Ex director di TNO Aruba, Jan Ebbing tabata presente durante e conferencia di prensa den cual Fundacion Mito Croes a anuncia e simposio cu e lo duna e siman aki. Ademas di expresa su satisfaccion di ta bek na Aruba, confesando cu el a haya falta di e isla, Ebbing a indica cu e propuesta di colaboracion entre ambos pais den reino ta mas vigente y fertil cu nunca. “Ta lamentabel cu a esaki a keda para pa 6 pa 8 aña,” a comenta.

A duna e simposio e nomber di 2.0 hustamente pasobra kier reactiva loke a inicia un tempo caba y a desaroya exitosamente entre 2010 y 2017; relacionnan den reino y specificamente basa den contexto di oportunidad strategico. Ebbing a fungi como e kwartiermaker, esun cu a encamina e proceso pa TNO establece.  

TNO tabata djis un di varios instituto Hulandes cu a mira e potencial di un aliansa cu Aruba durante gobernacion di Gabinete Mike Eman I y II. Otro cu por menciona ta Scheepvaartschool Rotterdam, Phillips, Rietveld Academie y GasUnie. Aruba tabata representa un brug pa mundo, cu un clima perfecto den tur sentido di palabra, pa ilustra e conocido y tecnologia na mundo.

E posibilidad di retoma e direccion di colaboracion estrecho cu Hulanda na fabor di Aruba ta ta mas importante awe cu e tempo aya, segun Mike Eman, lider di Partido di Pueblo Arubano, AVP. “Nos ta para dilanti di reto grandi pa desaroyo di nos pais y mundo. Nos a pone un vision pa convence Hulanda pa converti e debe di Aruba di 900 miyon florin den un fondo di inversion riba, entre otro, sostenibilidad. Pa nos por logra realisa e vision nos ta bay tin mester di asocia cu instituto cu por yuda nos pone tur argumento hunto,” asina Eman a splica.

John Hart, president di Fundacion Mito Croes a comparti cu e simposio di e siman aki ta un di varios cu ta trahando riba dje. Pa awo, ta invita un y tur pa asisti diahuebs awo 25 di april pa 7’or di anochi na Marriott Courtyard caminda entrada ta gratis. 

Adicional na e presentacion di Ebbing, lo tin participacion tambe di Aad Jan de Gruijl kende lo papia riba Fintech of riba tecnologia financiero cual ta un tema importante pa empresarionan hoben di nos isla. De Gruyl lo presenta punto di salida y oportunidadnan den nos region y den reino.

Companña pa un delegacion di pueblo hopi desapunta y preocupa dilanti di oficina di AZV partido AVP a organisa un conferencia di prensa pa expresa nan consternacion cu e decision di AZV di pone 50 miyon florin di surplus na banco, mientras cu recorte ta keda afecta e salud di su aseguradonan.

Lider di Partido Mike Eman y candidatonan Mervin Wyatt-Ras y Clifford Heyliger  para dilanti di e sede di AZV na Camacuri hunto cu un grupo di ciudadano preocupa a manifesta nan pensamento publicamente.

E mensahe comun tabata cla, esta cu dia cu a lanta AZV, nunca tabata e idea pa e organo pone placa un banda. E echo cu a dicidi di coy e 50 miyon florin di surplus a costia di keda remedi y cuido medico di pueblo pa e dirigentenan di e partido berde esaki ta algo repudiabel.

E lider di oposicion Eman ta mustra cu un banda ta causa dolor y disgusto den comunidad y partido AVP si tin oido pa e sentimento di pueblo. P’esey no por caba di compronde dicon ainda mester paga pa cierto remedi y no tin acceso suficiente na specialista y tratamento.

Eman a califica como un crimen e echo cu Evelyn Wever-Croes a dicidi di kita e Landsbijdrage for di AZV y awo cu tin un surplus, e no por bay na beneficio di pueblo tampoco. Mientras e ciudadano ta biba cu 1.300 florin menos di loke e mester, AZV si ta tuma e luho di spaar 50 miyon florin. AVP semper a bisa cu e medida cu pueblo ta sufriendo cu nan aworaki no a bin di Hulanda, pero ta responsabilidad di Gabinete Wever-Croes I y II.

Eman a menciona, durante e conferencia di prensa, e diferente remedi cu AZV no ta cubri mas; for di calmante di dolor manera Ibuprofen y Diclofenac cu ta brinda alivio pa un miho calidad di bida, pasando door di anti alergico manera Zyrtec te na algo mas serio manera Pantoprazol cu ta un protector di stoma di efecto di otro remedi mas pisa, cu e consecuencia cu e pashent ta bay haya ulcera despues y empeora su cuadro clinico.

P’esey  Eman a sigura cu entre e prome 10 punto di enfoke di AVP pa bolter e situacion di Aruba bek riba e caminda bon, tin poni pa duna pueblo nan remedinan bek y lo cumpli cu esaki den e prome dia di un proximo gobernacion di AVP.

Parlamentaria Mervin Wyatt-Ras y colega di partido Clifford Heyliger tambe a remarca cu e motibo pakico a lanta AZV tabata pa garantisa cu tur hende na Aruba tin derecho na cuido medio igual, pero esey no ta e caso mas ora cu ta esunnan cu mas entrada so por paga pa tur remedi cu nan mester, mientras cu esunnan den necesidad tin cu scoge entre pone cuminda riba mesa of nan salud. Esaki mester ta un di e motibonan pakico e indice di mortalidad na Aruba ta hopi mas halto, 23% compara cu apenas 5% na Hulanda

Na e momentonan aki no tin un vision comun pa sirbi nos pueblo. Esaki ta un di e ehempelnan di mas doloroso cu tin caminda un gobierno ta pone 50 miyon den un spaarpot mientras cu tin hende na nos pais cu ta sufriendo y hasta muriendo paso no por haya trato y remedi cu nan merece. Aruba ta bibando un di e momentonan di mas dificil den historia pa e dolor cu tin hende henter comunidad. Eman, Wyatt-Ras y Heyliger a envatisa finalmente cu no ta AVP so ta bisa esaki pasobra ta den contacto cu pueblo ta haya e informacion aki y tambe estadisticanan di entidadnan ta confirma esey tambe. 

Fundacion Mito Croes y fraccion di AVP ta orguyoso di por organisa un symposio masha importante cu e tema. “Cooperacion strategico Aruba-Hulanda 2.0” E symposio lo tuma lugar diahuebs awor 25 di April den Grazia Room di Marriott Courtyard Aruba y lo cuminsa pa 7’or di anochi. 

E prome director di TNO Aruba sr. Jan Ebbing, lo ta na Aruba y lo ta e orador principal na e ocasion special aki cu ta asina importante pa Aruba. E symposio tin como meta pa pone e vision optimista y progresivo riba cooperacion strategico entre Aruba y Hulanda riba agenda politico atrobe.  E “2.0” den e nomber ta referi na e periodo exitoso di cooperacion entre Aruba y Hulanda entre 2009 y 2017 bou liderazgo di ex Prome Minister di Aruba, sr. Mike Eman.  

Presidente di Fundacion Mito Croes, sr. John Hart, a referi na y accentua e perspectiva prometedor di e periodo bou maneho di Prome Minister Mike Eman bisando: “Den e periodo ey a logra hopi den e relacion entre Aruba y Hulanda, entre otro cu atraccion di companianan y institutonan Hulandes di renombre mundial manera TNO, Rietveld Academie, Scheepvaartschool Rotterdam, Philips y Gas Unie. Hasta a logra institui un facultad nobo na Universidad di Aruba den cooperasion cu Universidad di Leuven, Belgica, cu ta completamente dedica na sostenebilidad.”

Hart ta sigui bisa: “Lamentabelmente e esfuerzonan aki a mengua despues di e periodo di Prome Minister Mike Eman y casi tur e institutonan Hulandes a bandona Aruba. Como organo di conseho scientifico, Fundacion Mito Croes kier sostene partido AVP pa cuminsa pone di awor caba e base pa re-activa y fortifica e vision aki, pa ora di asumi responsabilidad pa goberna nos pais, por tuma accion mes ora.”

E esfuerzonan di Prome Minister Mike Eman e tempo aya a wordo traduci den un protocol di cooperacion cu Hulanda ya na oktober 2011. Minister di relacionnan den Reino mr. Piet Hein Donner a informa Tweede Kamer di Hulanda e tempo ey di e vision proactivo di Aruba bisando entre otro: “Hulanda ta dispuesto pa sera relacionnan di cooperacion mas estrecho cu tur e paisnan den Reino. Aruba ta wak posibilidad pa formanan di cooperacion strategico cu Hulanda y cu Union Europeo cu por duna un contribucion essencial na realisacion di e ambicionnan di Aruba y cu por forma cu balor adicional importante pa loke Aruba kier logra riba propio forsa.”  

Durante di e symposion e accento lo ta riba identificacion di pasonan concreto cu lo mester tuma pa reactiva e cooperacion entre Aruba y Hulanda, pa asina logra metanan pa ambos pais y pa Reino Hulandes den su totalidad. Un talento hoben di Fundacion Mito Croes, sr. Aad Jan de Gruijl, lo papia di e oportunidadnan nobo pa empresarionan hoben cu FinTech. Sr. Mike Eman lo clausura e symposio cu observacionnan analytico riba e tema di e symposio, a base di su experiencia y conocemento, y lo conta con e ta wak cu esakinan por contribui na e iniciativa di 2.0. Tambe sr. Eman lo pone atencion na e necesidad di converti e debe di 900 miyon florin di e fiansa di Hulanda durante di e periodo di Covid, den un fondo di inversion pa sostenebilidad di Aruba.  

“Un futuro nobo no ta wordo crea den un par di luna, sigur no si tin mas partido envolvi. Tog ta bunita pa wak, cu ora e partidonan ta desea esaki, por logra resultadonan concreto lihe, manera den e caso di Aruba. Esaki ta priminti hopi pa futuro.” Asina minister Piet Hein Donner a scirbi den su carta na Tweede Kamer na 2011.  

E symposio aki ta un oportunidad unico pa esnan interesa tanto na Aruba como na Hulanda, pa bini hunto, pa intercambia ideanan y pa discuti riba pasonan concreto cu por tuma pa fortifica e cooperacion strategico entre e dos paisnan. 

Fundacion Mito Croes

Fraccion di AVP  

Aruba, 21 April 2024

Parlamentario drs. Mervin-Wyatt-Ras a tuma nota cu Evelyn Wever-Croes na maart a declara luna di April como luna contra di abuso di menor. E atencion lo ta dirigi riba concientisacion. Aki Evelyn Wever Croes ta hala e minister encarga cu Asuntonan Social, Rocco Tjon, un banda pa e bai atende cu criticanan di comunidad. Nos comunidad ta cansa di sigui warda riba un afspraak y yudansa ora ta trata abuso di menor y tambe pa otro problemanan di salud mental di mucha. Evelyn Wever Croes a core campanja cu e lo pasa un ley di 6 minuut. El a priminti pueblo cu e lo introduci castigo minimo. E no a cumpli y awor e ta admiti cu apesar di cambio di ley y guia, casonan ta sigui crece y ta mihor pa atende cu concientisacion. Aki a desenmascara Evelyn su enganjo. 

Na anja 2017 ora cu Evelyn Wever-Croes a drenta gobierno e y su colega Glenbert Croes a busca argumento pa declara un crisis social na Aruba. E argumento tabata cu tin aumento di casonan di abuso di mucha, locual awe e ta admiti cu ainda tin dicho aumento. Kiermeen 38 miyon florin inverti pa e yega na mesun argumento cu promer cu 2017 cu ainda tin aumento di casonan di abuso di menor. A usa 2 mucha cu a perde nan bida e tempo ey dor di nan mayornan, pa por trese un sociaal crisisplan, y lanta un fondo di 38 miyon florin cu na varios ocasion CAft a bati riba dede di e minister Glenbert Croes cu e fondo tabata ilegal. E meta principal di crisisplan tabata pa baha wachtlijsten, pa registra y haci ayudo mas accesibel y efectivo. Locual no a logra, paso te ainda clientenan hoben tin cu warda largo pa haya yudansa y ta wordo manda di cashi pa muraya sin haya e yudansa desea. Gobierno, sin presupuesta, a coloca contractantenan pa atende cu cliente, cual contractanten a bai cas despues cu nan contract a finalisa. A hiba par di combersacion cu cliëntenan y manera ta di spera si e cliente sinti cu e no ta ser yuda e no ta show up mas. Pues asina hopi liher a bisa cu a elimina e zogenaamde wachtlijst largo. Diferente instancia den reunion cu Staten a indica cu nan no ta kere den contractanten, sino cu trahadornan mester ser incorpora den begroting di e instancia mes y no den un fondo cu ta ser maneha dor di un minister. Varios di e fundacionan tampoco a haya yudansa financiero suficiente, manera priminti dor di gobierno. Ademas diferente di e proyectonan cu a ser inicia no por a continua dor di falta di vision y maneho duradero di e gobierno aki, manera esun pa esnan cu limitacion, pa mamanan hoben y centro pa hoben. Pues a traha adhoc djies pa campanja y gana eleccion paso despues cu gobierno a cambia y ministers a cambia, no a entrega Parlamento ni evaluacion di Crisiplan. A surgi e idea pa un Family Justice Center(FJC). Den promer instante a crea e impresion cu e center aki lo tin un cartacter social. Sin embargo e ta completamente dirigi riba e proceso/procedurnan judicial ora di duna keho pa yega na prueba. Tin ya caba varios presupuesto desde anja 2021 cu a ser trata y te ainda e centro aki no a bira realidad. No ta conoci tampoco con e FJC lo traha den cooperacion cu otro profesionalnan cu lo duna cuido. 

Awor cu tin hopi critica riba maneho riba tereno social, tambe pobresa, cu ta afecta salud mental di nos muchanan y tambe inseguridad pa muchanan cu tin cu keda na so of serca un familiar no confiabel dor cu mayor(nan) tin cu traha, Evelyn Wever Croes ta core lansa un luna di concientisacion. Wyatt-Ras no ta critica e profesionalnan riba e tereno, sino gobierno cu no ta haci su trabou. Ta obvio cu sector social no ta riba lista di prioridad di e minister encarga cu Asuntonan Social, kende ta procedente di Cuerpo Policial. Den presupuesto di 2024 minister aki a dirigi su mes mas tanto riba e area di Justicia y a laga e area social manera un huerfano un banda. E ta prefera di cumpra auto enbes di paga pa edificio di Centro pa Hoben y pa atende cu esnan cu tin salud mental. E argumentonan pa introduci un Crisisplan tabata un farce y basa riba mentira. Awor Evelyn ta admiti y ta bisa cu “tin diferente estudio y analisis haci, loke bo no ta weita ta cu cifranan ta bahando”, “pero esey nos tabata sa tambe na principio,” segun minister Wever-Croes. Kiermeen aki e ta admiti cu e tabata sa cu su argumento no ta corecto. Con e sra. aki por bisa cu a mitiga casonan si ainda sector social no tin un sistema uniforme di registra casonan. Paso tin un sistema di monitoria cu a ser anuncia cu fanfaria na Directie Volksgezondheid, sin embargo te ainda e otro departamentonan no tin un sistema uniforme di registracion. Hasta e centraal meldpunt cu ta Sostemi despues di di Crisisplan no tin un sistema uniforme pa registra, mientras esey ta e meta principal di Sostenemi. No a traha tampoco na cooperacion efectivo entre diferente instancianan. A usa 38 miyon pa djies pone un make up of show pa sector social kere cu ta haya atencion, lagando cooperacion y registracion sin atende. E victima di abuso di menor merece mihor. Awor e minister presidente cu no ta encarga ni cu e area social ni cu husticia ta core bin padilanti pa tapa tur critica. E ta bai concientisa nos pueblo contra abuso di menor. Esaki mientras cu den otro asuntonan e ta contesta cu e no ta mete den cartera di otro minister.  Aki por mira claramente cu e sra. aki a inicia su campanja politico. En bes di nombra terapista pa sector social y mas trahado social pa atende cu e tantismo casonan cu dia pa dia ta crece, e ta pensa riba show.  Tampoco e no a baha wachtlijsten y mehora registracion pa duna bista transparente di cantidad di casonan. 

A bira tempo pa bin cambio y mehoracion. Hunto cu mas cooperacion y registracion ta necesario un ley di jeugdhulpverlening pa asina regla den ley con ta proteha nos muchanan pa medio di diferente ministerio, instancia y profesionalnan y cu e ley aki lo mester stipula en general kico ta regarda e diferente procesonan, di acecibilidad, structura, registracion y cooperacion entre instancianan pa garantisa derecho di mucha y di esun abusa berdaderamente. Na Hulanda y otro paisnan p.e. e ministerio di Asunto Social ta mara na esun di Salubridad y kinderbescherming (Volksgezondheid en Welzijn) pa di e forma aki garantisa cooperacion entre diferente di e ministerionan den defensa di e mucha. Wyatt-Ras ta spera cu berdaderamente e gobierno aki stop di make up y cuminsa trata di berdad pa atende cu asuntonan di nos muchanan y di abuso di menor. 

E ta peligroso pa mira con Minister di Husticia via su ministerio ta activamente instrui of duna instruccion n’e institutonan encarga pa conduci investigacion penal pa fiha prioridad y duna nan instruccion. Esaki nos por deriva di un proces-verbal den un caso penal contra e hoben medio ambientalista Nigel Maduro. E metemento di un Minister di Husticia hunto cu su coordinadornan den e proceso y sistema penal-hudicial ta hopi peligroso. Mas aun cu for di e palabra y tono por percibi cu ta pa motibonan politico e instruccion pa respectivamente persigui eroneamente ruman di un ex-parlamentario di AVP cu pa colmo no tabatin “arte ni parte” den henter e proceso! E conducta di e Minister di Husticia y su coordinadornan ta mancha e proceso penal-hudicial y ta mina e discrecion di e profesionalnan pa determina nan priopio investigacion y “vervolgingsagenda”. E ta un hilaridad cu parlamentario Alvin Molina cu ta bin for di seno policial ta aplaudi e “modus operandi” aki mientras Minister-presidente Evelyn Wever-Croes, Minister di Integridad Ursell Arends ta hinca man nan candela p’e titular di e cartera di husticia den coalicion di MEP-RAIZ.


Refleho di persecuccion politico

E conducta di e Ministerio di Husticia ta discurasha confiansa publico den e obhetividad, imparcialidad y profesionalismo di e sistema hudicial. E ta netamente daña e proceso di administra nos husticia. Asina Gabinete Wever-Croes II ta perverti husticia. Minister di Husticia, tampoco su coordinadornan tin como tarea pa envolvi nan mes den e sistema penal-hudicial, e tarea di minister ta pa crea e condicionnan y maneho p’e sistema penal hudicial por funciona mas optimal. Purba influencia e sistema pa investiga cuidadano cu ta expresa un menashe cu kisas ta contra e pensamento di Gobierno di Aruba, no t’e tarea di ningun gobernante. E no ta un secreto cu Minister Rocco Tjon tin varios polis na su disposicion den su ministerio ademas di conoce tur “in and outs” di e Cuerpo Policial uzando nan influencia pa troce husticia y silencia un movemento cu a laga nan cara na berguensa. E curashi cu Minister Rocco Tjon tin pa nenga cualkier mal hecho den henter e proceso aki ta muestra di e incompetencia pa por maneha nos cuerpo policial unda varios biaha hasta su mesun ex-coleganan polis a subi caya vocifera rib’e maneho decayente. 

No tin luga pa hunga politica 

Aruba conoce un sistema penal-hudicial cu ta basa ariba e principio nan di “Rule of Law” pues administracion di husticia mester ta basa riba ley, sin perhuicio y sin presion politico. Nos sistema penal-hudicial ta enfoca riba investigacion policial-penal, inventarisa hecho y prueba. Persecucion penal ta parti importante di e respectivo autoridadnan. E sistema penal-hudicial ta percura pa esnan cu ta efectua actonan penal y castigabel haya nan sentencia. E proceso mester ta un proceso obhetivo, limpi y imparcial. E hurista Mericano Hans Von Spakovsky lo bisa: “Politics has no place whatsoever in the criminal-justice system”. 

Maneho di husticia ta fundamental pa trankilidad den nos comunidad, si no tin trankilidad y siguridad den nos comunidad avance economico, comercial y social ta imposibel. E maneho di husticia mester duna e actornan di husticia manera Cuerpo Policial e confiansa y trankilidad. Un Minister di Husticia cu ta activamente mete den e proceso penal-hudicial pa motibo nan politico ta un peliger pa nos derecho di estado y no ta inspira trankilidad y seguridad. Minister Rocco Tjon bo ta fout bezig!

Tocante Wendrick Cicilia

LL. B. Wendrick Cicilia ta un hoben hurista y candidato di Partido di Pueblo Arubano (AVP). Su pasion pa yuda su prohimo a hib’e na ta un di e fundadornan di Tienda di Ley na 2018. E la gradua na 2019 for di e Facultad di Derecho di Universidad di Aruba. Na 2021 a tuma e curashi y determinacion pa subi e lista berde. Durante e ultimo eleccion Wendrick Cicilia a logra convence 482 ciudadano cu nan voto, profilando su mes den e top 10 cu mas voto di tur e 29 candidato rib’e lista di AVP. Subi www.WendrickCicilia.com pa mas informacion.

Dia 14 di maart dos parlamentario di fraccion di AVP, parlamentario Eman y Wyatt-Ras, a entrega 11 pregunta na minister di Salubridad pa e por contesta. E preguntanan ta rond di e aumento di 23.2% den e promedio di indice di mortalidad na anja 2022riba nos isla. Sin embargo te ainda no a ricibi contesta riba e preguntanan. Ta parse cu e cifra di mortalidad halto y alarmante no ta un prioridad pa Dangui Oduber. 

Tin diferente factor cu por a conduci na e cifra aki. Entre nan por menciona e medidanan cu Gabinete Wever Croes I y II a impone riba nos comunidad. Tanto aumento di BBO como austerisacion di e lista positivo di medicina ta haci cu nos pueblo en special esnan mas vulnerable den nos comunidad no por yena nan frigidaire ( si nan tin esaki) ni por paga nan compras y nan gastonan di vivienda, awa, coriente y medicina. Con por spera e ora cu nos muchanan y hubentud por alimenta nan mes saludabel y por haya cuido medico basico? Esaki tin su consecuencia pa e salud y e salud mental di nos comunidad y hubentud. Sin conta e placa di schoolgeld cu a subi cu famianan no por paga. Tambe por menciona e lista di espera pa haya cita cu specialista y awor tambe tin cu warda pa mira dokter di cas. Pues e acesibilidad di e di dos linja di cuido y hasta di promer linja a baha cu consecuencianan funesto pa nos comunidad. 

Di otro banba gastonan di ministers no ta baha. En especial pa loke ta trata productionan di luho y viahenan. Pues mientras cu e poder di compra di nos cuidadanonan ta baha tur dia e poder di compra di gobernantenan su cartera ta subi dia pa dia. 

E minister encarga cu Salubridad, Dangui Oduber, den 7 anja di gobernacion como minister di salubridad no por a ni finalisa renobacion di nos Hospital, e no por ni yega na stimula compra central di medicina cu no a baha prijs di medicina y di es forma aki yuda esnan humilde den nos sociedad. Tampoco e por a yega na un grado di cooperacion entre diferente hospital y entidadnan medico pa baha gasto. Tambe gasto di referencia di patientnan pa ricibi tratamento den exterior. 

Di otro banda Dangui Oduber ta gaba y celebra cu tin surplus den AZV riba lomba di pueblo cu tin cu paga pa nan propio medicina. Ta tristo con boticario ta notifica cu tin hende tin cu laga nan remedi atras na Botica paso nan no por paga esaki, cu tur consecuencia cu esaki tin pa salud. 

Awor cu cifranan cu no por ganja ta indica aumento di fayecimento di nos pueblo di Aruba, ta un must cu tin cu cuminsa tuma esaki na serio. Hulanda si a base di subida di e cifra di mortalidad cu 5% a haci investigacion y a resulta dos factor principal cu ta conduci na aumento di e cifra di mortalidad, esta posponemento di tratamento durante pandemia y stress.

Na Aruba sigur tratamento y diagnostico di malesa a haya un backlog den tratamento. Tambe nos cuidadanonan ta confronta stress. Esey e ex-director di Respaldo a trece padilanti na varios ocasion. Nos cuidadanonan tin cu traha dos y tres trabou pa paga debe y asina mes apenas por paga huur, scol, cuminda, medicina, vivienda, utilidad y transporte. Esnan cu no por paga nan gastonan sigur tin hopi preocupacion cu consecuencia pa nan salud mental relacion familiar. Pio ainda, tin persona den desesperacion ta comete acto ilegal pa yega na poco placa pa biba. 

Mientras tanto, Gabinete Wever-Croes II ta sigui gosa cu nan friends y (extended) family ci placa di pueblo genera for di mesun BBO cu nos cuidadanonan tin cu paga y hasta ta celebra cu tin surplus den AZV, a costo di esnan humilde. 

Ta lamentable cu pa algo asina importante minister te ainda no ta contesta e preocupacion di parlamentarionan Eman y Wyatt-Ras. Aki ta sigui e preguntanan: 

1.Cua ta segun analisis e causanan mas importante di aumento remarcable di e cifra di mortalidad cu 23% na anja 2022 en comparacion cu e periodo pre-Covid? 

2.Tin cierto grupo demografico specifico cu a ser afecta despropocionadamente duro dor di e cifra mas halto aki? Si e contesta ta si ki ta e motibonan? Y ki medida lo considera pa proteha e gruponan aki mihor? 

3.Te con leu medidanan pa proteha contra Covid-19, manera lockdown y limitacionnan a hunga un rol den e cifra mas halto di mortalidad of “oversterfte”? 

4.Tin indicacionnan cu acecibilidad pa cu y calidad di cuido di salud na Aruba a ser afecta durante e pandemia y na cual manera lo ser atendi cu esaki? 

5.Retrasonan den diagnosis y tratamento di malesanan of condicion fysico no relata na Covid-19 a conduci na aumento di casonan di fayecimento na 2022? Ki medidanan a ser tuma pa atende cu e problematica aki? 

6.Tin falta na aparatonan, medicina,  of personal cu a conduci cu a influencia calidad di cuido na Aruba y por a conduci na cifra mas halto di “oversterfte”? 

7. Cual ta e rol di austerisacion den cuido medico y den e pakete di medicina y cuido di AZV den e desaroyo alarmante den cifranan di mortalidad?

8.Ki medidanan specifico ta ser contempla of implementa actualmente pa fortifica e infrastructura di salubridad? 

9. Con ta ser coopera internacionalmente cu organisacionan di salud y cu paisnan bisinja pa comparti best practices y pa desaroya metodonan y proceduranan cu ta necesario pa atende cu e crisis den salud na Aruba? 

10.Ki rol cuido di salud preventibo ta hunga pa disminui e castonan di mortalidad na Aruba y cua iniciativanan ta wordo tuma pa enfatisa esaki? 

11.Pa finalisa, ki garantianan por ser duna na pueblo di Aruba pa cu e efectonan negativo di austerisacion den cuido por ser coregi y cu gobierno ta haci tur su posibel pa mehora cuido medico y pa garantisa semejante cifra di mortalidad por ser preveni den futuro? 

Ta di spera cu pronto por bin contesta riba e preguntanan y investiga e cifra alarmante di mortalidad y preveni mas aumento di e cifra aki. 

Diamars Aruba a haya den su scochi atrobe e anuncio for di minister di asuntonan economico Geoffrey Wever tocante otro aumento den e prijs di gasolin riba nos isla. Un cambio cu, manera ta custumber, tin su efecto domino den henter e cadena di suministro y servicio, afectando hunto cu ne, e poder di compra di e ciudadano. 

Lider di Partido di Pueblo Arubano, AVP, mr. Mike Eman ta bisa cu Evelyne Wever Croes a kita e discuento di 10 cen pa liter di gasolin cu tabata vigente te na 2017 durante Gabinete Mike Eman I y II. Kitando e reduccion aki ta haci cu Gabinete Wever Croes no por laba man sin mas awe y bisa cu e aumento ta netamente internacional. Tambe Gabinete Wever Croes a aumenta e BBO di 3% pa 7%. E 7% aki ta worde paga den dos schakel riba gasolin. E schakel di FEMSA/RDA pa e gasolin station y di gasolin staion pa e cliente. Tur esakinan si ta medidanan di gobierno cu awe ta haci e prijs di gasolin aun mas caro cu unicamente e efecto internacional. Pesey Evelyne Wever Croes ta responsabel pa e castigo aki cu Pueblo ta pasando aden. 

Ta e medidanan aki di Evelyne Wever Croes ta locual ta haci cada aumento internacional aun mas severo y pisa pa pueblo. Eman ta bisa cu su gobierno a laga di cobra 12 miyon pa anja na e 10 cen di discuento aki 8 anja largo pa pueblo haya un alivio, practicamente 100 miyon a laga den saco di pueblo y e promer cos cu Evelyne Wever Croes a haci ta kita e discuento aki di pueblo y riba dje subi BBO di 3% pa 7% locual ta dal pueblo den dos schakel, 14% ariba dje.

“Tur aña tabata sacrifica di nos gabinete 12 miyon florin pa por a subsidia cu e 10 cen aki y un di e prome medidanan cu Gabinete Wever-Croes, cu den campana a bisa cu lo baha gasolin, tabata di kita e descuento di 10 cen aki,” asina e lider di oposicion, mr. Mike Eman a indica. “Den e contexto aki Gabinete Wever-Croes ta carga un responsabilidad directo pa e peso di e gasolin cu ta azotando nos pueblo y cu awe ta azota atrobe nos comunidad.” 

Tabata un iresponsabilidad di MEP, pa den tempo di campaña priminti di lo baha gasolin, sabiendo cu esey ta practicamente imposibel y ainda ta wardando e barco di Glenbert Croes cu gasolin barata yega. Obviamente tabata djis promesa fofo cu MEP a haci. Loke si e gobierno actual por a haci tabata di mantene e descuento di 10 cen; algo cu AVP si a logra den tempo hopi mas dificil pa entrada di Pais Aruba. Tambe mester a exonera gasolin di e BBO di 7%, pero esey tambe ta bai den saco di Gabinete Wever Croes. “Insult on injury”, Eman ta expresa. 

Den conclusion, e lider di AVP a recorda un y tur cu si awe na pomp di gasolin bo tin cu paga atrobe, corda cu 10 cen di e aumento aki y e 14% di BBO ta directamente culpa di Evelyn Wever-Croes y su medidanan. 

Simannan despues di a duna Gabinete Wever-Croes e oportunidad di haci algo pa comunidad di Esso Heights y bisindario, diadomingo ultimo a toca na e propio miembro, candidato y parlamentario di Partido di Pueblo Arubano AVP pa lora manga un biaha mas y tuma accion.

Ta trata di e parke na subida di Lago Heights cu ta den asina un situacion di abandono, cu e hekinan di hero a frustia te cu bin abou. Poniendo schoudernan hunto, AVP a uni forsa cu ciudadano di San Nicolas pa haci varios reparacion na e parke pa elimina asina e peliger cu e falta di mantencion ta crea pa su usuarionan.

E accion tabata lidera pa activista y prospecto pa candidato, Terrence Ras, kende ta un empresario local y a indica cu e trabounan cu a realisa ayera ta muestra cu AVP no solamente tin un vision di innovacion pa Aruba, pero tambe ta un organisacion cu sa con pa kita bachi y traha na fabor di nos pais; sea den proyecto chikito of grandi. Ras ta spera cu e ehempel aki ta uno cu hobennan y henter comunidad por tuma, esta di uni forsa y ban traha hunto.

Fuera di a haci reparacion necesario na e Parke di Lago Heights, algun candidato di AVP di San Nicolas hunto cu Parlamentario ing. Mike de Meza a trece dilanti otro ehempel di con e districto ta sufri na man di e falta di atencion y vision di e gobierno actual. For di e ruinanan di Scol Don Bosco pariba di Joe Laveist Sport Park, a mustra con loke un tempo tabata un bon scol, awendia ta representa un menasa social pa e comunidad.

De Meza a recorda con despues di a cera den decada 70, e edificio a bira sede di e prome Colegio Arubano na San Nicolas. Na 2009 Gabinete Mike Eman I, a traves di ex minister di enseñansa, mr. Arthur Dowers, a drecha full e scol den un joya di edificio cu un funcion nobo.

Sinembargo, ora cu gobierno di MEP/POR/RED a haci su entrada na 2017, no a haci nada mas cu ne. “Ta p’esey e gobierno aki ta conoci pa ta esun cu ta cera scol na San Nicolas. Tanto uzo cu por a haya, awe ta un ruina y tristeza,” asina e parlamentario di AVP a expresa. “Na luga cu parlamentario di MEP Hendrik Tevreden ta preocupa su mes si Mike de Meza ta subi lista atrobe of no, e mester ta preocupa cu e edificio y muchanan di San Nicolas cu no ta haya debido atencion e importancia.”

Candidato Conny Connor, kende ta un maestro di profesion, ta mira e ruinanan di Scol Don Bosco como un refleho di e falta di vision di e gobierno actual. Ta dolor pa mira un edificio cu por a sirbi pa deporte, pa ensenansa, pero cu deliberadamente a opta pa lag’e bay perdi. Segun Connor, “e perdida ta pa abo, ami y nos tur. Y e mesun cos ta sosodiendo rond henter Aruba, pero particularmente na San Nicolas.”

Mientrastanto, candidato Otami Thomasia ta un docente cu a duna les tempo cu e scol tabata den funcion. E ta kere cu Gabinete Wever-Croes a lubida e motibo pakico nan ta caminda nan ta. “Si ta falta di idea y vision nan tin, nan por bin papia cu e pueblo di San Nicolas pa tende kico tur nan tin mester,” Thomasia a laga sa.

For di e angulo di un ex studiante, tambe di Scol Don Bosco, Terrence Ras ta recorda e bon condicion cu e scol tabata aden. Awendia, como adulto, e ta  mira con e ruinanan aki, obviamente frecuente pa adicto ambulante y otro antisocial, ta entre St. Augustinus School y Paulus School y e ta preocupa cu gobierno a crea un luga caminda facilmente un hende cu menos bon tin intencion por haci malo na e muchanan di e area.

Aunke e peticion di AVP na Gabinete Wever-Croes II pa drecha Parke Lago Heights no a haya oido, ta spera cu e biaha aki si coalicion MEP/RAIZ por pone man na curason y haci algo na beneficio di e pueblo di San Nicolas y su siguridad.

Awor, despues di tanto advertencia, tanto preuba cu e medidanan di gabinetenan Wever-Croes I y II ta causa pobresa grandi, despues di tanto preuba cu gobierno ta haya mas cu 500 miyon florin extra den caha, ainda MEP y RAIZ ta sigui nenga pueblo sikiera un alivio. Asina e lider di oposicion mr. Mike Eman a declara despues cu a scucha Minister Dangui Oduber y miembronan di Parlamento di MEP bisa cu e aumento di pensioen cu 50% lo no ta posibel.

REPARATIETOESLAG

LO BIRA E INSTRUMENTO 

CRUCIAL PA REALISA AUMENTO

E reparatietoeslag cu nos a introduci lo ta e vehiculo primordial pa nos por bai alcansa e aumento di pensioen di nos grandinan, e lider di AVP, mr. Mike Eman a splica. Gabinete Wever-Croes ta ricibiendo 500 miyon mas na entrada na 2023 compara cu Gabinete Mike Eman na 2017. Esaki ta duna nos espacio financiero cu prioridadnan corecto pa percura pa e placa di pueblo yega serca esnan cu mas mester di dje, Eman ta invatisa. Durante e periodo di Gobernacion di Gabinete Mike Eman I y II a utilisa e instrumento di reparatietoeslag pa pone un suma riba salario minimo, pensioen y bijstand. “E suma aki cu ta sali for di presupuesto di gobierno mes ta esun cu nos ta bai aumenta substancialmente pa alcansa e 50% di aumento”, Eman ta splica.

RAPPORT DI BONEIRO

TA EHEMPEL 

Eman ta haci referencia na e rapport di Boneiro, “Een Waardig Bestaan, Een sociaal minimum dat voorziet in toenemend perspectief op zelfredzaamheid“. Den e rapport aki ta mustra riba e mesun argumento cu Eman ta mantene. Mester lucha pa e pensioen por cubri e “sociaal mínimum”. Mescos cu na Aruba, e rapport di Boneiro ta constata cu e entrada di un pensionado, of empleado cu salario mínimo of bijstand ta demasiado abao compara cu e “bestaansminimum”. Pesey nan ta propone, den e rapport di Boneiro pa e pensioen ta na e nivel di e “sociaal mínimum”. Na Boneiro esaki kiermen cu e pensioen di un soltero mester bira, den un di nan scenarionan calcula, US$ 1400,== cu ta Afl. 2450,==. Esaki ta dobel di locual un soltero pensionado na Aruba ta haya. Na Boneiro e aumento ta worde propone pa bini voor di un “opslag” voor di caha di gobierno. Eman ta mustra cu e mesun argumentonan di e rapport di Boneiro ta conta na Aruba y serca nos tin e raparatietoeslag caba cu nos por aumenta conciderablemente pa yega na e aumento di pensioen cu 50%. Cu e rapport di Boneiro den man Eman ta kere cu tin e argumentonan y methodo pa realisa e aumento di 50% pa nos pensionadonan.