CFT ta confirma cu gabinete Wever Croes lo ranca 111 miyon for di pueblo atrobe

 In AVP

Durante di campaña electoral gabinete Wever Croes a sigura pueblo cu nan lo drecha e situacion financiero di gobierno y cu pueblo mester confia e gobierno aki “sin miedo” ya cu lo no tuma ningun medida contra pueblo.

Parlamentario Michael Lampe di fraccion di AVP ta mustra cu mientras tanto dos aña despues cu gabinete Wever Croes ta gobernando e pais, pueblo a wordo engaña formalmente ya cu ni algun luna den gobierno, a introduci un serie di medida contra pueblo caminda a saca 250 miyon pa financia maneho di e gobierno aki.

“Pueblo a wordo conta  cantidad di storia, entre otro a papia y insisti cu e medidanan aki lo ta pa atende cu e asina yama mega debe pero cu awor ta bin resulta cu simplemente esaki no ta corecto y e miyones extra aki cu a ranca for di cartera di  pueblo, tabata pa cubri financiamento caminda mester a cumpli cu sponsornan di partidonan den gobierno y cantidad di hende di partidonan cu a wordo emplea.

Diabierna ultimo CFT a informa pa medio di un comunicado di prensa, cu den presupuesto 2020 tin un suma di 111 miyon florin cu ta loke Gabinete Wever Croes a presenta como “inkomstenverhoging” cu  di e forma aki lo cumpli cu protocol di 2018 pa logra un surplus di 0.6% riba presupuesto.

Un logro sumamente tristo nos por bisa ya cu mientras ainda e gobierno aki no a percura pa ningun proyecto wordo ehecuta,  pueblo ta sigui wordo perhudica pa un gobierno cu no tin vision di loke e tin cu haci pa alivia e presion riba pueblo y e sector comercial.

Loke a resalta un biaha mas den e comunicado di prensa di CFT ta e hecho c’un biaha mas ta wordo mustra cu gabinete Wever Croes no a logra ningun momento na reduci gastonan di gobierno, gastonan di personal cu ta sigui subi pa di tres aña sigui.

Algo cu Prome Minister Evelyn Wever Croes a priminti cu su gobierno lo haci pero nan a haci net lo contrario y  awor den presupuesto 2020 cu ainda no a yega Parlamento, CFT ta mustra cu ainda gobierno tin cu introduci e medidanan aki pa asina por cumpli cu e presupuesto aki.

Mientras cu e lema di principalmente partido MEP y Prome Minister tabata cu pueblo por confia e gobierno aki di lo soluciona e situacion financiero y cu pueblo no mester ta ‘sin miedo,’ awor ta resulta cu pueblo mester wanta duro, ya cu loke ta na caminda ta otro pakete di medidanan caminda gobierno mester di 111 miyon florin.

CFT a bolbe confirma cu reduccion di gastonan di gobierno ta necesario, cu esaki ta di vital importancia si kier logra un finansa responsabel y duradero pero awor ta resulta cu tur esaki ta pueblo lo tin cu carga e peso grandi aki.

Mey mey di tur e situacion aki ta bolbe resalta e hecho cu gastonan di gobierno entre otro tin di haber cu gasto di personal, caminda ya caba CFT a mustra na varios ocasion cu gasto di personal ta sigui aumenta cu miyones.

Gastonan cu tin di haber di e hecho cu gobierno ta sigui tuma simpatisantenan den servicio di gobierno y ta sigui cumpli cu sponsornan, sin tuma pueblo na consideracion.

E falta di vision aki, e falta di insinceridad aki cu pueblo a bin ta e tradicion di e actual gobiero camidna nunca gabinete di Prome Minister Evelyn Wever Croes a lora di cumpli cu promesanan di entre otro reduccion di prijs di gasolin, reduccion di prijs di awa y coriente, reduccion di gasto di biahamento di ministernan, aumento di onderstand, reduccion di edad di pensioen, amento di minimumloon, mustrando un biaha mas cu medidanan tuma nunca tabata pa yuda pueblo.

Drentando den ultimo dianan di luna di februari, pues seis luna atrasa cu presupuesto mester a yega Parlamento, tin cu constata cu ainda esaki no ta e caso y e anticipacion ta grandi pa mira cuanto abuso mas gobierno lo bay impone riba pueblo, creando mas problema financiero pa casnan di famia rond Aruba.

E lema cu partido MEP a usa den campaña ta resulta awor cu pueblo mester tin hopi miedo pa loke ta na caminda,” Parlamentario Michael Lampe a declara.

Recommended Posts
Pregunta?

Manda nos un e-mail of message nos via Facebook. Danki pa e sosten.

Not readable? Change text. captcha txt

Start typing and press Enter to search