Camara di Comercio y Banco Central ta confirma falta di vision pa crecemento economico

 In AVP

Tanto Banco Central como Camara di Comercio a emiti comunicadonan di prensa den cual ta bolbe confirma cu economia di pais Aruba ta den un recesion cu lo bay bira ainda mas serio den proximo lunanan.

Lider di fraccion di AVP, sr Marlon Sneek a mustra cu e informacionnan aki cu a wordo publica dialuna ultimo den medionan di comunicacion, ta bolbe confirma cu Aruba ta den un recesion economico y esaki no ta algo cu ta sorprende ningun hende, ya cu e ta algo cu prome minister Evelyne Wever Croes a anuncia aña pasa caba.

“Ta e propio prome minister aki a bay den un conferencia di prensa aña pasa y declara cu “gobierno a concentra mas pa soluciona e problema di retonan financiero di e pais, na luga di enfoca riba crecemento di economia.”

Ningun otro hende a bisa esaki, ta Evelyne Wever Croes como prome minister a haci e declaracion aki y awe tur hende por mira e desaster cu su gobierno a causa pa e falta di vision pa atende cu e desaroyo economico di e pais, cu lo tin su consecuencianan serio pa henter e pais.

Banco Central ya caba a bati alarma caba aña pasa den un di su rapportnan di 2018 confirmando cu economia di Aruba a drenta un recesion.

For di e publicacion aki te cu dia di awe gabinete MEPORRED no a reacciona, no a presenta ningun plan concreto pa cambia e situacion aki y e siman aki e mesun Banco Central y informacion suministra pa Camara di Comercio, ta papiando di un situacion alarmante y cu lo bay percura pa no solamente un inflacion increibel, pero caminda y porcentahe di desempleo lo bay ta aumenta y yega na e nivel cu mesun gobierno di MEP aki a lague na 2009.

Hendenan lo perde nan trabou y algun cu lo no perde nan trabou lo perde beneficionan cu nan tin pa algun aña caba pa asina sigura cu nan por keda na trabou mirando e situacion crea pa e gobierno aki.

Na momento cu scucha cu entre otro tin negoshinan ta cera porta pa falta di confiansa den economia di nos pais, cu ya no ta atractivo mas pa haci inversionnan, e ta bisa hopi di e vision di un gabinete Wever Croes cu tin  mas c’un aña gobernando sin un vision.

Varios luna atras prome minister a papia di diversificacion di turismo, di economia di conocemento, agricultura, di converti Aruba den un hub logistico pero te ainda no tin nada concreto a tuma luga cu e plan aki.

Evelyne Wever Croes a papia e tempo ey di motiva inversionistanan pero casi seis luna despues ta bisto segun e relato di Camara di Comercio y di Banco Central cu inversionistanan no tin mucho confiansa den e desaroyo economico bou gabinete Wever Croes.

No tin confiansa ya cu ningun hende sa kico e gobierno di coalicion aki kier bay haci  ya cu tur esfuerso ta di hunga bunita, percura pa famia y amigonan haya trabou, aumenta gasto di personal di gobierno den un forma increibel y percura pa sponsornan wordo recompensa pa nan sosten durante di campaña electoral.

E reforma fiscal cu gobierno di MEPPORRED a bulldoze den december ultimo, a pone e situacion bira ainda mas critico ya cu el a crea un situacion hopi delicado pa hopi compania local, sigur ora cu a impone asina hopi medida riba pueblo cu ta reduci e poder di compra den un forma cu pa hopi tempo consumidornan no a experencia.

E reforma fiscal lo bay tin su consecuencia economico formal caminda ya caba den algun negoshi a cuminsa reduci e cantidad di oranan di trahadonan loke atrobe ta pone cu e trahadonan aki lo no tin mucho placa pa gasta pero ta asuntonan c’un gobierno cu no tin vision mes di kico e tin cu haci, ta hinca henter pueblo den un skina asina dificil,” lider di fraccion di AVP, Marlon Sneek a declara.

Recommended Posts
Pregunta?

Manda nos un e-mail of message nos via Facebook. Danki pa e sosten.

Not readable? Change text. captcha txt

Start typing and press Enter to search