A uza solamente 17% di fondo di Social Crisis Plan pa yuda pueblo

 In AVP

Comunidad ta exigi pa cumpli cu promesanan riba e asunto di abuso sexual di mucha. Preocupante ta e situacion actual y comunidad kier mira e cambio priminti, pa cumpli pa caba. Parlamentario drs. Mervin Wyatt Ras a recorda varios promesa di e gobierno actual, mayoria di nan haci den momento di campaña. Actual Prome Minister y esun encarga cu asuntonan general, Evelyn Wever Croes a bisa di lo hisa castigo minimo, agregando cinco regel, pasando e ley aki den seis minuut, pero pueblo ta testigo cu te cu dia di awe ni fu ni fa di e ley aki.

Na mes momento a recorda e actual Minister di Husticia, Andin Bikker, di su promesa na e pueblo. Como parlamentario opositor cada rato tabata sali na defensa y tene man cu victimanan di abuso. Campañado di su partido y awo su actual consehero tambe tabata bin dilanti Parlamento como activista cu manifestacion na diferente ocacion, mientras awo cu e ta cerca di e Gobernacion y cu mas oportunidad di por trece un cambio/alivio pa e lucha aki, por a tuma nota cu e persona aki a djis entrega un carta na su Minister sin mira nada mas bin afo.

Parlamentario Mervin Wyatt Ras a menciona tambe e actual Minister di Asuntonan Social, Glenbert Croes, cu a priminti shelo y tera. Presentando un plan di crisis, na momento cu e dos criaturanan a perde nan bida cruelmente, el a vocifera di cu esey no por, poniendo asina 32 miyon disponibel pa asina yuda den e crisis social. Tin cu bisa cu NO por mira niun caminda na unda e yudansa aki a keda, ni den e parti di abuso fisico, ni abuso sexual. 

Sumamente urgente y necesario cu nos mester haci algo pasobra un dado momento hende lo tuma ley den nan man, cual a tuma luga caba, pero sigur no ta algo cu nos lo kier mira tuma luga mas. Ta cos nan cu nos mester preveni y esaki nos ta logra ora traha eficiente pa evita cu nos yega na mas victima. Si acaso e tuma luga mes, cu lo tin fondo y maneho pa atende cu victima, pero tambe contra esnan cu comete e actonan aki, cu man duro pa asina nan sinti e peso di ley riba nan. Na Aruba tin cu sinti cu ta respeta honor, dignidad y cu nos ta na vanguardia di nos comunidad poniendo e ser humano na prome luga!

E gobierno aki ta esun cu a priminti shelo y tera y ta spera di nan di bin dilanti, tuma contacto cu victimanan den sufrimiento y mustra cu di nan parti nan lo haci algo riba e asuntonan aki cu tanto nan a priminiti di soluciona durante campaña.

Di su banda Mervin Wyatt Ras a bin cu pregunta dilanti na gobierno, unda e placa di e Social Crisis Plan a bay, na momento cu Minister den parlamento a bin dilanti pa duna cuenta y asina splica kico a pasa cu e suma menciona. Pa aña 2019 tin un suma di 17 miyon, e Minister a trece dilanti cu di e suma aki 12% nan a usa, un 60% di lista di espera di Sociale Zaken segun e Minister ta elimina, kiermen cu un suma minimo a logra esey y na su luga kier sa kico lo pasa cu e resto. Si acaso e victimanan di abuso lo ricibi ayudo di gobierno, mirando cu ta algo cu nan a priminti na cada ocasion cu nan a haya pa añas den oposicion. Awo den Gobierno a yega momento pa nan haci y no papia so, pero haci algo efectivo na yudansa di cada victima

Recommended Posts
Pregunta?

Manda nos un e-mail of message nos via Facebook. Danki pa e sosten.

Not readable? Change text. captcha txt

Start typing and press Enter to search