Presupuesto 2018 ta consisti di un aumento di 133 miyon na entrada: 28 miyon di e suma aki ta regarda aumento di BAZV y 42 for di e aumento di BBO. Ademas Gobierno ta conta cu 43 miyon adicional for di empresanan estatal. Esaki ta limita grandemente nan capacidad di inversion y pa baha gastonan di operacion cu lo por wordo traduci den un reduccion di tarifa di awa y coriente manera cu partidonan di coalicion a priminti durante campaña electoral.
Bisa cu e aumento di tarifa di impuesto ta pa paga gastonan di proyectonan di PPP y reduci debe no ta cuadra cu realidad, segun parlamentario mr. drs. Richard Arends, si compara e gastonan den realisacion preliminario di presupuesto 2017 y presupuesto 2018.
Aki por constata un aumento di 125 miyon di florin y e debe ta sigui subi den e añanan nos dilanti segun e cuadro financiero cu a ser presenta.
E ‘crisisheffing’ a resulta di ta un “coalitieheffing”, como cu e ta financia e maneho expansivo di e gabinete nobo. CAFT ta confirma e hecho aki, sobre todo gastonan di personal a aumenta 12 miyon florin compara cu aña pasa. No tin hustificacion pa e forma con gobierno di un banda ta papia di ‘crisis financiero’ y ta usa esaki como excusa pa aumenta BBO y BAZV, mientras cu na mes momento ta aumenta gastonan di gobieno di manera exsesivo compara cu realisacion di anja pasa.
“No tabatin ningun esfuerso sincero pa reduci e deficit,” asina Sr. Arends a declara. “Tampoco pa yega na e norma stipula di un surplus di 0.5% – segun ley di supervision financiero cu a wordo poni un banda – cu lo a hustifica un aumento di entrada pa caha di Gobierno.
Na inicio di e tratamento di presupuesto Gobierno a pretende di lo a reduci gasto, pero contrario na esaki sa di a aumenta esakinan via cinco nota di cambio” Na vispera di tratamento di e ley cu a regla e aumento di BBO y BAZV, fraccion di AVP a dirigi un carta pa presidente di Parlamento cu copia na tur sindicato y gremio comercial pa hiba reunionnan di consulta prome cu tratamento di e ley. Sinembargo no a ricibi reaccion di gremionan ni sindicatonan y finalmente e ley a wordo pasa sin consulta, sin dialogo, sin conseho, sin analisis cu tur consecuencia cu ya caba nos a cuminsa sinti pa e cartera di e ciudadano y pa empresanan chikito y mediano.
“Te dia di awe no tin acuerdo cu Hulanda riba e cuadro financiero nobo y e extension di supervision financierio pa e proximo añanan,” Sr. Arends a bisa. E la sigui splica cu e supervision cu CAft ta hasiendo aworaki no tin base legal. Recientemente el a dirigi un carta na minister di Finanzas duna aclareacion riba e reduccion di gastonan di personal cu 12 miyon di florin e aña aki ainda, como tambe e cuadro financiero nobo acorda cu Hulanda cu lo remplaza e FEM anteriormente presenta cu a wordo hala un banda. “Te dia di awe no a ricibi ningun reaccion di Gobierno pa cu esaki”
Enbes di atende y aclaria e preocupacionnan presenta, tanto gobierno como fraccionnan cu ta sostene gobierno a prefera di hinca mayoria di tempo den discusionnan politico cu no ta al caso y nos por mira resultado di e falta di seriedad y responsabilidad aki.
