fbpx
Edit Content

Duna nos Luz Berde

Danki na Bo sosten partido AVP por a sirbi Aruba durante añanan largo. Den periodo 2009-2017 nos a traha duro pa haci nos isla miho, mas bunita y mas solido. Nos a logra hopi. Pero tin hopi mas pa haci. E trabou cu nos a haci durante ultimo e periodo aki ainda ta visibel tur caminda: kilometernan di caminda a wordo construi y hopi mas a wordo reconstrui. Barionan y areanan publico cu tabata decai awe ta bunita y dushi pa biba y pasa tempo aden. E hospital nobo t’ey awor pa duna miho servicio na comercio y miho cuido na ciudadanonan. Scolnan cu tabata den mal estado a wordo reconstrui y a traha scolnan nobo. Cada un di e proyectonan aki a contribui na crea trabou y miho servicio. Nan ta embeyece nos pais y crea oportunidadnan nobo pa nos hendenan y nos economia.

Tuma contacto cu mi

 AVP a presenta alternativa durante reunion

Pa di dos biaha Parlamento a reuni cu Gobierno pa loke ta trata e condicionnan cu Hulanda ta pone pa Aruba por ricibi ayudo financiero. Fraccion di AVP ta lamenta cu e la wordo suspendi te cu proximo aviso pa motibo di ausencia di Prome Minister. Parlamentario mr. drs. Richard Arends, miembro di fraccion di AVP, a haci preguntanan specifico riba e base huridico cu a scoge pa e organo di reforma, como tambe e meta di e negociacionnan di ultimo luna y e instruccionnan cu Minister Plenipotenciario a haya pa e reunion di Conseho di Minister pa su mañan. 

“Nos fraccion no ta di acuerdo cu e base legal cu ta wordo uza pa institucion di e organo aki,” asina Richard Arends a declara. “Riba peticion di Prome Minister nos a presenta alternativa, pero nos no a haya reaccion durante di e reunion. Den todo caso nos a pidi pa Aruba informa Raad van State di su obhecionnan riba intencion di Conseho di Minister di Reino. Contrario na loke a asumi, tur pais ta liber di por manda un carta pa informa Raad van State di nan preocupacionnan.” Ademas tin e Ley di Reino di Resolucion di Disputa, e asina yama ‘geschillenregeling’, cu ya caba a pasa e legislador formal cual ta Tweede Kamer. Esaki ta duna oportunidad na Minister Plenipotenciario, den caso cu tin un desacuerdo den Conseho di Minister di Reino, pa pidi un consulta formal di Raad van State. Vice-premier Bikker a gradici Richard Arends pa e sugerencia.

Ta di lamenta cu e discusion eyfo – tambe door di Gobierno – ta wordo hiba comosifuera cu ta un disputa di placa versus perdida di autonomia; cu ta placa versus perdida di poder politico. “Mi no ta kere esey ta e caso, pasobra Gobierno y sector priva mester di e sosten financiero, pero e dilema ta mucho mas compleho,” Richard Arends a remarca.

“Fiansanan riba termino cortico ta mara na reformanan y medidadnan riba termino largo cu nos no por midi nan consecuencianan awor y no lo no por controla.” Arends ta consciente cu e discusion huridico ta un grupo chikito ta hib’e, pero fraccion di AVP ta di opinion cu nos estado di derecho y sigur e orden constitucional cu nos ta biba aden, mester wordo respeta. “Pa regla esaki mester cana e caminda corecto y esey ta loke fraccion di AVP ta para p’e”, Arends a bisa. “Aki mi no ta ni referi na e falta di consenso of representacion y otro aspectonan di procedura.”

“E base legal cu ta riba mesa no ta esun apropia: por regla cooperacion mutuo via otro articulonan di Statuut cu no ta presciribi cu e mester ta via Rijkswet. Un ehempel ta eLandsverordening Aruba Financieel Toezicht (LAFT) caminda ta delega cierto podernan limita na Conseho di Minister di Reino. Nunca tabata e intencion di e articulonan cu ta regla cooperacion mutuo den Statuut pa duna organonan di Hulanda (un zbo) bou maneho di un minister hulandes y ley hulandes (kaderwet zbo), status di ley or organo di Reino,” segun Richard Arends.

“Loke tin riba mesa awor aki ni sikiera ta otorga podernan na un instancia di Reino, pero completamente na instancianan Hulandes. Esaki no ta correcto. Te ainda nos no a tende kico e proposicion di Gobierno ta, pero entretanto Secretario di Estado Knops a informa Tweede Kamer cu e condicionnan riba mesa – e organo di reforma y e rijkswet pa supervision financiero pa Aruba – no ta negociabel. Keda tira culpa riba supuesto fayonan di CAFT of Gobierno anterior no ta yuda pa hiba un discusion substancia,” asina Richard Arends a termina bisando.