Entrega di autonomia financiero di pais Aruba, tin un nomber y un fam segun miembro di fraccion di AVP, Mervin Wyatt Ras, sigur ora cu a tuma nota di declaracion di Prome Minister Evelyn Wever Croes dialuna ultimo.
“Ta dialuna nos a tuma nota cu Prome Minister a bay prensa y informa cu el a haya un yamada for di Seacretrio di estado Knops, riba condicionnan cu Hulanda ta stipula pa Aruba haya e di tres tranche di e ayudo financiero di solidaridad for di Hulanda, cu esaki ta mara na hopi condicion y condicionnan hopi estricto tambe.
Parlamento a reuni cu e Minister di Asunto General caminda tambe tabata presente Minister di Finansa, Minister di Husticia, Minister di Enseñansa y na cual reunion tambe tabata presentea directornan di DJWZ y director di finansa.
Nos a tuma nota cu e situacion ta sumamente dificil, caminda Hulanda a pone hopi mas condicion pero tin cu mustra cu Parlamento no a haya e documentonan aki pa ta altura di e condicionnan aki manera mester ta.
Fraccionnan a pidi Minister di Asuntonan General Evelyn Wever Croes kende na su turno a bisa cu gobierno no por duna e documentonan aki ya cu nan ta secreto y ta documentonan di Rijks Ministerraad y no por pone nan na disposicion di Parlamento.
Riba insistencia di varios Parlamentario y fraccionnan, Minister Presidente a dicidi di manda un carta pa Rijks Ministerraad pa nan duna un ‘ontheffing’ pa asina nos por haya e documentonan aki pa mira.
Eynan un biaha mas pueblo por mira con Minister Wever Croes ta anda cu informacion pa motibo cu contrario na Aruba, otro paisnan den Reino si a duna nan Parlamento inzage den e documentonan cu e condicionnan cu Hulanda kier impone.
Pues un biaha mas e trato di gobierno pa cu Parlamento, no ta e trato manera mester ta y esakinan ta discusionnan hopi grandi cu mester bay tuma luga.
E consecuencianan di e medidanan ta bay ta devastador pa Aruba ya cu segun nos por a compronde, ta bay tin dos Rijkswet, uno cu ta e financieel toezicht cu lo ta un copy paste di e LAFT, cu normanan na cual gobierno tin cu atene su mes.
E otro ta e Rijkswet caminda lo introduci un entidad, un Caribbisch entiteit pa introduci ‘hervormingen’ y e entidad aki ta bay tin hopi poder, ya cu nan ta bay controla tur loke tin cu haci cu placa cu Aruba ta haya di fiansa.
Pues nan ta bay dirigi e placa aki pero tambe nan ta bay tin control riba tur loke ta trata di finansa publico, economia, husticia, salubridad y enseñansa.
Antes nos tabatin e toezicht di e maneho financiero aki na Aruba y awor e lo amplia riba varios otro tereno y ta situacion caminda nos ta bay perde nos autonomia den tur sentido y ta algo hopi preocupante no solamente pa Parlamento pero tambe pa diferente sindicato cu a expresa nan mes na momento cu a organisa un cumbre cu cu Minister Presidente y diferente otro Minister.
Politiconan tambe a reuni cu Minister Presidente y nan a expresa nan preocupacionnan al repecto y pa nos sospresa despues nos a bin tende cu Minister Presidente a biaha urgentemente pa Hulanda pa asina e por atende e Rijksministerraad di diabierna.
Aruba su autonomia tin 34 aña ta celebrando cu nos pais a logra esaki y mantene esaki y Minister Presidente mes a duna den e carta cu el a manda pa Rijksministerraad pa haya ontheffing, ta mustra e Minister Hulandes cu pa 34 aña Aruba su autonomia a keda intacto y awor kier mishi cu esaki.
Sinembargo por bisa aki tambe cu esaki tin di haber con politiconan a yega di actua den pasado, ya cu ni maske con e situacion ta na bo pais, como politico bo no ta bay Hulanda y purba di caba cu bo propio pais.
Esey a tuma luga dor di e propio Minister Presidente Evelyn Wever Croes y Minister di Finansa Xiomara Ruiz Maduro kendenan continuamente tabata bay Hulanda, kehando cu gobierno di AVP a crea mega debe y hasta e entrega un rapport na diferente miembro di Tweede Kamer, titula “Feestvierend ten onder gaan”.
Pues ta Prome Minister actual mes a yena politiconan Hulandes contra Aruba, papia malo di politiconan Arubiano, papia malo di tur locual ta na Aruba y kico ta bay pasa awo, esta cu Hulanda ta bin bek pa nan,” Parlamentario Mervin Wyatt Ras a declara.
