ExPromer Minister, mr. Henny Eman In Memoriam Tanta Ellen Croes-Raven

 In AVP

Un bunita alma cu a traha duru cu nos y motiva nos pa hopi decada a bay sosega.      Señora Ellen Croes-Raventabata un hende cu un bunita alma y un curazon grandi y bondadoso. E tabata un dama elegante, netchi, sempercariñoso y cu un sonrisa riba su cara. E tabata un bon mama, wela y bias-abuela, tanta, ruman; un tanta inspirativo pa nos tur. Un señora fuerte cu principionan solido, cu a scohe tempran den su bida pa saca man y traha pa crea un mihor humanidad y un bunita sociedad pa su isla stima Aruba. Tanta Ellen a demostra esaki den su bida priva, den su devocion na su fe y kerki, den su trabou social den comunidad y den su activismo politico den partido AVP.  Nos admiracion pe lo corda nos didje pa semper!

Tanta Ellen tabata fiel na su partido AVP te na su fayecimento. For di tempo cu mi tata ‘Shon A’ tabata activo den politica, Ellen tambe tabata tey. E tabata un voluntario, cla pa yuda den tur actividad. E tabata un activista cu Bo no mester a bisa kico pa haci, pasobra e tabata tin un stimaicon asina grandi pa su pais y tabata compronde bon pa kico su partido ta lucha. E funcion den cual mas Tanta Ellen a destaca tabata como Presidente di Comision di Damas di partido. Yama Tanta Ellen un ‘palanca di partido’ ta subraya su dedicacion y sosten pa tur loke AVP tabata haci. Cu su caracter cariñoso y argumentonan solido, e tabata convence otronan pa tambe forma parti di partido AVP y pa e metanan cu AVP tabata y ta para pe: solidarismo cu nos prohimo, para fuerte semper pa nos pais y traha duro pa crea un miho mayan. Ora mi a bin di Hulanda na fin di añanan 70 y a cuminsa lanta partido bek di un caida dramatico, Tanta Ellen a para banda di mi y a yuda mi unda cu e tabata por. Nos a traha schouder cu schouder pa trece partido bek riba pia. Un bes mas el a tuma rienda di e Comision di Damas y a pon’e crece y bira activo atrobe den tur cos cu nos a haci. Cu man fuerte pero yen di amor Tanta Ellen a dirigi e comision. Na incicio di e siglo aki partido AVP a reconoce e trabou inmenso di Tanta Ellen y brind’e un bunita homenahe pa tur loke el a haci pa partido den temponan bon y sigur tambe den temponan menos bon. 

Tanta Ellen tabata conoci tambe den sociedad pa yuda esnan di menos recurso. Su amor pa prohimo tabata grandi. Ela demostra esaki trahado den partido y door di partido den comunidad. Tanta Ellen demostra di tin e espirito grandi di e activista voluntario cu no por wak un inhusticia of necesidad sin spontaneamente haci algo pa corrigi’e. Asina nos lo corda Tanta Ellen: solidario cu tur den necesidad y activo pa cambia tur cos incorecto!

Nos Creador a tuma Tanta Ellen den su Reino unda siguramente el a haya un lugar special. Na nomber di mi famia, partido AVP y sigur mi ruman Mike cu Tanta Ellen asina cu Mike a drenta politica a sostene cu mesun carinjo y un amor special manera di un mama y cu tur su conocemento y experiencia desde su activismo den cuna di AVP cu mi abuerlo y mi tata. For di profundo di nos curason palabranan di condolencia na famia, amigo y conocirnan di nos Tanta Ellen. Cu un gratitud y admiracion grandi nos ta dispidi: Bay Bo trankilo Tanta Ellen. Nos no lo lubida nuncaTanta Ellen su solidaridad cu esnan den necesidad, Tanta Ellen su urgencia pa wak nos pais riba bon caminda, Tanta Ellen su voluntarismo pa pone man na obra. Sosega na paz! Godzegen Tanta Ellen met een bijzondere plek in de hemel. Rust Zacht.   

Henny Eman

ExPromer Minister di Aruba 

Aruba, 20 december 2019

Recent Posts
Pregunta?

Manda nos un e-mail of message nos via Facebook. Danki pa e sosten.

Not readable? Change text. captcha txt

Start typing and press Enter to search