fbpx
Edit Content

Duna nos Luz Berde

Danki na Bo sosten partido AVP por a sirbi Aruba durante añanan largo. Den periodo 2009-2017 nos a traha duro pa haci nos isla miho, mas bunita y mas solido. Nos a logra hopi. Pero tin hopi mas pa haci. E trabou cu nos a haci durante ultimo e periodo aki ainda ta visibel tur caminda: kilometernan di caminda a wordo construi y hopi mas a wordo reconstrui. Barionan y areanan publico cu tabata decai awe ta bunita y dushi pa biba y pasa tempo aden. E hospital nobo t’ey awor pa duna miho servicio na comercio y miho cuido na ciudadanonan. Scolnan cu tabata den mal estado a wordo reconstrui y a traha scolnan nobo. Cada un di e proyectonan aki a contribui na crea trabou y miho servicio. Nan ta embeyece nos pais y crea oportunidadnan nobo pa nos hendenan y nos economia.

Tuma contacto cu mi

 Economia a crece bou maneho di Gabinete Mike Eman

Oficina Central di Estadistica a publica recientemente e cuentanan nacional y a determina e cremento economico pa e añanan 2013-2017, pero Gobierno no a trece dilanti e enbergadura di e conclusion manera mester ta. Minister di Asuntonan Economico, Finansas y Cultura a limita su mes na splicacion hopi tecnico pa loke ta trata e diferencia entre e estimadonan cu Banco Central ta uza, pero e mandatario no a presenta e conclusionan mas importante di e datonan aki, esta cu: e modelo economico di gobierno anterior a funciona debidamente cu a resulta den un crecemento economico y e ‘megadebe’ di mas di 90% di GDP nunca a existi.

 

E modelo economico cu gabinetenan Mike Eman 1 y 2 a ehecuta a resulta den 5 area di oportunidad economico. E proyectonan infrastructural mas importante di ultimo 30 añanan, manera e Green Corridor y e Watty Vos Blvd., como tambe e diversificacion di e actividadnan den e area waf nobo di Oranjestad, rond di e refineria y modernisacion di nos hospital ta brinda oportunidadnan pa inversionistanan local y empresanan mediano y chikito por desplega nan actividadnan. No solamente inversionan haci den infrastructura, areanan publico y barionan a duna su frutonan, pero inversionan hasi riba tereno di energia, cu a resulta den reduccion structural di tarifanan di awa y coriente, como tambe inversion den poder di compra. Esaki tabata tin como resultado  cu esunnan cu ta gana menos cu 2500 florin pa luna a bay dilanti cu mas cu 10% den nan poder adkisitivo. E maneho economico aki cu a inicia na aña 2010, cu tabata specificamente dirigi pa duna un impulso na nos economia pa por sali di e crisis, a duna su fruto.

 

Resultado aki ta contrario na declaracionan recien di Prome Minister cu a indica cu lo maneho di gabinete anterior lo a resulta den un recesion economico. Cu e datonan nobo aki por refuta tambe e opinion di actual presidente di e colegio di supervision financiero, esta cu e modelo economico di e gabinete anterior no lo a funciona. E crecemento economico ta ilustra den e grafico hasi a base di e datonan recientemnete publica pa Oficina Central di Estadistica. Na aña 2015 na momento cu a bisa di tabatin crecemento di 1.5%, a resulta di un crecemento economico di 5.6%. Esaki ta un diferencia substancial, pero ta confirma di e aumento di consumo y inversion priva cu nos por a mira rond di nos isla. Na aña 2016 caminda cu lo tabatin un contraccion economico, tabatin un crecemento economico di 1.6%. Na aña 2017 tabata un crecemento di 3%. E aumento di actividadnan economico a resulta entre 2014-2017 na casi 635 miyon mas di loke Banco Central a estima pa loke ta trata actividadnan economico.

 

E cuentanan nacional ta literalmente actividadnan economico di cada sector pa por calcula exactamente e actividadnan economico den un aña specifico, contrario na e estimacionan di Banco Central a base di informacion cu nan tin. E trahamento di cuentanan nacional ta un proceso cu ta dura hopi largo.Na aña 2014-2015 cu asistencia externo henter e proyecto aki di cuentanan nacional a haya un impulso nobo. Recientemente esaki a culmina den e presentacion di cuentanan nacional entre aña 2014 y 2017..Cu e datonan nobo di Oficina Central di Estadistica a base di e cuentanan nacional, por mira claramente cu e modelo economico a duna su fruto.