Cambionan den enseñansa sin dialogo ta inacceptabel

 In AVP

Segun Mervin Wyatt-Ras durante conferencia di prensa di fraccion tin hopi cambio cu minister di ensenjansa ta anunciando y e cambionan aki ta “kort door de bocht” y sin dialogo cu maestonan/docentenan. 
Wyatt-Ras a trece esaki padilanti den un reunion di comision. Lamentablemente un reunion asina no ta publico. Segun Wyatt-Ras a cuestiona minister encuanto cambionan cu e kier bin cun’e. E parlamentario a ser aserca dor di diferente persona di veld, tanto maestronan como hoofdnan di skol y mayornan cu ta preocupa pasobra gobierno no ta dialoga ni comunica cu “veld”. 
Lo bin cambionan pa loke ta trata e.o. organisacion, ideologia,filosofia y formanan di traha. Esakinan lo tin nan consecuencia ariba resultadonan di kico nos muchanan por realisa y kico nan por logra. Esey ta preocupa nos fraccion inmensamente, segun Wyatt-Ras. Pa loke ta trata e cambionan di organisacion minister kier fuseer diferente skol cu diferente filosofia. Por ehempel Pieterboer school lo bai hunto cu skol protestant Graf van Zinzendorf bou auspicio di SPCOA, Abraham de Veerschool lo bai hunto cu John Wesley bou SPCOA, de Schakel hunto cu Colegio Arubano tambe bou un stichting nobo. E diferente filosofianan no ta cuadra cu otro. Pakico? Pasobra skolnan publico a wordo netamente lanta pa  haci e.o. posibel cu tur mucha por haya ensenjansa. Esey ta un derecho ancra den nos constitucion y segun tratadonan internacional. Dor di filosofia of criteria di cierto skolnansen un fundacion muchanan sa wordo kita den pasado y por a plaats e muchanan aki bek na skol publico. Esey ta un gran ventaha di skolnan publico. Minister ke cambio di dia pa anochi, sin consulta cu esnan cu ta traha den e field y esaki ta inacceptable. Banda di esey minister kier introduci sinjamento ariba distancia. Pues muchanan no mester ta continuamente na skol y por sigui les na/via cas.  E kier introduci’e e.o. a base di Covid. 
P.e. muchanan di basis lo haya les 2 dia den siman na skol y 3 dia na cas. Den e caso cu tin otro rumannan e muchanan cu no tin medionan audiovisual na cas, cu tin cu comparti computer cu otro, lo enfrenta dificultad si nan lesnan na cas ta mesun dia y ora. Esey ta si nan tin computer. Si nan no tin computer, nan no por sigui skol na distancia. Tin famia cu no tin ni internet. Pa e mayornan cu un djies lo bai traha lo ta dificil paso nan yiunan lo keda nan so na cas y lo no por guia nan cu skol via distancia. Banda di esey tambe tin e mayornan cu no tin e conocimento pa yuda nan yui cu les. No paso nan no kier pero paso nan no por. Un otro situacion ta muchanan cu ta victima di violencia na cas. Pa e muchanan aki hopi biaha skol ta un lugar “veilig”, un lugar sigur unda nan por papia cu nan maestro. Na cas nan no tin esey. Nan sigur lo wordo perhudica. Parlamento a caba di aproba e presupuesto di crisis plan social cu ta inverti 18.6 miyon florin pa proteccion di nos muchanan. E cambionan aki di ensenjansa riba distancia y na cas lo tin consecuencianan pa e muchanan aki. Pa e hecho cu lo kita werksters foi trabou, kendenan ta esencial na e momentonan aki pa cu limpiesa di e skolnan cu lo habri, tin cu expresa palabranan di disgusto. 
Ta di importancia pa skolnan cumpli cu condicionnan importante regardando hygiene, segun protocolan stipula dor di Departamento di Volksgezondheid. Wyatt-Ras tambe a haci minister preguntanan encuanto e protocolnan aki. Muchanan lo mester laba nan man continuamente, mester tin wasbaknan cu jabon, wc-nan den bon condicion, mester awa sea den watercooler of botternan awa pa mas hygiena, handsanitizers etc.  Di tur esakinan por a tuma nota cu maestronan no a ser informa. A ser expresa caba cu e hygiena mester ser regla promer cu skol por cuminsa. Pa asina evita cu por haya un brote di COVID 19 na skol. Esaki en especial ora portanan habri pa bishitantenan di exterior. E diferente trahadonan cu nan futuro no ta concoci ainda ta invallers, klasseassistenten, prismaleerkrachten y trahadornan social cu ta cai bou DPS. Pues tin diferente inseguridad y preocupacion cu no ta wordo discuti cu e maestronan. Wyatt-Ras y su fraccion ta haya cu miembronan di e fraccionnan cu ta sostene gobierno, cu a para fuerte contra privatisacion di nos ensenjansa, awor aki no ta papiando, no ta bisando nada y ta lagando minister haci kico e kier.
Segun Wyatt-Ras na e momento aki ta hopi importante pa nos tur para fuerte pasobra den Parlamento ta e lugar unda nos por cuestiona gobierno pero nos fraccion a haci 9 intento pa haya un reunion publico cu minister. Minister te ainda no a bin parlamento pa e reunion aki. Presidente di Parlamento no ta yama e reunion, mientras cu niun miembro di coalicion ta cuestiona esey. Wyatt-Ras ta kere cu na e momento aki mester sinta na mesa. Pesey tambe e diferente maestronan y sindicatonan tambe ta bai subi caya pa expresa nan preocupacion. Wyatt-Ras ta spera cu e ministro Presidente no core bisa cu e ta bai cambia tur cos. Esey por a ripara cu ta e modus operandi den e gobierno aki. Niun hende no ta papia cu otro, no tin synchronisacion, nan no ta traha hunto. Nan ta pega un candela aki, bolbe pega un otro candela otro caminda y e ministro presidente ta core bin bisa e ta zgn bai soluciona e asunto. Nos ensenjansa ta esencial pa cada un di nos muchanan pa supera nan mes den nos comunidad. Pa nos por yega na un nivel halto y pa nos muchanan por haya oportunidad di bai studia afo ta di importancia bon calidad di ensenjansa. Cu e cambionan aki sin ta bon planea na un dado momento lo perhudica nos muchanan y nos futuro generacion. 
Maestronan, mayornan y nos fraccion no ta acepta e proceder aki. Nos lo para hunto cu nan pa garantisa cu nos ensenjansa ta duradero y pa futuro.

Recommended Posts
Pregunta?

Manda nos un e-mail of message nos via Facebook. Danki pa e sosten.

Not readable? Change text. captcha txt

Start typing and press Enter to search