Gabinete Wever-Croes ta pone cuido medico di Aruba den peliger

 In AVP

E Lider di AVP, mr. Mike Eman a splica e preocpacion cu nan tin cu e reto grandi cu cuido medico ta pasando aden na e momento aki cu e crisis alarmante di Covid-19 na Aruba y e medida di gobierno pa kita 60 miyon for di cuido medico.

E pression riba capacidad di cuido ta worde menciona tambe den e relato cu partido AVP a traha na Augustus 2020 despues di a Brainstorm cu e mundo medico. Un di e recomendacionnan e tempo ey caba, mr. Mike Eman ta bisa, tabata pa no sigui cu e austeridad aki pa locual ta trata e prespuesto di AZV pa cuido medico. Den nos rapport nos a recomenda enfaticamente pa no sigui cu e austeridad aki. E pression tabata grandi caba riba cuido medico e tempo ey y ta sigui door di e crecemento grandi den casonan positivo. E ta un reto pa atende cu tur e pashentnan cu ta yega hospital. “E ta pone un pression grandi riba tur esnan cu ta traha cu e enfermonan infecta cu Covid y tambe riba e cuido regular. Esaki ta cay atras cu hopi concecuencia, cu hasta por ta fatal”, e lider di AVP, mr. Mike Eman ta splica.

E pression t’asina enorme cu continuamente ta trahando na e punto di capacidad maximo y hopi urgente pa bin cu un expansion di capacidad pa trece un alivio y garantisa cu e calidad di cuido ta sigui. A constata esaki durante un session di brainstorming cu AVP a tene riba e tema aki ya caba na augustus y awe e ta mas preocupante cu nunca. 

Mr. Mike Eman ta bisa cu awor locual AVP a pone den su rapport na augustus 2020 ta worde confirma door di e grito di auxilio di e mundo di cuido medico, manera describi den e carta conhunto di sector medico di 12 di januari ultimo.

Den e carta di henter sector di cuido medico na Aruba, manda pa Gabinete Wever Croes y Parlamento, nan ta adverti cu cuido medico y acceso pa cuido medico na Aruba ta coriendo peliger. E cortamento di 60 miyon tin concecuencianan grave pa cuido medico, e sector ta alarma. Den nan carta nan ta bisa:  “E actual medidanan y esnan planea pa futuro pa loke ta bahamento di gasto den cuido ta nifica cu e acceso na cuido di AZV no ta sigur mas.  Riba término (mediano) largo e calidad di cuido no por word garantisa mas. E motibonan ta door di falta di personal califica, falta di espacio financiero pa inverti y inova y e crecemento continuo di necesidad di cuido. Dentro di e sistema di AZV siguradonan mas y mas (y contra tarifanan halto) lo mester worde manda afo, of simplemente lo no haya e cuido cu segun ley nan tin derecho riba dje. E impacto di esaki riba e pashent, su famia, e comunidad y tambe turismo ta enorme”.

Mr. Mike Eman ta bisa cu partido AVP ta sostene e sector di cuido den nan peticion urgente na  gobierno pa no corta exclusivamente pa loke ta e Aruba-zorgkorting  den e sector di cuido, pero pa hisa e presupuesto di AZV pa asina por keda garantisa e acceso na cuido medico. Esaki no ta tempo pa corta den cuido medico mr. Mike Eman ta invatisa.

Recommended Posts
Pregunta?

Manda nos un e-mail of message nos via Facebook. Danki pa e sosten.

Not readable? Change text. captcha txt

Start typing and press Enter to search