Riba su red social ExPromer Minister Mike Eman a expresa su gratitud pa tur e sosten cu su esposa Doina y e ta ricibi durante e period dificil cu nan ta pasa aden y na e mes momento a mustra nan afecto y solidaridad cu tur esnan cu a worde afecta pa Covid y tambe sosten na nan famia. Mike y Doina ta haci jamada tambe riba comunidad pa corda bisti nan mask y dunando e estimulo aki nan mes. Tambe ExPromer Minister Mike Eman a duna tambe un relato di e siguiente pasonan den tratamento di Doina. 

Riba su red social ExPromer Minister Mike Eman a pone literalmente:  

Friends, amigonan, un Diadomingo Bendiciona, ricibi for di profundo di nos curason nos mihor deseonan y convivencia cu henter nos comunidad na e momentonan dificil aki cu nos isla stima y pueblo ta pasando aden. Nos ta ora pa tur cu a worde afecta y pa nan saneacion y forza pa nan famia. Nos ta convivi cu profundo gratitud pa tur amor y sosten cu nos a ricibi desde Doina su operacion y e tempo pisa y dificil di chemo. 

Danki na boso oracion nos bon Dios a pone Doina riba un bon caminda faltando algun examinacion adicional pa nos ta sigur. Pa esey nos lo a worde manda Hulanda e siman aki pa Erasmus Medisch Centrum. E situacion preocupante cu e brote nobo y grandi di virus na Hulanda y na Aruba ta haci cu un biahe bao di e circumstancianan actual mucho riesgo pa Doina su salud delicado. Nos a worde conseha pa no tuma e riesgo aki y pa awor sigui monitoria Doina su salud na Aruba. Laga nos tur rumanan tene fe cu nos hunto lo surpasa e momentonan dificil aki. Cuida Boso mes y Boso famia y nos comunidad. Tuma tur precaucion. Bisti Boso mask ora di bai pafor y ban cuida otro cu empatia, amor y stimacion. Danki pa Boso amistad nos tey cu Bosonan, un caluroso abrazo. [Mike y Doina]