Dialuna 13 di Mei lo tin un anochi special di informacion na Cas di Partido pa tur esnan cu a registra pa vota pa Parlmento Europeo. Durante e ultimo simanan Partido AVP cu un team dynamico di hobenan a asesora intresadonan na Cas di Partido y den diferente bario cu registracion y informacion pa por vota pa Parlamento Europeo.

Mientrastanto e stembiljetnan a yega na oficina di Vertegenwoordiger di Hulanda cu ta duna e posibilidad pa por cuminsa vota. E stembiljet ta otro cu nos ta costumbra cune y e anja aki tin un cambio den e forma di vota cu pa Hulanda mes ta nobo tambe. Riba e stembiljet nobo ta vota separa pa un Partido y pa e candidato apart. Un sistema completamente nobo di votacion riba cual lo tin un presentacion tambe riba e anochi di informacion na Cas di Partido.

Partido AVP den e proceso aki ta sostene e Partido CDA y specificamente ta duna conseho di voto pa sostene candidato # 1 riba lista di CDA, Esther de Lange. Partido CDA semper a mustra un iteres grandi pa nos islanan y Partido AVP tin un relacion historico cu CDA. Recientemente Lider di Partido, Mike Eman a reuni cu e Lijsttrekker di CDA, Esther de Lange y e sosten mutuo entre e partidonan a keda intensifica na interes di henter Reino. Cu Esther de Lange y CDA den Parlamento Europeo nos islanan y Aruba por conta cu nos interes sigur lo worde sirbi.

Tur hende ta bon bini na e anochi di informacion na Cas di Partido, Dialuna 13 di Mei for di 7’or di anochi pa haya mas informacion for di CDA y AVP pa cu e votacion pa Parlamento Europeo.