Fraccionnan di gobierno a aproba 30 miyon florin pa Minister Oduber malgasta

 In AVP

Parlamentario di AVP Mike De Meza den un declaracion duna ta cuestiona con e fraccionnan cu ta apoya Gobierno te dia di awe no a cuestiona kico ex Minister Otmar Oduber a haci cu e 12 miyon florin adicional duna na Serlimar. Esaki a sosode tempo cu Oduber tabatin e cartera bou cual Serlimar ta cay.

Si pone tur hunto e suma adicional duna na Oduber, ta yega casi 30 miyon florin. 

Tur esaki aproba pa fraccionnan di MEP, POR y RED cu a “duna apoderacion pa Oduber malgasta e placa aki”. 

Parlamentario de Meza ta bisa cu si no a mal gasta e 30 miyon florin ey, awe e compania di recoge sushi lo no mester a bay Corte pa pidi surseance van betaling, cu ta encera un paro temporal di pagonan (pa tres luna) pa demostra kico nan ta haci. 

Esaki ta un stap leu pa e compania bati bancarota, e Parlamentario di AVP ta bisa. 

Si mira e caminda cu e Minister tabata hibando Serlimar, tur hende tabata sa cu esaki no tabata un direccion bon. 

El a menciona por ehempel, e contracto firma pa huur di e edificio pa Serlimar na Pos Chiquito, cu ta un edificio cu Gobierno a stop di huur. 

Hasta a trata di hinca DTI bek den e edificio pa yuda sponser di partido y ora cu no a logra, a purba di cera e oficina di Serlimar na San Nicolas, di cual nan ta doño y no ta paga huur  pa esaki, y a cera un contract di huur cu bal miles di florin pa aña. 

E sucedido aki ta similar na e mesun proyecto cu Oduber a bini cu’ne pa Sero Teisji, y mescos cu dump. 

“E no tabatin ningun intencion pa drecha e situacion, of sali na vanguardia di esnan cu ta biba na Parkietenbos. Un cos so tabata den su mente, cera deal pa e beneficia famia y amigonan di e tres partidonan. 

Nan tur tres aproba miyones di florin cu a bay perdi. Nan a papia di un incinerator di 300 miyon dollar y mata tur e otro compania, pa e mes saca beneficio di esaki. Na final ta Serlimar ta Sali perhudica.” 

E Parlamentario ta puntra unda e sindicatonan cu a para banda di ex minister Oduber, ta awe cu Serlimar ta na punto di bati bancarota. 

AVP si, e por bisa, a para fuerte contra e decisionnan cu e Minister tabata tuma e tempo ey. Tabatin Booshi Wever, kende pafo di Parlamento a demostra cu e cos aki no ta bon. Hustamente un ex miembro di MEP, kende ta denuncia cu e ta mira con MEP ta laga Oduber haci e desaster cu e compania di Serlimar. 

“Loke a tuma luga no ta corecto, ta actonan coruptivo.” Esaki a pone cu hasta Daphne Lejuez a dicidi di declara su mes debi na e situacion aki. 

Oduber tambe a pone Serlimar como e prome compania di Gobierno den e situacion debi, cu normalmente ta wordo considera di tin “low risk”. Pero cu e maneho di Oduber esaki a bira otro, mescos cu cualkier otro compania cu por bati bancarota. 

E tin su consecuencia ora cu organisacionnan internacional “rate” companianan di estado, manera SETAR y Utilities. Nan mester demostra cu nan ta “low risk”. Y tur esaki pa actonan di un Minister cu tabata loco den su accion, cu e unico cos importante tabata deal pa su amigo- y sponsernan. Manera cu a sosode cu e procedura pa cu incinerator. 

AVP a bin ta denuncia e situacion aki y lo sigui haci denuncia publicamente. 

Internamente ta bay evalua ki otro paso mester tuma. Normalmente, mirando tur e denuncianan, Ministerio Publico por actua. Pero ex Minister Booshi Wever tambe a haci un denuncia. Y si mira cu no ta haci nada, lo bolbe haci un denuncia. “Nos ta spera cu OM cuminsa cu nan investigacion riba Serlimar pasobra ta papia aki di miyones di florin.”

Recommended Posts
Pregunta?

Manda nos un e-mail of message nos via Facebook. Danki pa e sosten.

Not readable? Change text. captcha txt

Start typing and press Enter to search