Proyecto Green Corridor ta un proyecto cu tin mas cu 30 aña den planificacion  y a bin ta papiando pa construccion di un caretera di cuater via entre Oranjestad y San Nicolas, pa trece mas actividad pariba di brug.

Parlamentario Benny Sevinger, ex Minister di Infrastructura a mustra cu nunca e gobiernonan aki por a concretisa e proyecto aki pa diferente motibo caminda por bisa cu Gobierno antes di MEP, pa medio di ex Minister Marisol Lopez Tromp, tambe a trata di ehecuta e proyecto aki.

Un di e puntonan mas cardinal e tempo ey tabata cu Minister Marisol no tabata sa con pa haya placa pa ehecuta un proyecto di e magnitud aki pero pa haya aprobacion di Parlamento pa un suma di 292 miyon riba un presupuesto di un aña, esey hamas lo pasa den Parlamento.

Parlamentario Benny Sevinger a mustra cu ora cu partido AVP a drenta den gobierno, a keda dicidi cu lo bay atende cu cuater proyecto grandi cu a yega di conoce na pais Aruba.

E proyectonan aki ta e Green Corridor, di dos ta Watty Vos Boulevard,  di tres ta e mudamento di waf di Oranjestad pa Barcadera y di cuater tabata e renobacion y expansion di hospital.

No solamente pa motibo cu nan  ta proyectonan importante pa e pais, pero ta proyectonan cu lo a trece un desaroyo positivo economicamente pa e pais y caminda lo bay tin mas desaroyo pariba di brug, cu entre otro hotel, mas comercio cu lo ta interesa den pariba di brug, crea posibilidad pa medical tourismo,  y mas oportunidad pa mas desaroyo ainda manera un waf di transito, miho trafico cu construccion di Watty Vos Boulevard   y tambe mas siguridad.

Segun sr Sevinger cu ta den e contexto aki a trece expertonan for di Hulanda  caminda Minister encarga cu Rijkswaterstaat a coopera tremendo den esaki, pa bin Aruba  y discuti cu expertonan di Aruba riba ehecucion di e cuater proyectonan aki.

Na 2011 a presenta e proyecto aki na mundo pa asina busca interes di companianan grandi cu lo ta interes den ehecucion di e proyecto aki y e sistema bou di cual esaki lo wordo financia y ehecuta.

Segun Benny Sevinger di e forma aki a bin haya e compania Odinsa cu a presenta e proyecto mas miho pa Aruba y a wordo completa na luna di Juli 2015 caminda e firma esunnan cu a presta placa na Odinsa pa asina e proyecto aki a cuminsa na 2015 y mester a termina na 2017.

E discusion  cu tin awor cu Minister Oduber a bin Parlamento cu diferente argumento cu e kier a lanta, sin splica realidad di tur loke ta pasando.

A base di e acuerdo firma cu e compania aki, na final di 2017 e compania mester a entrega e proyecto completamente cla na Gobierno, e asina yama “available”, esta cu e ta totalmente cla pa uza, loke no tabata e caso y consecuencia di esaki ta cu Gobierno no por paga si e proyecto no ta cla.

Expertonan independiente cu a supervisa e trabou a bisa cu nan no a keda cla y hasta e propio contratista a mustra cu e proyecto no ta cla y e suma cu Gabinete Mike Eman II a pone riba presupuesto di casi 6 miyon florin, e placa aki gobierno a dicidi di destina esaki cu gastonan cu a drenta acerca riba diferente sector.

Dia 1 di september DOW a manda puntra extra fondo pa e proyecto aki, pa un suma di 311 mil florin pa asina por rond af e proyecto na final di aña y tabatin mester a placa aki entre september y december.

Un dia prome cu eleccion cu ta 21 di september, ex Minister Sevinger a aproba e peticion di DOW y pa nan informa Price Waterhouse cu nan lo haya e placa y pa cuminsa cu e trabou.

Minister  Oduber a bin Parlamento y bisa cu Benny Sevinger no a atende cu e carta y peticion aki,  pero aki Sevinger a mustra cu dia 26 di october  su persona y e contratista a firma un carta caminda ta declara na e Minister di Finansa di e tempo ey, cu e placa cu tabata destina pa paga Green Corridor na 2017, no ta necesario mas ya cu nan lo no keda cla pa fin di aña y lo por uza e placa aki pa otro destinacion.

Dia 10 di October a bay Conseho di Minister  y a aproba hunto cu Minister di Finansa, cu e placa riba presupuesto, ta wordo destina pa presupuesto supletorio, pues pa gastonan cu gobierno no por  a premira of gastonan extra cu gobierno tabatin cu e placa aki.

Sevinger a mustra cu dia 6 di November el a manda un carta pa Minister di Finansa informando cu e placa ta disponibel hunto cu e decision di Conseho di Minister y cu ta pone e placa aki pa preuspuesto supletorio y specificamente  a mustra cu e placa aki ta a base di e peticion di DOW pa asina Price Waterhouse sigui cu su trabou.

Cu Minister Oduber ta bin Parlamento awor pa bisa cu no a atende cu e asunto aki, hungando su weganan politico cu no tin sentido.