Cu aumento di 50% di e tarifa di grondbelasting pa propiedadnan comercial  cost of doing business ta sigui aumenta na Aruba. Hopi propiedad comercial tin un balor cu ta surpasa 750 mil florin, esakinan lo conoce un aumento di grondbelasting di riba 2000 mil florin. E aumento di e ‘cost of doing business’ aki ta traduci su mes den prijsnan mas halto pa producto y servicio cu e consumidor mester paga. E peso di e medidanan riba lomba di ciudadano y comerciantenan ta 20 biaha mas hopi cu e compensacion di reduccion di inkomstenbelasting cu Gobierno a presenta. Gobierno ta aumenta su entradanan bou pretexto di un crisis financiero. Realidad ta cu gastonan di e Gobierno actual ta sigui aumenta, segun CAFT, y no tin miras pa wordo reduci. E deasroyo aki no por wordo atribui na Gobierno anterior.

Ni maske cuanto biaha nos a alerta Gobierno durante tratamento di e ley di reforma fiscal cu e prome fase ta resulta den un aumento di impuesto desproporcional; cu lo a afecta nos profesionalnan, mamanan soltero, pensionadonan y comerciantenan; nan a wordo bari for di mesa. Propiedadnan comercial a conoce un aumento como cu a aumenta e tarifa di cuater promil pa seis promil. Aki atrobe Gobierno ta sali for di e punto di bista robes caminda gobierno ta pensa c’un propiedad ta algo cu e hende ta consumi. E propiedad no ta un servicio, e no ta un producto pero algo statico, un inversion cu e hende a haci pues e hecho cu gobierno ta hisa e peso riba propiedanan comercial, ta haci cu e ‘cost of doing business’ tambe ta bay subi. 

Na momento cu ta  haya aumentonan drastico asina manera un aumento di 40% di grondbelasting, sin un overgangsregeling, e ta pisa riba e gastonan di operacion di e empresa. Si un persona tin un propiedad ta huur, e ta wordo considera un comerciante. E aumento di impuesto ta traduci su mes den un huur mas halto, prijs mas halto pa servicio  y ta traduci su mes na prijs mas halto  cu e consumidor mester bay paga. Como consecuencia, esnan di mas vulnerable to carga e peso mas grandi. 

Tin tambe casonan di un persona cu tin mas c’un propiedad, caminda nan a wordo suma na otro y ta surpasa hopi liher e un balor total di 750 mil florin cu tambe lo conoce un aumento di a tarifa di cuatro promil pa seis peomil. Aki Gobierno ta asumi cu pasobra un persona tin mas propiedad riba su nomber, e lo por tin mas entrada. E hende por a hereda un propiedadnan cu awor ta haya nan mes confrona c’un grondbelasting hopi mas halto.

Fraccion di AVP na varios ocasion a trece dilanti cu e reforma fiscal en realidad no ta un reforma fiscal   riba su mes ya cu esaki ta djis un aumento di impuesto den e prome fase aki, e ta perhudica grandemente e clase media, e ta perhudica e profesionalnan, perhudica empresanan mediano y chikito, pues esun cu a traha su cas of negoshi cu bo propio esfuersonan, a inverti den dje, a haci mehoracionnan na bo propiedad, bo ta wordo penalisa aworaki. E ta afecta e “do’ers” nan di nos sociedad, pero tambe esun di mas vulnerabel cu lo haya e cuenta di e aumento di cost of doing business como e efecto negativo di e falta di transparencia di prijsnan.

Pues gobierno di un banda ta presenta un maneho financiero, pero e medidanan aki siguramente ta stroba opa por cumpli cu e metanan aki, stroba pa logra un crecemento economico .