Apesar di plan social di gobierno casonan di abuso sexual ta aumentando

 In AVP

Parlamentario drs. Mervin Wyatt-Ras a tuma nota di diferente caso di abuso sexual di menor den medionan di comunicacion. Ademas por constata cu cantidad di casonan ta aumentando. 
Esun cu a shock comunidad mas hopi ta e abuso sexual di e nieto di 2 anja dor di su abuelo. Den medionan social di comunicacion tin hopi discusion al respecto, preocupacion y critica. Ora cu e gobierno aki a sinta na november 2017 a tuma e caso di 2 ruman victima di abuso pa bisa cu tin un crisis y a bin cu un crisisplan. A haci comisifiera ta e gobierno aki ta bai salba tur mucha na Aruba y lo caba cu tur abuso y maltrato. Esaki no ta cuadra cu realidad. Paso netamente awor tin mas caso cu nunca. Segun Wyatt-Ras pesey mes como politico tin cu pensa hopi bon promer cu papia. 
Segun e parlamentario ta dor di e proceso di concientisacion di gobierno anterior mas casonan a a y ta ser denuncia na autoridadnan y instancianan. 
Ta keda un reto sinembargo pa e famia entrega keho ora tin abuso.Ta keda un proceso cu nos mester traha riba dje pa haci e victima of mayor(nan)mas fuerte. Tin factornan cu ta haci cu esnan rond di e victima hoben no ta duna keho. Manera dependencia financiero of dependencia emocional. 
Recientemente nos a evalua e fondo social den presencia di e minister di Asuntonan Social den Parlamento. Durante tratamento di e fondo fraccion di Avp a pone hopi enfasis pa evalua e fondo cada kwartaal pa wak unda placa di pueblo ta bai y pa sigura cu instancianan ta haya e suma cu a ser priminti na nan. Por a conclui cu diferente instancia no a haya placa cu nan a kere cu nan lo a ricibi. Tin instancia no a haya e suma dor cu nan mester cumpli cu cierto rekesito. Esaki no ta loke e minister a priminti, segun Wyatt-Ras. Esaki ta manera e output subsidie cu gobierno anterior a traha riba dje pa e diferente instancianan por cumpli cun’e y cu esnan di e gobierno aki a rechasa. Awor por nota cu nan ta haci mescos pero ta dune un otro nomber. 
E gobierno aki a priminti shelo y tera, pero awor ta exihi yen di cos promer cu e e diferente instancia por haya loke a ser priminti na nan.  
Minister a informa parlamento cu  solamente 12% di e placa di e fondo a ser uza y ya segun e a soluciona cantidad di problema p.e. wachtlijst di sociale zaken a baha di 6 luna pa 2 luna. Wachtlijst di Voogdijraad a baha y di Sostenemi lo baha completo na december di e anja aki. Segun e minister a mira un cambio hopi liher. Kizas hasta lo resulta cu e placa cu a pone pa e plan ta mucho hopi. Wyatt-Ras y tambe otro personanan den comunidad ta constata cu apesar di e suma halto pa atende cu e problemanan di abuso cu e cantidad di casonan ta sigui crece. 
Kiermeen bin cu un fondo no ta solucion? Den pueblo nos hendenan ta trece padilanti cu castigonan mester bira mas halto. Wyatt-Ras mes a traha riba ley di iniciativa y a aumenta strafnan y introduci boet den caso di zedendelicten. Tambe e Codigo Penal a ser cambia na 2013 y aproba den parlamento. Kiermeen nos leynan ta posibilita castigo halto, pero e castigonan cu Hueznan ta duna no ta suficiente halto en comparacion cu e consecuencianan grandi pa e victima. P.e. si tin castigo maximo di 12 anja pa violacion, huez ta duna 1 pa 3 anja. Aki mester wak si por bin cambio. E Consecuencianan pa e victima ta de por bida. Den cada fase di desaroyo di e victima lo surgi problema. E trauma ta grandi y vooral ora ta trata mucha chikito e mucha no sa dicon e ta haya nachtmerries, tin angustia, miedo di tur cos of ora ta mas grandi e no por sera relacion duradero cu hende. Tur e consecuencianan  aki por ta relata na abuso. E minister encarga cu Asuntonan General a priminti den campanja cu lo e introduci un ley di castigo minimo 5 regla di 6 minuut. Te awor aki nada ainda, mientras e tin 2 anja sinta. E ta pia crusa, e no a haci nada, pa loke ta trata e asunto aki. E ministro di Asuntonan General a papia tambe di ombudsman. Na Parlamento a bin cu ley di iniciativa. A presente na Parlamento y a haya sosten unanime p’e. A keda falta cu mester a bin cambio den Staatsregeling hunto cu e ley. Esaki a tuma su tempo pero por mira cu den e gobierno aki cu a haci un sin fin di promesanan tambe no a manda e cambionan pa e ley keda aproba. Por cierto a tuma nota den prensa di un foto di ministro presidente hunto cu e kwartiermaker cu Parlamento a aserca. E keartiermaker ta esun cu tin cu naci tur trabou organisatiorio, preparatorio pa instala e buro di ombudsman. E minister di Asuntonan General a ganja paso ela bisa den entrevista cu prensa cu ombudsman ta un proyecto di dje cu ela cuminsa 5 anja pasa caba ora e ta oposicion. Esaki ta un gran mentira. Ora nos tabata den e comision parlamentardio pa traja riba e ley Wyatt-Ras no a mira Evelyn Wever Croes. E mester stop di ganja. E por djies bisa cu parlamento a traha riba e ley aki y mester bin cambio pa e ley aki por ser ehecuta y e mester manda e cambio den staatsregeling  pa ser trata den Parlamento. Wyatt-Ras ta menciona cu mester tene ombudsman ley di politica pa no bai nombra amigo y famia como ombudsman. Wyatt-Ras den pasado a presenta un mocion pa bin un ombudsman di mucha y ta di opinion cu netamente awor dicho ombudsman ta urgente. E ombudsman aki por ser aserca na momento cu e cliente no ta haya oudo for di instancianan pa garantisa servicio y treto continuo di instancianan. 
E momento di papia y haci bunita a pasa. Mester cuminsa pone man na obra. 

Recommended Posts
Pregunta?

Manda nos un e-mail of message nos via Facebook. Danki pa e sosten.

Not readable? Change text. captcha txt

Start typing and press Enter to search