Aña ta serando y Gobierno no a presenta su maneho pa 2021

 In AVP

Para dilanti di Banco Central, parlamentario mr. drs. Richard Arends (AVP) a recapitula con e aña aki a bay riba termino economico pero tambe financiero di pais Aruba. E aña aki a keda marca door di e medidanan pa combati e contagio di e pandemia y cu tur e consecuencianan cu esaki tabata tin pa actividadnan economico. Sector hotelero, restaurantnan, empresanan mediano y chikito, esnan cu ta traha independientemente y esnan cu ta depende directamente di turismo a wordo afecta severamente. Tabata tin un speransa ora cu economia a wordo reactiva na mitar di aña, pero e beneficionan di esaki a bay perdo door di falta di un maneho economico integral di parti di Gobierno.

E recuperacion economico tabata hopi mas lento cu loke a keda premira y Gobierno te ainda no tin un plan con pa duna e estimulo necesario riba termino cortico, e parlamentario a bisa. Pa esaki fraccion di AVP tabata tin atencion special, pero te dia di awe no tin un maneho integral y no tin un maneho economico, unda cu empresanan cu por a wanta e crisis aki como tambe ciere di nos economia y e caida dramatico di nos turismo por keda na bida. No tin un maneho pa incentiva actividadnan economico pa nan por sigui sobrebibi e periodo nos dilanti. E recuperacion economico ta bay ta hopi mas lento cu a premira y con Gobierno a presente.

Ta cera e aña y no tin claridad riba presupuesto 2021, ni tampoco riba e medidanan cu lo mester wordo introduci e aña aki. Tampoco no tin claridad riba e agenda di ehecucion pa loke ta trata loke a acorda cu Hulanda. Tur por a corda e discusion cu tabata tin, como tambe e posicion di fraccion di AVP, pero despues di 13 di november no a tende nada mas riba e tema aki.

Por tuma nota cu mandatarionan ta manda voceronan di diferente departamento pa anuncia medida y cambionan di maneho cu tin un impacto masha grandi riba bida di diferente famia. Nos tin sa kico Gobierno a acorda den e paketenan di reforma, riba tereno laboral, riba tereno fiscal, riba tereno economico, pero te ainda gobierno no a sali bisa con e plan di maneho aki ta bay ta y ki efecto lo e tin pa ami, abo y nos tur. E reponsabilidad politico ta totalmente ausente.

Fraccion di AVP lo keda haci un oposicion responsabel, lo keda alerta y trece dilanti e preocupacionnan cu ta biba den nos comunidad. Nos lo keda contribui tambe di manera positivo na e recuperacion economico di nos isla. Nos lo ta na vanguardia pa e ciudadano, e doño di empresa, e comerciante chikito pa e medidanan den e paketenan di reforma cu mester ehecuta den e proximo dos añanan. Nos lo a spera cu Gobierno lo a sali afor caba y presenta esakinan, pero esaki no ta e caso. 

Ta e mandatario tin responsabilidad politico pa trece esaki dilant, pero te awor nos no a tende nada. Nos no sa kico ta spera nos den e aña aki ni tampoco ki impacto e ta bay tin riba nos recuperacion economico, segun parlamentario di fraccion berde mr. drs. Richard Arends.

Recommended Posts
Pregunta?

Manda nos un e-mail of message nos via Facebook. Danki pa e sosten.

Not readable? Change text. captcha txt

Start typing and press Enter to search