Parlamentario drs. Mervin Wyatt-Ras durante conferencia di prensa di fraccion di AVP a felicita pueblo di Aruba, especialmente pueblo di Sta. Cruz, cu e bunita proyecto di
Gabinete Mike Eman II den pueblo Sta. Cruz. Aki e ta referi na e MFA cu lo ser inaugura e siman aki dia 12 di oktober. Durante gobernacion di Gabinete Mike Eman I y II a cana den pueblo y a sondea kico nos hendenan kier y a base di esaki a bin ta construi e diferente MFAnan na Noord, na Paradera, na Sta. Cruz y despues lo mester bai Dakota y San Nicolaas. Wyatt-Ras ta spera cu gobierno lo tin e grandeza di admiti y reconoce esnan cu a inicia y traha riba e proyecto paso gobernacion ta un continuacion.
Den e MFAnan ta ser duna diferente tipo di servicio. Tin seccion di bevolking, belasting, ta duna conseho juridico, muchanan por bai bibliotheek y sinja anda cu computer. Personan por encontra cu otro den e facilidad aki. E caracter di un centro multifuncional ta tambe uno social, cu e ta trece nos hendenan hunto y nan por intercambia ideanan cu otro. Tin mas proyecto di gobierno anterior cu e gobierno aki ta haci apertura di nan of ta continua cu nan, manera e centro di pesca di Zeewijk-Noord Cura Cabai, e centro oncologico di IMSAN, e biblioteka di San Nicolaas cu ainda gobierno aki no a inaugura. Tambe por menciona e Green Corridor cu ta un proyexto di gobierno anterior pero e Ministro Presidente, ta broma cun’e , enespecial e brug. Esaki despues cu den campanja ela prohibi su seguidornan pa pasa riba e mesun brug aki.
Cu e proyecto di MFA por mira con cada florin cu a ser inverti dor di gobierno anterior no lo beneficia amigo, ni famia ni amistad sino pueblo di Aruba. Un biaha mas pabien nan pueblo di Aruba y di Sta. Cruz.
