Ainda gobierno no a clarifica dicon polis como frontliner no a haya vacuna

 In AVP

Parlamentario Robert Candelaria a mustra un biaha mas e preocupacion grandi cu tin tanto den comunidad como cerca miembronan di cuerpo policial, relaciona cu e asunto di vacuna.

“Ya caba nos a trece e asunto aki dilanti cuestionando e gabinete Wever Croes, kende a traha henter un programa pa vacunacion caminda entre otro ‘frontliners’ mester ricibi vacuna den e fase inicial pero a lubida por completo riba polisnan cu tur dia ta wordo manda tur caminda den comunidad, sin importa si nan ta topa cu hendenan malo of no.

Fraccion di AVP a atende cu e asunto aki caba pero te ainda nos no a tende reaccion di gobierno riba nos apelacion pa vacuna polis, personal di brandweer, oficialnan di KIA, CEA y  Guarda Nos Costa, pero tambe Bombero y demas departamento bou husticia,  ya cu tur esunnan trahando den husticia cu tin contacto directo cu hende ta core riesgo di wordo contagia tur dia eherciendo nan labor. 

Na Hulanda constantemente a re-evalua prioridad y ahusta ora tabata necesario y sabiendo cu gabinete Wever Croes ta haci tur loke gobierno di Hulanda haci, nos ta spera mesun cos aki pero te ainda nada y parce cu gobierno ta sordo pa e gruponan aki. 

Hende cu ta core riesgo tur dia ora nan haya nan mes cu hende violento y cu tal bes lo por ta infecta cu e virus y e hendenan aki tin mester di atende  cu nan. 

Aki no ta ningun teoria ya cu ta conoci caba cu hopi polis ta malo y ta birando malo y den e proceso aki, nan por ta ta infecta nan propio miembronan di famia. 

Un apelacion serio y urgente na gabinete Wever Croes un biaha mas, pa inicia e proceso di vacuna  pa TUR frontliner rapidamente ya cu comunidad tin mester di nan saludabel pa nan por sigui cuida tur hende y percura pa ordo y trankilidad,” Parlamentario Robert Candelaria a declara.

Recommended Posts
Pregunta?

Manda nos un e-mail of message nos via Facebook. Danki pa e sosten.

Not readable? Change text. captcha txt

Start typing and press Enter to search