Gobierno a aloca 130 miyon pa gasto pero nada pa radar nobo pa mas siguridad

 In AVP

E situacion na Venezuela ta sigui empeora dia pa dia y Aruba ta sigui wordo confronta cu diferente caso  a consecuencia di esaki, cu hendenan ta sigui trata di drenta e isla via costanan y kedando ilegal aki cu tur consecuencia cu esaki ta trece cune.

Parlamentario Robert Candelaria di fraccion di AVP ta mustra cu e preocupacion aki tambe ta sinta cerca su fraccion pero na mes momento no ta mira cu Minister di Husticia actual, ta ‘garando e toro na cu cachonan.’

“E situacion en berdad ta un situacion hopi delicado y serio, cu ta rekeri un maneho mucho mas directo y estricto di parti di gobierno, principalmente pa minister di husticia, kende ta responsabel pa introduci un maneho y medidanan cu realmente ta efectivo contra di e desaroyonan aki cu tin tur hende preocupa.

Ta masha bunita pa minister di husticia festeha na grandi cu el a pone WIFI den edificionan di polis,  celebrando cu a habri un post di polis di bario pero un plan real, un plan concreto di loke e ta bay haci pa loke ta su maneho, ainda no por ser mira ningun caminda.

Pero ta mesun minister aki tempo cu e tabata den oposicion, a papia cu su persona si tin e solucion, cu e tin un plan efectivo pa combati criminalidad, hasta a exigi retiro di e minister di husticia anterior, sinembargo despues di casi 10 luna como minister di husticia, nos no a mira e plan aki bin dilanti of wordo presenta na pueblo pa asina tur hende por sinti cu tin cosnan concreto ta wordo haci. Papia ta uno y haci ta otro cos.

Na e momentonan aki tin cu bay mira na unda e sapato ta primi mas duro den husticia, na unda e problema mas grandi ta sinta pa loke ta nos siguridad  di nos pais y mi ta kere cu esaki ta e situacion di ilegalidad.

Aki no ta trata di solamente cu e hende ta huy pasobra cu e no tin placa y cuminda pero tambe tin hendenan cu ta purba drenta pa bin cu droga, pa trece hendenan cu tin mal intencion, pero ta cosnan cu den pasado a yega di pasa pero awor e riesgonan ta birando mas grandi.

Awor mester bay wak na unda bo ta baha e cantidad di personal den servicio pa nos siguridad, pa despues aumenta esaki na unda realmente ta necesario.

Kustsurveillance den pasado a yega di wordo haci pa polis, douana y Kustwacht hunto y ta algo cu mi a experencia, bo tin tres servicio caminda cada uno tin su diferencia pa loke ta su autoridad legal, pero trahando como team, bo tin un mokete mucho mas fuerte cu bo por dal cune.

No solamente pa e hecho cu tin mas hende envolvi pero e opcionnan legal cu bo ta haya ta auementa e accion mesora.

Un radar sigur ta importante y efectivo pero esaki ta hopi caro pero di otro banda ora cu nos mira cu gobierno a aumenta su gastonan cu 130 miyon di florin y di e placa aki no tin nada pa pone un radar aworaki mirando e situacion cu nos isla ta wordo confronta cune cu e situacion na Venezuela, e ora mi gobierno tin su prioridadnan robes.

Berdad tin asuntonan cu gobierno tin cu atende cu nan pero pa pone tanto placa riba presupuesto y e caminda cu pueblo ta coriendo mas riesgo pa su siguridad gobierno no ta hinca esaki riba presupuesto, e ora tin cu  bisa cu gobierno su prioridadnan no ta corecto.

Pa resumi mi tin cu bisa cu aworaki alocacion di personal mester ta concentra riba nos costa, e alocacion di placa di nos finansa mester ta concentra y dirigi pa pone un radar nobo y intensificacion di mas cooperacion entre diferente departamento,” Parlamentario Robert Candelaria ta mustra.

Recommended Posts
Pregunta?

Manda nos un e-mail of message nos via Facebook. Danki pa e sosten.

Not readable? Change text. captcha txt

Start typing and press Enter to search