Caos den gobernacion a extende pa caos den parlamento

 In AVP

Un  gobierno cu no tin vision pa goberna, cu no tin nocion kico e tin cu haci pa saca e pais dilanti, ta crea caos y na luga cu pueblo a mira e lista di promesa a wordo priminti  pa gabinete Wever Croes wordo ehecuta, ningun a wordo realisa, líder di fraccion di AVP, sr Marlon Sneek a  mustra.

Caos cu a cuminsa for di ariba te cu abou ya cu ora cu Aruba tin un lider di gobierno cu no tin idea di kico e tin cu haci, e situacion ta bira hopi serio y esaki a keda demostra tambe diaranson ultimo den Parlamento.

“E liña negativo di gobernacion cu nos pueblo a conoce den ultimo 12 luna, lo bay sigui pa algun tempo mas riba ora cu nos mira prome minister Evelyne Wever Croes, haci declaracionnan cu ta confirma cu e no tin nocion di kico su gobierno tin cu haci pa atende cu interes di nos pais.

Na momento cu scucha declaracionnan den cual prome minister ta confirma cu e no tin idea di kico su minister di finansa ta haciendo pa reduccion di 12 miyon pa loke ta gasto di personal den presupuesto supletorio di 2018, ta muesta di un falta di seriedad pero mas cu tur cos, un falta di capacidad.

No solamente ta su persona mes ta declara esaki na prensa, pero na mes momento Evelyne Wever Croes ta bira confirma e situacion economico precario cu e pais ta aden, ora cu e declara cu en berdad e pais ta den recesion.

Despues cu rapport di Banco Central pa luna di october 2018 a bira conoci, por a nota cu e pais ta den un recesion, caminda den apenas 12 luna di tempo, gabinete Wever Croes a percura pa un falta di confiansa total den economia di nos pais pa falta di vision di su gobierno.

Tabata di spera manera semper cu prome minister Wever Croes lo no a asumi su responsabilidad y  bisa pueblo e berdad, pero si e tin e curashi di declara cu e situacion di recesion aki su gobierno a bin haya esaki.

Un expresion cu ta bolbe confirma su falta di nocion di kico e tin cu haci y kico e ta papia di dje, ya cu e rapport di Banco Central ta mustra bon cla cu e outlook economico a cay for di 2.3% na 2017 cu  su gobierno a hereda y e pronostico di Banco Central ta mustra cu esaki a cay te na         -0.5% cu  ta   hinca e pais den un recesion.

Ta mesun prome minister aki a priminti pueblo solucion pa e situacion financiero di e pais sin cu e lo tuma medida pero manera cu el a sinta, el a bay over na ranca placa for di den cartera di pueblo.

Evelyn Wever Croes tambe a declara na prensa cu su gobierno no a duna mucho atencion na e desaroyo economico pero mas tanto a dirigi su mes pa atende cu e situacion financiero pero awor cu e falta di atencion aki ta produci un recesion, direpiente esaki ta algo cu su gobierno a hereda mientras cu rapportnan di Banco Central ta papia totalmente un otro cos.

Ora un prome minister mes a crea asina hopi caos den gobernacion di nos pais, ta mas cu claro cu su marionetanan den parlamento tambe ta sigui su ehempel, ta comete locuranan innecesario cu na final di cuenta lo bay cay riba cuenta di pueblo.

Diaranson e caos financiero cu e gobierno aki a crea a bira un tiki mas grandi ora c’un grupo di parlamentario cu ta sostene e gobierno, no tabatin nocion di kico nan ta haciendo, con e proceso ta hinca den otro pa loke ta tratamento di cuenta anual 2016 y buscando pa hunga weganan politico sin sentido, ta dicidi di duna minister di finansa Xioamra Ruiz Maduro mas trabou ora cu nan a a dicidi di vota contra aprobacion di e cuenta anual aki.

Ta politiconan cu supuestamente mester a bira e era nobo den parlamento pero simplemente no ta na altura mes kico nan funcion ta encera y hasta ta papia locura por completo ora nan bin na palabra.

Un parlamentario cu su lider a forma parti di e gobierno y presupuesto di 2016 y tabatin e curashi  di cataloga e cuenta anual aki como un fechoria, cu pa colmo ta conta cu firma di su actual lider di partido.

Pa ilustra ainda mes e tiramento di para aki den parlamento, e parlamentario aki mes tabata den servicio na oficina di un minister di e gobierno  di 2016, pues e ta cuestiona su propio pensamento y vision cu el a sostene te cu 2017 pero ta esaki ta e caos cu tin den gobernacion di nos pais y cu a pasa manera un virus pa fraccionnan di gobierno den parlamento,” Parlamentario Marlon Sneek a declara.

Recommended Posts
Pregunta?

Manda nos un e-mail of message nos via Facebook. Danki pa e sosten.

Not readable? Change text. captcha txt

Start typing and press Enter to search