Ex Prome Minister Mike Eman a duna un ‘gastcollege’ na Universidad di Leiden

 In AVP

Leiden/Oranjestad- Ex Prome Minister Mike Eman siman pasa a duna un ‘gastcollege’ na Universidad di Leiden. Eman a wordo introduci dor di Prof. dr. Jorrit Rijpma den nomber di e Instituto Europeo di Universidad di Leiden ilustrando e carera politico di Eman,  particularmente su rol importante den realisacion di e derecho di voto pa Antiyano y Arubianonan pa Parlamento Europeo. 

Eman a enfoca riba algun tema importante manera e paisnan ultramar, e structura moral y racional di Reino Hulandes, e principionan di igualdad y e derecho di voto pa Parlamento Europeo. Su lectura a wordo marca tambe pa loke ta e eleccionnan benidero di Parlamento Europeo na mei di e aña aki. 

Presente na e gastcollege tabata un cantidad grandi di studiante y graduadonan den Ley Europeo, pero tambe conocirnan di Aruba, entre nan sra. Rosita Croes (viuda di Mito Croes, minister y miembro di Raad van State), Laurens Jan Brinkhorst (ex-minister y ex catedratico den Derecho Europeo na Universidad di Leiden), sra. Mildred Schwengle (miembro di Raad van State pa Aruba) y ex wethouder Karsten Klein (candidato pa Parlamento Europeo di CDA) y ex Miembro di Raad van State pa antiyas, Sr. Wawoe).

Eman a cuminsa su college den forma significante cu un expresion haci door di Reina Wilhelmina na 1942 den relacion cu Reino unda varios pais hunto ta forma parti, mientras cada un di nan ta independiente pa actua y tuma nan propio decisionnan, ‘steunend op eigenkracht, doch met den wil elkander bij te staan’.

Den luz di e acontecimentonan na Venezuela Eman a enfatisa cu un cooperacion den Reino awor mas cu nunca ta importante. Esey ta conta tambe pa e posicion strategico di Aruba, no solamente den siglonan cu ta tras di lomba, pero tambe awor.  

Banda di esaki Aruba, segun Eman, kier keda envolvi den un integracion mas aleu di Reino den Union Europeo. ‘Nos ta mira den esaki un situacion win-win pa Hulanda y Aruba. Pesey mi ta un defensor pa re-inicia e discusion riba e opcion pa Aruba ta un region utraperiferio di Union Europeo.”

Dr. Vestert Borger, docente universitario di Derecho Europeo na e Instituto Europeo di Universidad di Leiden, a gradici Eman pa su tremendo college cu el a yama un contribucion special na mas y miho  comprension na Hulanda pa e posicion di Aruba, e historia di Status Aparte y e ambicion di Aruba pa ta mas envolvi den Union Europeo.  Vestert Borger a doctora na inicio di 2018 cum laude cu su tesis ‘The Transformation of the Euro: Law, Contract, Solidarity’.

Eman actualmente ta forma parti di varios instituto cu ta concentra nan mes den promove sostenibilidad y prosperidad comparti. Den e calidad ey e tabata recientemente keynote speaker na Bermuda y Belize unda el a papia riba energia renobabel, SIDS y oportunidadnan nobo pa paisnan isleño pa nan ta areanan di “research & development” den busca y haya solucionnan pa retonan global manera cambio di clima, maneho di oceano, desaroyo di energia alternativa y erosion di tera y tambe bou awa, modelonan socio-economico cu ta conduci na resultadonan husto pa e ciudadano.  

Recommended Posts
Pregunta?

Manda nos un e-mail of message nos via Facebook. Danki pa e sosten.

Not readable? Change text. captcha txt

Start typing and press Enter to search