For di dia cu a forma e gobierno di MEPORED nos ta tende cu Aruba ta den crisis. Aunke desde eleccion na september 2017, economia no a cay manera na 2008. Desempleo no a subi manera 2008. Inversionnan cu tabata planea a sigui te awor aki. Forsa di compra no a cay prome cu september. Turismo, e pilar principal di nos economia en particular a sigui crece. E unico cos cu a cambia desde eleccion ta cu Aruba a haya un gobierno nobo. Sinembargo gobierno di MEPORED a usa e palabra crisis for di dia cu nan a drenta gobierno pa crea un ambiente den nos pais pa hustifica e MEDIDANAN mas pisa den historia di nos pais. Ni den e crisis dia cu a sera e refeneria pa prome biaha na 1985, ni den e crisis ora economia a cay cu 13% y desempleo a subi cu 12% na 2008, no a tuma medida asina pisa. Pesey hopi experto ta cuestiona e MEDIDANAN. Pero loke niun hende ta cuestiona ta e consecuencianan di e MEDIDANAN riba tur tereno di nos pais! Si no tabata tin indicacionnan real di crisis cu ta hustIfica e MEDIDANAN pisa cu gobierno di MEPORED a tuma, e MEDIDANAN aki mes ta bay causa un crisis!

 

CRISIS AWOR SI

E MEDIDANAN ta bay saca mas cu 125 miyon florin for di economia pa aña. E ta saca e placa for di saco di famianan cu ta bay sinti e perdida di forsa di compra. E placa ta bay sali di comercio y industria cu ta bay tin menos placa pa inverti, menos pa paga trahadornan, menos pa mantene servicio, menos pa expande y crea trabou nobo. Esaki ta bay tin como consecuencia cu ta bay tin menos espacio pa mehora e contractnan di trabou. Ya a tende sindicatonan bisa esey. Companianan ta bay por inverti menos. Kier men cu menos hende lo haya trabou y hasta por bay perde trabou door di falta di inversion y mantencion. Desempleo lo subi door di esey. Door di cu forsa di compra di tanto famianan como di companianan ta cay cu mas cu 10%, comercio y companianan lo bende menos y haya menos entrada. E spiral negativo di caida di entrada,  caida di inversion, aumento di desempleo, perdida di forsa di compra den tur sector lo wordo sinti tur caminda. Esaki no ta un prognostico negativo pa spanta hende. Esaki ta loke ta sosode cu  cualkier economia y mercado laboral ora un gobierno tuma MEDIDANAN pisa asina. Nan ta stroba y limita un economia enbez di stimula e economia. Hasta si logra mehora finansa publico a largo plazo, e consecuencianan pa e pais ta desastrozo. Esey ta loke a sosode rond di mundo. Djies wak nos pais ruman Corsow!

 

MANEHO ALTERNATIVO

Tur esnan cu ta kere cu e maneho aki a wordo caus’a door di e debe nacional y cu no por haci nada otro pasobra Hulanda y CAFT ta exigi e MEDIDANAN aki, mester puntra nan mes si ta posibel y na unda a logra baha e deficit riba presupuesto, stimula economia, baha desempleo, inverti den modernisacion di e pais, den forsa di compra di hende y den infrastructura, sin tuma MEDIDANAN cu ta causa crisis. E contesta ta si! Ta posibel! Y no tin cu bisca leu. Pa ocho aña largo Aruba a conoce un maneho asina bou di gobierno di AVP. Deficit a baha, economia a crece, desempleo a baha, forsa di compra a subi, inversionnan a crece….y no a crea crisis. Awor e MEDIDANAN si ta bay causa un crisis. E remedi cu e gobierno di MEPORED ta prescribi pa e crisis cu nan mes a inventa, ta bay causa un crisis serio! Ta crisis nan a grita. Wel awor e ta bin! Lamentabelmente pa pueblo di Aruba, pa companianan grandi y chikito, pa trahadornan y pa esnan cu kier drenta mercado laboral, e MEDIDANAN ta bay causa un situacion y problemanan cu awor nos no tin. Una bez cu nan crea e crisis, ta bay ta hopi mas dificil pa sali for di dje. Crisis? Awor e ta bin!