Endy Croes  ainda mester splica su fiesta cu lotto, AZV y meter di coriente

 In AVP

Ora cu scucha e curashi cu parlamentario di MEP, Endy Croes tin pa bin papia di fiesta di placa tratando na atacha integridad di otronan, e ta crea e impresion cu el a baha for di shelo y ta cana tur dia na blanco bisto pa su puresa, miembro di AVP, Melvin Tromp ta mustra.

Segun sr Tromp aki ta un parlamentario y politico cu tin un historia di cosnan no mucho positivo ta persiguie ya cu te awe ainda Endy Croes no a duna splicacion na pueblo di loke el a haci den pasado.

“Endy Croes ta e ultimo cu tin cu papia riba e tipo di cosnan aki, mas ainda ora cu e kier inventa cosnan cu e tin den su cabes ya cu e ta kere cu tur hende tin su mentalidad, tin su mal mayanan cu e tabatin y ainda tin.

E parlamentario aki no mester lubida su envolvimento den fundacion Lotto pa Deporte caminda el a comete fechorianan cu te awe ainda e no por a hustifica pero caminda cu maniobranan cu a tuma luga, e no a mira paden di un prison ainda.

Ora bo ta papia di otronan, ta trata di crea cosnan cu no ta existi, ta trata di pinta otronan manera abo me ta hinca den otro, e ta un berguensa y cu ta demostra cu ainda bo no a siña bo les.

No solamente den e caso di fundacion di lotto pa deporte caminda nunca a duna splicacion di gastonan cu Endy a haci y cu te awe ta wordo cuestiona y cu e pone cu mester a cambia henter e structura di e fundacion aki, pa evita cu tiponan manera e parlamentario aki, lo  haya otro oportunidad pa comete e fechorianan aki.

No ta por nada cu su persona y su gobierno a trata di pone man caba riba maneho di fundacion di lotto, hasta gritando cu mester busca un otro tipo di loteria mirando cu e biaha aki e no por bolbe haya e oportunidad pa atrobe comete mesun cosnan aki.

No solamente su maneho cu e fundacion pero ta mesun persona aki lo tabata meti den asuntonan di meter di coriente, manipulando cu esakinan, pa negoshi propio y famia y den e proceso aki privando companianan estatal haya placa cu nan mester a ricibi for di dje mescos cu tur otor hende den pueblo.

Tin otro indicacionnan cu Endy  ainda mester bin splica of nenga su participacion manera den e caso di fraude cu AZV pero cu nunca el a haci  y awor tin curashi di bin trata di mishi cu integridad di hendenan cu si a traha segun regla y leynan existente.

Tin documentonan cu declaracion di Endy Croes caminda e mes ta declara loke el a haci den su periodo na cabes di fundacion lotto pa deporte pero pa cual nunca el a wordo persigui pero ta cosnan cu si tin mester lo publica esakinan pa refresca su memoria di su fechorianan y pa e stop di hunga e tipo di weganan politico sushi aki, pa tapa su incapacidad y di su fraccion te cu awor.

Endy tin experiencia suficiente di loke kiermen fiesta di placa ya cu e mes a  fiesta cu placa pa deporte di nos deportistanan sin cu el a paga bek un solo debchi di esaki y ta bira tempo e stop di pretende cu e ta integro, cu nunca el a haci algo, ya cu tin prueba suficiente di tur loke el a haci y loke el a comete,” Melvin Tromp di AVP ta mustra.

 

 

 

 

Recommended Posts
Pregunta?

Manda nos un e-mail of message nos via Facebook. Danki pa e sosten.

Not readable? Change text. captcha txt

Start typing and press Enter to search