AVP a entrega keho pa enrikicemento personal y di famia

 In AVP

Dialuna merdia partido AVP a haci un denuncia contra di Prome Minister Evelyn Weer Croes caminda e lider di fraccion di AVP, sr Marlon Sneek a mustra cu nan partido tin hopi preocupacion di cierto desaroyonan cu ta tumando luga cu conocemento di e lider di MEP.

Segun declaracion di sr Sneek algun tempo pasa tambe un caso similar a tuma luga na Corsou caminda a entrega keho contra di Minister Martina caminda e mandatario aki tabata percura pa un compania den cual e tin ‘share’ den dje, tabata wordo beneficia dor di decisionnan di e minister aki.

“Den e caso aki Ministerio Publico di Corsou a mustra Minister Martina bon cla cu e lo no wordo persigui penalmente pero cu loke e tabata haciendo, no ta algo corecto.

Aki na Aruba nos ta mirando den mesun concepto en mesun tipo di movecion, e mesun tipo di strategia caminda nos a haya un parti di recibo cu ta duna indicacion riba un proceso igual.

Nos a ricibi algun ricibi caminda esakinan tabata solamente di e compania estatal Utilities NV y aki nos no ta papiando di NV Elmar y tampoco di WEB Aruba NV, ya cu e recibonan aki nos no a haya ainda.

Nos ta papiando di solamente di recibonan di 2018 y di cual tampoco nos a logra di haya tur y eynan ya nos ta papiando si un suma di alrededor di mei miyon florin cu e compania estatal, cual ta resorta bou di Prome Minister, ta duna trabou na un solo bufete di abogado.

E bufete aki no tabata haya trabou di asuntonan cu ta regarda Untilities y asina cu gobierno a cambia, e bufete aki a bira e bufete cu ta trata casonan cu ta regarad Utilities y e compania aki a resorta directamente bou di Minister Presidente Evelyn Wever Croes.

Mi ta kere cu si bo ta corecto, Prome Minister mester a actua y bisa e bufete aki cu lo ta miho nan bay traha pa e otro shete Ministernan di su gabinete y ministerionan pa cual su persona ta responsabel, e lo no kier pa bufete di su tata haci esaki, ya cu Evelyn tambe ta doño di e bufete aki.

Evelyn tambe ta haya su parti, su dividendonan na fin di aña y e sharenan ta crece den e maniobra aki cu Prome Minister aki ta ehecutando y asina e mes ta percura pa su persona financieramente bay dilanti.

Nos ta kere cu esaki no ta corecto y ta algo cu nos a mustra riba dje na varios ocasion, hasta nos a haci preguntanan pero Minister Presidente a bisa cu e no tin nada di haci den e cosnan aki pero en realidad e persona cu ta Richard Eman, kende ta representa Land Aruba den e compania aki, a wordo nombra pa Prome Minister.

Pues sr Eman ta sigui maneho di Minister responsabel y nos a entrega documentonan tambe, cartanan caminda cu ta confirma cu Prome Minister tabata parti di combersacionnan hiba riba e e punto aki tambe.

Pa nos di AVP esaki ta hopi preocupante pasobra Minister Presidente no ta informando Parlamento manera mester ta y den e caso aki nos ta kere cu Ministerio Publico tin trabou pa haci y nos ta spera cu nan lo haci e trabou aki tambe y nos lo sigui vigila pa mira ki dia nos ta bay tende riba e procesonan cu mester bay cuminsa pa loke ta e mas di 120 pagina cu nos a entrega dialuna.

No ta un pida papel nos a entrega na Ministerio Publico, ta un bulto di 120 copia cu ta mustra riba diferente transaccionnan, cu diferente decisionnan riba e punto aki y mi ta kere cu ta importante pa Ministerio Publico haci su trabou.

Esaki ta un momento pa Ministerio Publico mustra cu nan ta realmente transparente y ta un momento hopi bon pa demostra cu nan tin transparencia den nan forma di procede y cu no ta solamente ora cu tin kehonan contra un integrante di AVP ta e unico momento cu nan ta coy e dossier aki y bay busca manera di haci algo cu nan pero awor nan tin un dossier y mi ta spera cu nan haci algo cune.

Nos lo bay bishita Ministerio Publico bek pa mira ki dia nos lo haya contesta riba e asunto aki caminda mi ta kere cu nos mester haya un contesta caminda nos a entrega mas di 120 pagina caminda ta di gran importancia pa nan revisa esaki y haci e trabou cu mester wordo haci cu e documentonan aki.

Nos kier duna nan e beneficio di duda y awor nos ta bay bira si berdaderamente tin transparencia dor di tuma e dossier aki y bay haci trabou di djem ya cu den pasado nos a mira con structuralmente integrantenan di MEP a bin sinta na Ministerio Publico, bisa cu nan a wordo informa pa MP cu nan no tin suficiente rechercheur.

Aki integrantenan di MEP a sigura Ministerio Publico cu nan lo bay pone den presupuesto suficiente fondo pa asina por tin rechercheur, pues awe tin suficiente rechercheur y nos ta spera cu nan haci trabou di e keho aki y nos haya resultado tambe y contesta riba e denucnia cu nos a entrega aki,” lider di fraccion di AVP, Marlon Sneek a declara.

Recommended Posts
Pregunta?

Manda nos un e-mail of message nos via Facebook. Danki pa e sosten.

Not readable? Change text. captcha txt

Start typing and press Enter to search