Fraccion di MEP a lubida por completo cu partido MEP ta gobernando

 In AVP

Tratamento di cuenta anual 2016 den reunion publico di parlamento siman pasa, a transforma su mes den un reunion unico, no pa su contenido of seriedad, pero pa e falta di argumento sano y falta di seriedad pa atende un  asnto cu nunca mester a bira un problema.

Parlamentario pa fraccion di AVP, Michael Lampe a mustra cu manera a bira un custumber pa un aña caba, fraccionnan cu ta sostene gobierno a converti otro reunion mas den un circo politico, cu argumentonan for di luga y ni un suplica di minister di finansa, a logra di cambia nan pensamento.

“Aki nos ta papia di miembronan di parlamento kendenan a sigura pueblo cu cosnan lo cambia den parlamento, cosnan lo ta diferente y cu lo tin seriedad mas cu tur cos den parlamento, pero den transcurso di e reunion nos por a nota cu nan a haci tur cos, menos di tuma nan responsabilidad na serio.

Nos di fraccion di AVP, mescos cu prome di tur reunion, ta atende e contenido di e reunion  y ta prepara nos mes pa defini con ta atende c’un ley asina caminda no necesariamente, tur miembro di e fraccion tin cu hiba palabra, ya cu e proceso practicamente ta uno comun y coriente.

Por repara diferente aspecto di e jaarrekening en cuestion pero riba su mes no tin mucho discusion of cambionan cu mester bin den e cuenta anual aki, ya cu e ley ta cla caba pa wordo trata y wordo aproba.

Sinembargo e falta di seriedad pero mas tanto e falta di conocemento pa atende cu e materia ta pone cu tin miembronan di fraccionnan cu ta sostene gobierno, a dicidi di hiba un confrontacion c’un gobierno di AVP cu no ta na mando mas, cu no ta cargando ningun responsabilidad pa un aña caba.

E gobierno responsabel pa atende cu e cuenta anual di 2016 ta gabinete Wever Croes, pues e gobierno cu e fraccionnan aki ta sostene pero simplemente e propio minister di finansa, Xiomara Ruiz Maduro, no por a razona cu su miembronan den parlamento.

Na varios ocasion e mandatario a  mustra durante di su intervencion cu un decision di parlamento pa no aproba cuenta anual 2016, lo  percura pa un situacion di incomodidad mirando cu pa su maneho como minister di finansa  y pa gobierno, tin cu fiha e saldo pa 2016 pa asina por sigui cu e proceso di e cuenta anual di 2017 cu ya caba a yega parlamento pa wordo trata.

 

E falta di seriedad pa atende c’un ley asina importante a base di observacion cu Algemene Rekenkamer a trece dilanti, simplemente pa trata di saca probecho politico, ta sumamente iresponsabel, sigur ora cu nan partido MEP nunca a presenta un cuenta anual na parlamento y e logra na entrega esun di 2018, esaki lo bira e prome cuenta anual cu e partido aki den gobernacion, lo entrega na parlamento.

E solo hecho cu tin miembro di fraccion di MEP a dicidi di cuestiona cu mi persona no a hiba palabra durante di e reunion aki, ta muestra di no solamente su incapacidad pero tambe di un caracter infantil y un falta di conocemento riba kico ta tumando luga y kico e tin cu haci den un situacion asina.

E solo hecho cu fraccionnan cu ta sostene gobierno a dicidi di no aproba e cuenta anual 2016, a bisa hopi mas di nan capacidad y conocemento cu nada otro y ta otro muestra cu mientras cu nan a propaganda un era nobo den parlamento, ta bin resulta cu nan ta mas anticua cu nan precedornan.

Discusionnan sin sentido, gritonan contra miembronan di nos fraccion, dunando e impresion cu ainda nan ta kere cu ta AVP ta gobernando, tabata ehempel cla di e falta di seriedad cu nan a confirma durante di e reunion menciona.

E unico splicacion di minister di finansa Xiomara Ruiz Maduro mester a duna e tres fraccionnan den parlamento, ta si nan ta na altura ta cua gobierno ta na mando, cu ta MEPPORRED ta gobernando y no partido AVP,” Parlamentario Michael Lampe a declara.

 

 

 

Recommended Posts
Pregunta?

Manda nos un e-mail of message nos via Facebook. Danki pa e sosten.

Not readable? Change text. captcha txt

Start typing and press Enter to search