Cambionan di Trai Merdia no ta cla y ta trece incertidumbre

 In AVP

Durante conferencia di prensa di fraccion di AVP, parlamentario drs. Mervin Wyatt-Ras a trece padilanti cu Gabinete Wever-Croes y Minister di Enseñanza Rudy Lampe kier implementa cambionan pa loke ta trata Trai Merdia. Wyatt-Ras ta haya cu ta lamentabel cu no ta envolvi trahadornan ni mayornan den e proceso, locual ta trece cun’e incertidumbre. A manda trahadornan un carta cu nan lo por sigui studia y lo por ser ubica den un otro puesto den enseñanza mes segun diferente trajecto di estudio. For di e carta por deduci cu lo kier elimina Trai Merdia pero e minister mes no ta cla over di e asunto.Trai Merdia ta un entidad cu a ser lanta mas di 20 aña pasa cu e meta pa duna acohida na muchanan cu ta bishita skol basico. Aki nan por haya guia di huiswerk, nan por participa na diferente weganan, ta desaroya creatividad y haya entretenimento dor di cual nan mayornan en especial esunnan cu ta traha por ta mas trankil cu nan yiu no ta keda so na cas of ta bai riba caya. Tin 40 lidee y mas di mil mucha. Wyatt-Ras mes tabatin bon experencia cu Trai Merdia tempo e tabata haci su trabou como orthopedagoog guiando famia y mayornan cu tin biaha no tin mucho medio financiero ni tampoco no por yuda nan yiunan cu huiswerk. Wyatt-Ras a yega di referi varios mayor pa pone nan yiu na Trai Merdia y a mira adelanto den nan estudio y dominio di vak te cu e muchanan  a bai over. Pues e yudansa cu e muchanan ta ricibi pa traha nan huiswerk sigur ta yuda. Aki por constata cu e valor di Trai Merdia ta grandi pa desaroyo di e muchanan. Wyatt-Ras no por kere cu e minister di Ensenanza por pensa cu den un dos tres e por hinca den su cabez cu e por bin cu cambio drastico y kita tur hende, anto cu esaki por ta succesful. Wyatt-Ras ta kere cu participacion di e lidernan, dirigentenan y maestronan ta necesario. Rudy Lampe kier introduci oranan mas largo di skol. Esaki ta un vision cu den pasado  na varios ocasion a papia di dje mi den parlamento, pero promer cu bin cu algo asina mester tin un plan bon prepara. Parlamento mo a wak niun plan. E trahadornan mester wordo envolvi.E ta full un proceso y no djies kita algo y pone otro, mescos cu a haci cu MDC, bin bulldoze. Mescos tambe cu digitalisacion cu mesun minister ta bisa esunnan cu no ta bai mee ta ser delete. Cu otro palabra si bo no ta di acuerdo bo ta ser elimina. Cosnan asina bo no ta verwacht di un minister di enseñanza, ex-pastoor. A base di e preocupacion di trahadornan di Trai Merdia, Wyatt-Ras a haci diferente pregunta durante tratamento di presupuesto di aña 2019. El a ricibi e preguntanan for di trahadornan y minister Lampe no a contesta dicho preguntanan. Al contrario e minister aki a bagatalisa loke Wyatt-Ras a trece padilanti. Te hasta e parlamentario a bolbe haci e preguntanan den tweede ronde y atrobe e no a ricibi contesta ariba nan. Claramente por nota cu e minister no ta transparente. E no kier duna participacion den e proceso aki, locual ta inacceptable. Ta di spera cu e por recapacita. Tin trahadornan cu a aserca parlamento cu kier papia di e asunto. Pesey mes Wyatt-Ras kier a trece su preocupacuon padilanti y ta urgi minister pa duna cara y splica, ken ta envolvi, ki tempo y con e ta bai haci esaki? Ademas mayornan mester ser informa paso nan ta den incertidumbre, encuanto e acohida di nan yiu(nan).

Recommended Posts
Pregunta?

Manda nos un e-mail of message nos via Facebook. Danki pa e sosten.

Not readable? Change text. captcha txt

Start typing and press Enter to search