fbpx
Edit Content

Duna nos Luz Berde

Danki na Bo sosten partido AVP por a sirbi Aruba durante añanan largo. Den periodo 2009-2017 nos a traha duro pa haci nos isla miho, mas bunita y mas solido. Nos a logra hopi. Pero tin hopi mas pa haci. E trabou cu nos a haci durante ultimo e periodo aki ainda ta visibel tur caminda: kilometernan di caminda a wordo construi y hopi mas a wordo reconstrui. Barionan y areanan publico cu tabata decai awe ta bunita y dushi pa biba y pasa tempo aden. E hospital nobo t’ey awor pa duna miho servicio na comercio y miho cuido na ciudadanonan. Scolnan cu tabata den mal estado a wordo reconstrui y a traha scolnan nobo. Cada un di e proyectonan aki a contribui na crea trabou y miho servicio. Nan ta embeyece nos pais y crea oportunidadnan nobo pa nos hendenan y nos economia.

Tuma contacto cu mi

Gobiernonan di Aruba y Hulanda a firma un protocol riba continuacion di e supervision financiero pa Aruba. Parlamentario pa AVP, Richard Arends, den un prome reaccion a bisa cu “e protocol aki ta contene elementonan cu na 2015 nos a tene explicitamente afo e tempo ey, pasobra nan tabata enpugna cu nos estado di derecho y nos regimen constitucional.” Den acuerdo di mei 2015 a palabra normanan obhetivo pa cu finanzas publico den cuadro di nos constitucion y Statuut, segun Arends, “y awe Gobierno a cera un protocol unda cu Hulanda y CAFT ta dicidi di ki manera ta yega e normanan y con Aruba ta aloca su fondonan”.

 

E protocol nobo ta bin cu reglanan adicional cu tin di haber directamente cu maneho y escogencianan politico. “Irespecto di e signatura politico, ta na cada Gobierno pa dicidi con fondonan publico ta wordo aloca y pa Parlamento duna autorisacion y aproba esaki,” Arends a splica. A base di e palabracionnan nobo, Parlamento por aproba un presupuesto cu ta cumpli cu e normanan stipula den LAFT, pero CAFT ainda por duna un recomendacion na Conseho di Minister di Reino con Aruba a logra e norma. “Esaki ta insolito: Ta pone Parlamento un banda, CAFT ta haya autoridad pa traha pafo di e cuadro legal y Conseho di Minister di Reino ta haya competencia caminda cu e no tin,” Arends a subraya.

 

Diabierna merdia fraccion di AVP a entrega un carta na Presidente di Parlamento pidiendo pa Prome Minister bin duna un splicacion di e protocol aki. Ora cu Gobierno ta bisa cu e ceramento di e protocol aki ta garantisa “trankilidad y confiansa”, Parlamentario Arends ta puntra su mes pa ken y di ki forma?

 

“Ta awor e presion riba e relacion entre Hulanda cu Aruba lo aumenta pasobra Hulanda lo dicidi di ki forma Aruba lo mester aloca su fondonan”. E protocol ta indica cu e FEM cu a ser entrega na februari 2018 ta forma parti integral di e acuerdo aki, hunto cu e plan di personal cu mester a yega na un reduccion di personal di 12 miyon e aña aki ainda.  “Minister di Finanzas no tin espacio pa cambia nada y entradanan incidental no por wordo uza pa cubri gastonan coriente,” Parlamentario Arends a splica.

 

E Parlamentario ta di opinion ta redefini nos constitucion y nos estado di derecho a base di un simpel protocol. “E acuerdo nobo aki ta practicamente ehecucion di un Rijkswet, manera tabata e caso cu Corsou y Sint Maarten, sin un restructuracion di debe y e posibilidad pa Hulanda por inscribi riba nos fiansanan cu un interes mas abou ta wordo hala ta aña 2021 hunto cu e begrotingskamer. Esaki no ta un muestra di confiansa”