Durante siman a haya oportunidad di combersa y haya un poco informacion for di parlamentario Robert Candelaria riba e “Ley di Screening di Ministernan” cu no a haya sosten den staten. Motibo y amienda cu lo por a duna mas peso na e ley ta algo cu nan a descarta y cual a haci cu e ley no a pasa.
Robert Candelaria a splica cu dialuna den Parlamento e ley aki a pega. A tuma nota cu dies parlamentario tabata na fabor mientras cu dies tabata contra. Di su banda Candelaria a conta cu nan no por a sostene e ley aki na momento cu a presenta un amienda na comienso cu netamente tabata necesario pa garantisa un screening di nivel mas extenso posible pa cu minister.
Ehempel di pakico no a sostene e ley
E ley cu a presenta den staten lo a laga un espacio habri cu ministernan por tin famianan yega emplea (trahando) pa nan. Den cuadro di integridad esaki ta algo cu no por tuma luga. Tambe a tuma nota cu e ley presenta den staten ta stipula cu te october otro aña lo evalua e ministernan, mientras cu si e nivel di screening cu nan kier a pasa lo tabata bon, e ora lo mester a toets e gobierno actual tambe na dje. Ta locual cu nan no a acepta y lo kier a warda despues di eleccion!
Algun hende lo no por a bira minister den e gobernacion actual
Un decreto ministerial (Decreto di Gobierno) vigente a garantisa caba cu algun hende lo no por a bira minister. E ley aki tambe lo por a haci esaki pero locual cu tin na vigor ta haci e trabou caba di un screening tumando luga pa añas cu sigur ta uno basta completo y cu a pone cu cierto hendenan no por a bin na remarca pa bira minister bou di e gobernacion actual. Partido AVP ta di pensamento cu un persona cu ta gosa di e integridad cu pueblo ta spera di un di su mandatarionan, cu e ley ey mester ta bon regla. Pa e motibo ey, e producto di ley cu nan a presenta dialuna no tabata completo. Un amienda tabata locual cu AVP a presenta cu punto di cambio pa derecha esaki pero no a conta cu sosten y pa e motibo aki no por a sostene un ley cu no ta completo.
Importancia di un ley adecua
Ley di screening tin di fungi como herment pa yuda tene nos gobierno integro. Y e no ta para su so, den pasado y awe ainda, tin investigacionnan tumando luga contra ministernan of ex ministernan. E ley aki unico bentaha cu e lo a trece lo tabata e screening prome cu bira minister.
Screening prome cu bira minister ta existente caba.
Na momento cu husticia apunta algo robes y di investiga, nan ta funcionando corectamente caba. P’esey e pensamento cu si e ley lo a pasa, cu ahustacion di e amiendanan cu a presenta, lo a evalua e gobierno actual y lo a pone un paro na “friends & family”.
Candelaria ta remarca cu si traha hunto pa yega na un producto di ley cu ta beneficia tur hende, e ley por a pasa unanimamente. Partido AVP ta para pa integridad, husticia, y ta Marlon Sneek a inicia y cana e caminda pa e ley aki. Integridad den gobernacion ta algo cu comunidad ta pidi pe y ta nan trabou pa garantisa esaki.
