunidad cu faya di a haci e reglanan hopi mas skerpi pa proteha nos isla y frontera, pero a pasa esaki lihe simplemente pa cumpli cu ‘afspraken’ cu Hulanda. No mester pasa leynan bou presion, pero trankil y tumando tur cos den consideracion y teniendo cuenta cu situacion di paisnan bisiña. Esaki ta un topico cu ta discutiendo cu partnernan den Reino.

 

Un otro topico cu ta tratando riba dje ta e ‘geschilling regeling’ y esaki ta ora tin diferencia di opinion entre paisnan di Reino of ora cu pasa cierto ley y mester tin cierto ‘contitutioneel hof’. Pa hopi aña esaki ta tipo di topiconan cu ta papia y discuti riba nan. Awo a nota cu hopi cos di politica ta funciona asina, pero esaki no mester ta asina. Cosnan por bay mas lihe, cosnan por ta mas practico, por tuma decisionnan mas eficiente. Ta spera cu por tin mas coleganan di Parlamento cu ta pensa den mesun forma aki pa corta un tiki di e cinta cora cu tur hende a bira comodo cun’e y haci cierto proceso mas lihe y mas miho.

 

Tin cosnan cu no ta sabi pa warda riba dje, no ta sabi pa rek nan mucho largo pasobra na final esun cu ta sali victima di esaki ta e ciudadanonan mes. “Mi ta spera aworaki den e tipo di settingnan aki cu partnernan di Reino, pero tambe na cas mes den politica, por cuminsa cambia mas di e cosnan aki pa asina salvaguardia y sigura nos ciudadanonan di cierto aspectonan legal, crisis cu por surgi den Reino”, segun Parlamentario Candelaria. Tambe e situacion mas visibel y fisico ta di nos pais bisiña. Den e dianan aki Parlamentarionan lo ta tratando topiconan te laat y ta spera di por trece contribucion pa mehoransa di Aruba.

Recommended Posts
Pregunta?

Manda nos un e-mail of message nos via Facebook. Danki pa e sosten.

Not readable? Change text. captcha txt

Start typing and press Enter to search