E situacion di ciudadanonan Venezolano cu ta bin pidi asilo na Aruba, ta sigui escala y miembro di fraccion di AVP, sr Benny Sevinger, a mustra cu mientras cu e situacion aki ta sigui crece y bira un problema mas grandi, Aruba ta conta c’un gobierno cu ta gobernando sin pia ni cabes.
Señor Sevinger a mustra cu practicamente tur dia por scucha miembronan di e actual gabinete, declarando cosnan cu pa colmo ta contradeci otro y simplemente no tin nocion di kico nan tin cu haci y con nan tin cu atende cu esaki.
Aki e ex Minister di Gabinete Mike Eman a señala cu ta mesun ministernan cu den pasado a converti henter e situacion aki den un campaña politico y kier a saba probecho di un plan cu e gobierno anterior a hinca den otro por si acaso e situacion presenta, awor no tin ni vision y ni plan, corda solucion pa atende cu e desaroyonan aki.
“No solamente e situacion na Venezuela ta sigui escala pero e situacion na Aruba tambe ta sigui escala y nos a mira un gobierno cu di berdad ta gobernando sin pia ni cabes ya cu no tin claridad, no tin transparencia, ni pa Parlamento y mucho menos pa pueblo di Aruba.
Situacion cu tin na Venezuela no ta un asunto cu a presenta awor pero ta un situacion for di tempo cu nos tabata den gobierno, e situacion aki tabata reinando y a forma un comision e tempo ey di tur expertonan di Aruba, di departamentonan di gobierno, pa bay wak con ta bay atende cu e situacion di Venezuela.
Di e forma ey a presenta deferente scenario di kico lo por pasa na Venezuela y con gobierno tin cu prepara su mes pa e desaroyonan aki, si algo sosode, kico por sosode, di cuanto hende nos ta papia di dje cu por bin Aruba etc y asina ey a traha un plan cu constantemente tabata wordo minitoria dor di e departamentonan y e comision di gobierno.
Tur instancia tabata forma parti di esaki manera Buitenlandse Betrekking, DIMAS, DOW, Ministerio Publico, Cuerpo Policial, Inmigracion, Departamento Social, Rode Kruis, pa traha un plan a base di kico por pasa y a crea diferente scenario riba esaki.
DOW e tempo ey a pone den e plan aki diferente localidad cu si tin un crisis grandi cu hendenan ta huy for di Venezuela y entre otro ta bin Aruba, unda lo por acomoda nan, cuanto hende Aruba lo por acomoda, con a bay duna nan di come, kico lo ta e influencia cu e desaroyo aki lo bay tin riba comunidad, kico ta e influencia cu esaki lo bay tin riba turismo, kico hotel y comercio lo por coopera cune y otro puntonan importante.
Un plan hinca den otro cu tabata cubri tur detaye pero kico a sosode e tempo ey, oposicion di MEP y DR manera semper, a lanta grita cu gobierno di AVP ta trahando un plan pa invita Venezolanonan bin Aruba pa pone un 500 na Don Elias Ballpark, na Centro Deportivo Betico Croes lo bay keda otro grupo di 500 persona y a haci henter un fanfaria manera cu gobierno tabata prepara pa habri porta pa Venezolanonan bin Aruba.
Esey absolutamente no tabata e caso y ta net esey ta netamente e motibo di con Aruba ta den e situacion cu e ta awe y tur pa motibo cu ora cu nan tabata den oposicion, a bay hunga politica c’un asunto asina serio di pone bo pais cla, di bisa tur hende kico nos por absorba y kico nos no por absorba, kico Reino su responsabilidad lo ta y hasta Union Europeo su responsabilidad.
Kico e tratadonan ta cu nos tin y cu nos a firma cu United Nations y asina duna un plan total con nos por atende cu e situacion aki.
Pero MEP y DR a bay hunga politica cu e plan aki, nan a bay bisa pueblo cu pa vota pa nan ya cu gobierno di AVP kier inunda e pais aki cu Venezolano, cu nos gobierno mes ta buscando e hendenan aki den barco pa bin Aruba.
Esey tabata e campaña cu e ministernan actual a hiba na pueblo, na luga di carga nan responsabilidad como politico y no keda sin duna un aporte na e plan cu a wordo hinca den otro y nunca nan den oposicion, a duna un aporte na un plan pa e situacion cu tin actualmente.
Gobierno a cambia y awor cu nan ta sinta den stoel di gobernante, nan no tin ningun plan, solamente minister presidente a bin parlamento cu mesun comision cu gobierno di AVP a crea, pero no a permiti ningun hiba palabra.
Premier Wever Croes a bisa cu e tin un plan pero no kier a duna parlamento e plan aki pero a dicidi cu e ta manda su plan Hulanda, como sifuera cu su mes ta gobernando Hulanda pero awor ta bin resulta cu Hulanda tampoco a mira e plan aki.
Esaki ta wordo confirma dor di e hecho cu no a drenta ningun reaccion riba e plan aki di parti di Minister di Asuntonan Exterior y tampoco Secretario di Estado encarga cu asuntonan di Reino, ya cu ningun a bisa cu nan di acuerdo cu e supuesto plan cu prome minister a manda pa nan.
Simplemente no tin plan, no tin vision y un biaha mas ta keda demostra cu e gobierno aki no tin capacidad pa atende cu asuntonan di interes general di e pais,” Parlamentario Benny Sevinger a declara.
