ExPromer Minister Mike Eman: recomendacionan pa cuida nos pueblo mihor

 In AVP

Den su discurso nacional ExPromer Minister mr. Mike Eman a boga na autoridadnan concerni, pa sigui cu e pasonan tuma te cu awor pa evita plamemento di e vuris COVID-19 pero mustrando na mes momento, cu durante di dia tambe mester tin restriccionnan mas fuerte.

“Ban crea un logica den toque de queda anochi y shelter in place. E ta ilogico cu den anochi e control y repression ta total riba movecion pafo di cas y den dia supermercadonan y otro estblecimentonan ta yena cu ciudadanonan cu por afecta otro.

E restriccion den dia y colaboracion pa alcansa un mobilisacion minimal pafo den dia, mester ta corespondiente na e meta di anochi.

Algo mas cu “shelter in place” den dia ta necesario. Un “lockdown” temporal  den dia lo ta mucho mas efectivo pa para transmission di e virus y su logica lo re-inforsa e autoridad moral di nos peticion y obligacionnan pa comunidad.

Ban haci e mascaranan di proteccion di cara obligatorio pa tur cu sali riba caya. Hasta un traha na cas, segun scientificonan, ta mihor cu nada.

E mascara lo recorda nos tambe cada rato di nos vulnerabilidad frente e virus aki. E lo ta un pacto social comunitario grandi: Abo proteha e otro pa e otro proteha abo.

Nos instruccionan na esunnan positivo of na riesgo den cuarentena, mester ta mas cla y compaña cu mas sosten y asesoria. 

Nos mester ta sigur di e capacidad di Intensive Care (ICU) na hospital caminda pashentnan grave mester worde trata cu machin pulmonario di respiracion. Ban sigura cu nos tin e capacidad pa locual por ta bin riba nos cu mas di 50 caso caba y algun awor ta cuminsa ta worde hospitalisa. Rond mundo e machinnan di respiracion ta birando e factor determinante den scapa bida di esunnan gravemente malo di e virus.

Nos hospital tin un capacidad hopi limita di kambernan di ICU organisa riba ocupacion normal,” Mike Eman a declara den su discurso na pueblo di Aruba. Eman a comparti un momento den su mes bida y di su famia cu su mama tabata den ICU cu problema grave di pulmon y tabata tin un accidente cu un hoben a keda gravemente herida y mester a worde stabilisa urgentemente den ICU pa despues worde transporta pa Colombia. E situacion tabata cu ICU di HOH tabata yen y a puntra famia Eman si por a coopera pa Sra. Blanche Eman worde transporta den laat di anochi pa ICU Curacao, pasobra apesar di tabata un senjora grandi y fragiel a pensa cu e lo por haya asistencia pulmonario manual te Curacao. Famia Eman a bai di acuerdo, pero semper e anochi traumatico aki di scarcedad den ICU di HOH a keda na ExPromer Minister Mike Eman su mente pa cual e a recorda gerencia di hospital promer cu Aruba tabata tin un promer caso positivo di COVID pa sigura cu nos tin bon capacidad den ICU. 

ORACION

ExPromer Minister Mike Eman a pidi pueblo pa bay hunto uni y den oracion pa domina e curva di corona-virus.

“Tin ta bisa cu for di sciencia nos mester spera e solucion, pero e realidad ta cu ta oracion ta trece sciencia pa cual awe mas cu nunca nos mester ta gradicido pe.

Tanto pa locual tey caba y e conocemento y sabiduria cu nos mester worde bendiciona cune ainda.

Nos buskeda di contesta, solucion y rumbo nobo lo ta uno complica y profundo pa e tempo nos dilanti. E malestar social-economico cu corona-virus a crea pa Mundo y Aruba ta mes severo y feroz cu su ramnificacionan riba salud di nos hendenan.

Mes complica e contesta di sanacion social-economico lo ta tambe.

Si algo nos por siña di e disciplina di salud pa haya nos contestanan pa nos retonan social economico ta espirito grandi di sacrificio, di cooperacion mutuo, di creatividad y di voluntad sin limite di esfuerso cu ta worde desplega pa e disciplina di salud pa sanea y scapa bida di hende na e momentonan crucial aki,” Ex Promer Minister Mike Eman a comparti den su mensahe.

Recommended Posts
Pregunta?

Manda nos un e-mail of message nos via Facebook. Danki pa e sosten.

Not readable? Change text. captcha txt

Start typing and press Enter to search