fbpx
Edit Content

Duna nos Luz Berde

Danki na Bo sosten partido AVP por a sirbi Aruba durante añanan largo. Den periodo 2009-2017 nos a traha duro pa haci nos isla miho, mas bunita y mas solido. Nos a logra hopi. Pero tin hopi mas pa haci. E trabou cu nos a haci durante ultimo e periodo aki ainda ta visibel tur caminda: kilometernan di caminda a wordo construi y hopi mas a wordo reconstrui. Barionan y areanan publico cu tabata decai awe ta bunita y dushi pa biba y pasa tempo aden. E hospital nobo t’ey awor pa duna miho servicio na comercio y miho cuido na ciudadanonan. Scolnan cu tabata den mal estado a wordo reconstrui y a traha scolnan nobo. Cada un di e proyectonan aki a contribui na crea trabou y miho servicio. Nan ta embeyece nos pais y crea oportunidadnan nobo pa nos hendenan y nos economia.

Tuma contacto cu mi

 Exitoso anochi di informacion di PHP na Cas di Partido

Un bes mas e sala grandi di CdP AVP a keda chikito pa tur esnan cu a acudi diabierna anochi na un encuentro informativo di Plataforma Hobennan Profesional PHP. Studiantenan di Universidad di Aruba y di otro educacionnan professional a dicidi di traha hunto pa un causa comun: yuda nan isla progresa den forma positivo.


E hobennan profesional a uni nan talento, habilidad, vision y recursonan pa yuda pueblo di Aruba unda cu por. E hobennan di PHP a tuma e tremendo iniciativa di lanta e Tienda di Ley cu tur siman ta duna conseho huridico sin costo na esnan cu acudi na Tienda di Ley na CdP. Nan ta haya sosten y guia tambe di abogadonan estableci cu experiencia. PHP ta ampliando e grupo di Hobennan Profesional activo y ta recluta mas boluntario cu ta dispuesto pa yuda nan den sigui cu nan trabou y amplia esaki riba otro terenonan tambe.

Hobennan Wendert y Wendrick Cicilia a haci apertura di e anochi exitoso di informacion di PHP. Jessica Burgos y Juan Manuel Kelly a presenta e vision di PHP, nan iniciativa y proyectonan actual y pa futuro. Tur hoben di PHP a mustra un talento prometedor pa futuro. Hopi reconocimento e hobenan a haya tambe di lider di AVP, Mike Eman.

Hoben Presidente di Fundacion Mito Croes, mr. Franklin Hoevertsz Jr, a duna un splicacion di e proyectonan y principionan a base di cual Fundacion Mito Croes ta haci su estudionan. E cuatro principionan cristian ta: Responsabilidad comparti, Husticia Publico, Solidaridad y ta un Bon Guardian (sostenibilidad). 

Institutonan manera Digna Lacle-Herrera y Fundacion Mito Croes ta clave den prepara partido pa tin e miho plan y ekipo pa dirigi nos Pais. Riba e anochi di informacion di PHP e Presidente di Fundacion Digna Lacle Herrera (FDLH), docente di Derechonan Constitucional na Universidad di Aruba (UA), mr. dr. Rycond Santo do Nascimento, a duna informacion riba e cursonan cu FDLH ta inicia dia 5 di september riba derecho constitucional. Esaki ta habri pa tur cu ta interesa den servicio publico y sa con nos sistema politico y di gobernacion ta hinca den otro. 

Lider di Partido mr. Mike Eman y miembro di Parlamento drs. Mervin Wyatt-Ras a anuncia un evento importante riba e anochi di informacion di PHP. Dia 1 di september benidero partido AVP ta organisa ‘Encuentro Voluntarionan 2019″. Motivacion, Formacion y Compromiso lo trece dirigentenan di bario, activistanan y voluntarionan di Partido di Pueblo Arubano AVP hunto cu un Causa Comun. Esaki ta bay ta den Renaissance Convention Center for di 9or di mainta. Despues di e encuentro ta sigui un brindis pa celebra hacimento di aña di lider di partido mr. Mike Eman.