| Durante conferencia di prensa di fraccion di AVP parlamentario Mervin Wyatt-Ras a elabora encuanto casonan di abuso sexual di menor cu ta keda halto y ta sigui crece. El a menciona dos caso cu a ser trata den e dianan aki den corte. Un di nan ta un omo cu a abusa di su subrinanan y e otro ta e acompañante di un wela di dos menor cu a abusa di nan na momento cu nan tabata bao di su encargo pa yuda nan cu huiswerk. Un di e abusadornan a haya castigo di 30 luna di cual 14 luna so e lo “zit uit” of lo ta den detencion y lo sali den un luna y e otro hues a dicta 6 anja di cual e sentencia mester sali ainda dia 3 di juli. Akinan por mira cu e castigo pa loke ta trata abuso di mucha te ainda den nos pais ta hopi abou en comparacion cu e danjo cu abuso ta haci nos menornan. Ora un mucha wordo abusa sexualmente, esaki ta touch su integridad. Un mucha victima di abuso ta haya e.o. miedo, rabia, odio y desconfiansa. Dado momento e ta haya problema den relacion y na skol.Tin mucha ta bai over na adiccion, usa alcohol of droga, ta haya nan mes den problema y cu dificultad pa sera relacionnan duradero. Otro ta haya problema psichiatrico. Pues e consecuencianan of efectonan ta asina grandi y devastador en comparacion cu e castigo cu e persona cu comete e actonan ta haya. Pa es motibo ey no tin cu concentra solamente ariba e castigo cu e abusador ta haya sino riba e guia y principal riba preveni cu abuso ta tuma lugar. Den e casonan menciona aki riba ambos abusador no a admiti e abuso y pues e chens di comete e actonan despues (recidive) ta grandi. Esey ta sumamente lamentabel, paso asina nan sali nan por sigui cu abuso. Gobierno a priminti, especialmente e Ministro Presidente, y no a cumpli. Ministro Presidente tabata critica gobierno anterior y ela bisa cu asina cu e drenta den gobierno de inmediato lo e cambia e ley cu ta regarda abuso di mucha. Segun e lo e cambia 5 regla di e ley y lo pasa e ley den 6 minuut. Sinembargo 3 anja cu e tin den gobernacion ainda e ley aki no a pasa den Parlamento. Segun Wyatt-Ras loke gobierno en especial ministro presidente a priminti mester cumpli cun’e. Wyatt-Ras ta cuestiona alavez cu e minister di Asuntonan Social tambe ta hopi keto. E minister aki a bin parlamento ora e 2 mucha pa motibo di abuso sexual, maltrato y uso di marihuana a perde nan bida. Segun e minister aki gobierno anterior no a haci nada pa soluciona e problematica di abuso di mucha y cu e si ta bai zorg cu no lo bai tin abuso di mucha mas. A declara cu Aruba ta den un crisis social. E minister a presenta un plan pa atende cu e area social y nos fraccion a sostene e plan aki paso nos semper a para na defensa di esnan vulnerable den nos comunicad. E plan aki ta ensera 36.8 miyon florin. Sinembargo por nota cu e cantidad di casonan ta sigui crece. Enbes di bin cu programanan preventivo por tuma nota cu gobierno ta djies haci propaganda pa e logo y pa e nomber di crisisplan. Ademas instancianan no ta hayando e sumanan priminti paso nan mester cumpli cu un cantidad di criterianan. Propaganda pa djies un nomber no tin efecto. Pueblo ta mas beneficia cu guia y programanan di prevencion, entre otro cu por laga muchanan mes papia cu otro y asina comparti informacion relevante con pa actua y defende nan mes of otro tipo di programanan informativo/educativo. Aunke gobierno anterior a haci hopi pa guia y prevencion, mientras cu gobiernonan anterior tambe a duna nan aporte na e problematica di abuso tog e casonan ta sigui aumenta. Pero awor si e minister no ta bin padilanti pa duna comentario. Hasta e ta bai corta den instancianan social. Wyatt-Ras ta lamenta esaki. E ta referi na un carta di fundacion Ambiente Feliz den cual ta pidi mayornan y/of sernan keri di nan clientenan pa aporta cu 80 florin pa luna pa opvang di e clientenan en bista cu gobierno lo a corta 12.6% den e subsidio cu ta ser otorga na e instancia menciona. Esaki ta un medida dirigi riba e instancianan cu ta duna ayudo social mientras no ta informa nos pueblo ni Parlamento di esaki. Wyatt-Ras no por kere esaki y ta bai busca mas informacion al respecto. Durante e ronda di preguntanan Wyatt-Ras a contesta cu na varios ocasion a cambia nos Codigo Penal pa aumenta castigo pa delitonan moral. Wyatt-Ras mes tambe a yega di traha como iniciador na cambio di ley. Tambe na anja 2013-2014 a modernisa nos Codigo Penal y aki tambe a trata e asunto di castigonan pa delito moral. Pero ta keda na hueznan pa nan duna e castigo. Apesar cu e castigo maximo pa diferente delito a subi ta keda cu abusadornan ta haya castigo relativamente abou. Den pasado Wyatt-Ras y coleganan di Parlamemento a sinta cu OM pa delibera encuanto castigonan cu ta ser duna y encuanto straf minimo y corte ta mantene su opinion cu Hueznan mester tin libertad pa dicidi encuanto castigo pa delitonan. |
