Gabinete Otmar Oduber ta forsando cambio di ley di Serlimar

 In AVP

Melvin Tromp di partido AVP ta mustra cu for di momento cu Minister Otmar Oduber a anuncia su retiro na luna di december proximo, pueblo awor ta wordo confronta cu dos gobeirno den un gobierno di coalicion.

Sr Tromp ta kere cu pa loke ta resta di e periodo di gobernacion di Minister Oduber, e lo ta heer en meester den un gobierno cu ta luchando mas tanto pa sobrebibi y keda na poder, cu lucha pa interes general di e pueblo di Aruba.

“No por mira e cosnan aki for di otro, ya cu for di momento cu Minister Otmar Oduber a anuncia su retiro, tur hende cu conoce e mandatario aki,  ta realisa cu den e dos luna y mey cu ta sobra di su mandato, Minister Oduber lo forsa na rergla tur loke e kier regla, ya cu practicamente e lo no haya resistencia for di gabinete Wever Croes of di e otro dos fraccionnan den parlamento cu hunto cu su fraccion di POR ta forma e actual coalicion.

E cambio di ley pa loke ta Serlimar ta ehempel di esaki ya cu mirando e periodo cortico cu e falta ainda na poder, e lo haci tur pero delaster un cos pa acomoda su hendenan, acomoda su sponsornan y ya e interes general di pueblo, e no ta mira como su responsabilidad mas.

Cueste loke cueste e kier bin cu e incinerator cu ta un inversion di 525 miyon florin cual lo wordo maneha pa un compania cu no ta Serlimar pero cu Serlimar tambe lo tin cu bay paga pa haci uso di e proceso aki.

Ta incomprendibel con un gobierno cu ta papia tur ora di integridad, ta permiti un Minister cu practicamente ta demisionario den cierto sentido, sigui tuma decisionnan cu lo por causa desaster pa centenares di mama y tata di famia cu ta trahando na otro companianan priva.

Companianan cu lo wordo perhudica formalmente cu e plan di Minister Oduber, caminda practicamente e ta impone su pensamento y su proyecto riba custia di trahadonan den companianan den sector priva pero tambe riba pueblo en general.

Nos mester ta cla den e asunto aki, ya cu Minister Oduber ta manipulando cu e proyecto aki di tal forma cu ta esunnan cu ta sostene gabinete Wever Croes so, ta mira e 6 cu Minister Oduber ta splicando nan, insistiendo cu esakit a un 9 y ta hopi tristo pa mira con representantenan di pueblo den parlamento, ta guli e cos aki manda abou.

Ya caba pueblo a wordo castiga formalmente pa gabinete Wever Croes, caminda e cambio di ley aki lo bay crea un presion ainda mas grandi riba cartera di pueblo caminda a lo largo ta pueblo mes tin cu bay paga extra pa un proceso cu no ta na su beneficio.

Actualmente gobierno ta subsidiando e compania di recoge sushi c’un suma di 20 miyon pa aña, placa cu ta bin for di saco di pueblo pero cu e proyecto nobo aki y cu e intencion di Minister Otmar Oduber,  lo ranca un suma adicional di casi mey miyon tur luna y caminda Serlimar mes tin cu contribui  financieramente na e proceso, caminda atrobe e placa aki lo ta procedente for di cartera di pueblo.

E cambio di ley aki ta apenas e comienso di un serie di decisionnan cu Minister Otmar Oduber kier forsa gabinete Wever Croes ehecuta prome cu e baha como Minister na luna di december y su persona sa masha bon cu  na momento cu dicidi cu lo no sostene e cambio di ley aki,  gabinete Wever Croes lo pasa pa historia.

Esaki lo bay bira e modus operandi di Minister Oduber te dia cu e baha como Minister caminda pa e tempo ey  e lo a regla tur cos pa amigo y sponsornan di su partido, mientras cu personalmente e mes lo ta cla pa e tempo ey sigurando su futuro financiero den diferente forma.

Ta un berguensa con  den dia cla pueblo por mira desaroyo di e tiponan aki tuma luga y  pueblo simplemente no tin un Parlamento  cu ta para cu pueblo, pero cu ta pensa unicamente con pa mantene un gobierno cu practicamente no tin derecho di existencia.

Medida tras di medida, caminda ningun caminda por mira con gabinete Wever Croes ta pensando  riba pueblo of ta Sali na vanguardia di un pueblo formalmente castiga caba y awor ta permiti un Minister defini no solamente kico ta bay pasa den e gobierno actual, pero ta determina ki ora y con tur cos lo tin cu tuma luga.

Gabinete Wever Croes tin problema serio cu Hulanda, cu CFT, cu gremionan comercial, cu maestronan, cu pensionadonan y cantidad di otro grupo mas pero complace e capricho di Minister Otmar Oduber tin cu wordo atendi prome cu tur otro cos, hasta si gabinete Wever Croes mester haya un aanwijzing.

“Mas claro no canta un gallo’ ta  un dicho conoci y pueblo por mira atrobe con ainda no ta su turno pa haya alivio ya cu otronan tin cu bin prome cu pueblo y ta na su luga pa nos bisa cu gabinete Wever Croes awor ta consisti di un coalicion den e gobierno di coalicion ya cu ta bon bisto cu gabinete Otmar Oduber lo tin e poder riba gabinete Wever Croes pa loke ta resta di e mandato di Minister Otmar Oduber,” sr Melvin Tromp ta mustra.

Recommended Posts
Pregunta?

Manda nos un e-mail of message nos via Facebook. Danki pa e sosten.

Not readable? Change text. captcha txt

Start typing and press Enter to search