“Si bo kier ta un gañado na bo cas of den bo partido ta un cos, pero cu bo ta gañado pa pueblo, den parlamento y internacionalmente, ta causa cu awe nos tin un stagnacion den relacion cu Hulanda”. Esaki e lider di oposicion, mr. Mike Eman a declara hunto cu colega drs. Mervin Wyatt Ras, dilanti di e oficina di Vertegenwoordiger di Hulanda, referiendo na Evelyne Wever Croes. 

E declaracion di e lider di AVP, mr. Mike Eman ta bini a raiz di locual a keda publica den prensa Hulandes recientemente relaciona cu un carta di Secretario di Estado pa asuntonan di Reino, van Huffelene na Eerste Kamer caminda cu Prensa Hulandes ta bisa cu Alexandra van Huffelen lo a laga Eerste Kamer sa lo siguiente: ”Het beeld dat de minister president van Aruba in de brief van december aan uw kamer schetst herken ik niet”. 

Esaki ta un forma diplomatico di Secretario di Estado pa informa Eerste Kamer cu na su parecer Evelyne Wever Croes ta bisa cosnan cu no ta cuadra, cu cosnan no ta manera e ta pinta nan, den un otro palabra Evelyne Wever Croes ta gaña miembronan di Eerste Kamer, e lider di oposicion ta cita. 

Awor atrobe Evelyne Wever Croes a bai Hulanda y prensa Hulandes a raporta cu “ gesprek Wever-Croes met van Huffelen leidt tot niets”. Ta obvio cu si bo na a bai cu un otro propuesta bo mester sa cu e renion lo conduci “naar niets”. E hecho cu toch bo ta bai ta indica cu simplemente ta usa e bishita di Hulanda como capa di un bishita di trabao, pero en realidad ta mustra cu esey no ta e caso.

Tur e gañamentonan aki di Evelyne Wever Croes den palabracionnan cu Hulanda cu a sali promer vez na cla den e acuerdo pa e LAFT cu Evelyne a laga su miembronan di Parlamento cambia pa despues bisa Hulanda “cu e no sa di nada”. Awor cu e RAFT ta e mesun gañamento aki ta locual a pone Hulanda duna Aruba un “boete rente” riba un fianza di mas di 900 miyon florin.

Y mientras cu un debe di 900 miyon florin ta colga riba e cabes di e pueblo Arubano, Evelyne ta sigui keiro rond mundo sin resulatado, e biaha aki na New York. Wever-Croes ta sigui hunga su wega di flip flop, firmando algo na Hulanda y bisando otro cos den Parlamento na Aruba, causando un daño na e reputacion di Aruba. 

Nos si a prepara notanan y proceduranan pa haya e atencion na momento cu a bai Hulanda, riba propio costo na November y December y nos presenta e proposicion di fraccion di AVP, den un nota bon documenta, pa cambia e debe di Aruba pa un fondo di inversion destina pa enseñanza, infrastructura, barionan, caretera, schoolnan, poder compra, economia y innovacion,” Eman a comenta.

Fraccion di AVP si a prepara un alternativa y a papia cu e lidernan politico importante de Parlamento y actualmente den formacion di e proximo gobierno, ademas di Raad van State, y Ministernan di Estado. .

Y ta bon pa menciona cu e propuesta di AVP tin precedencia, caminda Portugal den pasado a opta pa cambia e debe di Cabo Verde pa un fondo di inversion. P’esey mr. Mike Eman ta convenci cu riba e prome dia cu AVP keda eligi pa dirigi e proximo gobierno di Aruba, e ta subi avion pa regla e asunto aki y asina e 900 miyon aki no ta un debe mas pa pais Aruba, pero ta converti den fondonan pa trece alivio den costo di bida, crea trabou, renoba bario, renoba enseñansa y alivia sector di cuido medico.

Esey ta e conclusion cu parlamentario Partido di Pueblo Arubano, AVP, drs. Mervin Wyatt-Ras a yega na dje despues di e incidente di Minister Ursell Arends den fin di siman. Asina Wyatt-Ras a expresa diamars mainta durante e conferencia di prensa semanal di e partido.  E ta di opinion cu, como mandatario, y mas ainda e titular di integridad, Ursell Arends a faya di ta un ehempel pa e comunidad ora cu den fin di siman el a ser mira ta consumi alcohol y stuur auto.

Cu ki moral Minister Arends por pidi ciudadano pa no haci loke e mes ta haci? Ta loke e parlamentario di oposicion ta cuestiona. Tabata solamente despues cu Arends a keda exponi den luz publico, y cu esaki a genera un cantidad enorme di reaccion negativo pa su comportacion, cu mientras el a dicidi di nenga di entrega su retiro, a limita su mes na djis pidi dispensa. Kier men no tabata un disculpa boluntario, pero bou di e presion cu el a wordo gara.

Ora cu a puntra lider di gobierno, mr. Evelyn Wever-Croes su reaccion pa e sucedido, el a duna un comentario sin mucho contexto, manera semper e no sa di nada y asina keda neutral. Pero de facto, e minister president tambe mester tuma su retira ya cu e ta na mando di un gabinete y un coalicion den cual diferente persona a comete fechoria. Ningun hende den Gabinete Wever-Croes II ta tuma responsabilidad pa e corupcion y delitonan cometi.

Wyatt-Ras a yega na e conclusion cu na Aruba, ademas di tin un cuido medico di clase, tambe tin un husticia di clase. Ademas cu ta solamente esun cu tin placa por haya bon cuido medico, tambe ta persigui solamente e ciudadano comun, pero esunnan den gobierno y cu poder tin un proteccion; y ni ki nan haci, husticia no ta mishi cu nan. “Pueblo mester wak esaki,” asina Wyatt-Ras a expresa calificando esaki como nepotismo.

E parlamentario a priminti cu e y su coleganan di AVP den parlamento lo sigui vigila e comportacion y funcion di e miembronan di MEP y RAIZ den Gabinete Wever-Croes II, tanto den Parlamento, como den Cocolishi. 

Na salida di e presentacion di Departamento di Asunto Social y Oficina Central di Estadistica diabierna na Parlamento, miembro di fraccion di oposicion, drs. Mervin Wyatt-Ras a enfatisa cu ademas di investigacion, pueblo mester di asistencia pa contraresta e tendencia di empobrecemento cu tin actualmente.

Mientras cu fraccion di MEP a yama e reunion cu intencion contradeci e ponencianan di AVP y di pinta un imagen bunita, e cifranan concreto a mustra tur lo contrario; casi mita di e casnan na Aruba ta biba bou di e standard minimo.

Pa Wyatt-Ras tabata hopi importante pa tin un bista riba e situacion di pobresa den comunidad. E no ta nada nobo, ya cu e ta algo cu nan ta experiencia durante contacto cu pueblo. A bira comun cu hende no por pone pan riba mesa mas y cu costo di bida a bira demasiado halto pa nan. Esey ta inclui schoolgeld, gasolin, cuido medico y remedi. 

Un di e preguntanan cu e parlamentario di AVP a haci na CBS ta relaciona cu e hecho cu tin hopi persona cu no ta riba e radar di departamento, sinembargo nan ta sea adulto mayor cu malesa cronico of mucha cu condicion special, etc. Wyatt-Ras a compronde for di CBS cu proximamente kier haci un investigacion di presupuesto pa wak con persona na Aruba ta maneha nan entrada. Wyatt-Ras a enfatisa cu mester enfoca riba e grupo cu mayor vulnerabilidad.

“Na e momento aki nos poblacion no mester solamente di investigacion, pero tambe di asistencia pa sobrevivi e situacion economico real. Na luga di haci esey, Gabinete Wever-Croes ta busca tur sorto di manera di sconde, tapa of cambia e informacion cu ta duna na pueblo pa laga mustra bon,” asina e parlamentario di AVP a comenta durante un conferencia di prensa hunto cu lider di partido, mr. Mike Eman.

Wyatt-Ras a sigura cu AVP ta keda pone e punto aki riba agenda di partido ta keda sali na defensa di e pueblo su cartera pa e calidad di bida den pueblo ta uno digno. “Nos ta keda enfoca riba dje, manera nos a haci simper durante tempo cu nos tabata na mando,” asina e parlamentario a conclui bisando.

Algun siman pasa e Director di e Wetenschappelijk Instituut renombra di CDA, Pieter Jan Dijkman, a ricibi mr. Mike Eman y delegacion cu hopi entusiasmo na e cas di CDA, na Den Haag, Hulanda. Awe e director di e instituto renombra aki ta na Aruba pa forma parti como invitado especial na e evento di presentacion di e directiva nobo di e ‘think tank’ di partido AVP, Fundacion pa Estudionan Social Cristian Mito Croes. Esaki lo tuma lugar Dialuna 22 di januari 2024 na Cas di Cultura, cuminsando for di 7’or di anochi.

E deseo comun pa profundisa den e preguntanan rond di modelonan economico y politico cu mester ta mas conecta na nececidad y deseo di pueblo ta duna un motibo adicional pa cooperacion entre Aruba y Hulanda y entre respectivo halanan scientifico, cu ta asesora e partidonan cristian democrata na Aruba y Hulanda. 

Den un refleccion conhunto durante e reunion entre e delegacon di Aruba y henter e top-staff di e hala scientifico di CDA na Hulanda a yega na e conlsuion cu e enfoke riba BON COMUN, COMMON GOOD, GEMEENSCHAPPELIJK GOED, ta un strea di guia cu por realinea institutonan politico-gubertmental y economico bek cu e deseo y nececidanan di pueblo. E dialogo aki ta sigui na Aruba awor cu presencia di e director di e WI di CDA na Aruba. 

Durante e evento di presentacion di e directiva nobo di Fundacion pa Estudionan Social Cristian Mito Croes, e director di Wetenschappelijk voor het CDA, Pieter Jan Dijkman, lo duna un lectura. E tema di e lectura ta: Christendemocratie: een gewortelde samenlevingskunde. De vertaling van politieke idealisme in praktische beleid”.

Drs. P.H.J. Dijkman (1980) a studia historia politico y periodismo na Rijksuniversiteit Groningen. E a studia tambe formacion scientifico na Radboudstichting, caminda e a studia filosofia politico.Durante di su añanan di estudio e a ocupa diferente funcion den directiva di organisacionnan. Entre 2006 y 2010 e tabata redactor politico di e corant Reformatorisch Dagblad. Entre april 2010 y april 2017 e a traha den e Wetenschappelijk Instituut di CDA caminda e tabata encarga cu e redaccion final di Christen Democratische Verkenningen, e revista politico di WI. Awor aki tambe e director di WI di CDA ta den e proceso pa promove riba e tema di e legimitimidad di politica basa riba principionan cristian democrata. 

Director nobo di Fundacion Mito Croes, John Hart, tambe lo duna un lectura riba un tema sumamente importante pa fortalece e cohesion den nos comunidad: “Op weg naar verbinding”.  

Lider di Partido AVP, mr. Mike Eman ta expresa di ta hopi contento cu e team fuerte di profesionalnan cu ta bai forma e directiva nobo di Fundacion Mito Croes. Tambe e lider politico ta mira den contexto di e relacion cu Hulanda un desaroyo hopi importante cu den un corto tempo despues di su bishita na Hulanda ya por concretisa e relacionan di cooperacion pa yega na visionan nobo na beneficio di Aruba y Hulanda. 

Tabata un “commencement speech” inspirativo pa graduadonan di e curso basico Formacion Politico na Cas di Partido. Cu hopi interes y sumamente inspira graduadonan a sigui Lider di Partido AVP, mr. Mike Eman su presentacion di e curso final, Ideologia, como parti di e cursonan ofrece pa Fundacion Digna Lacle Herrera (FDLH).

Mr. Mike Eman a combina e curso final cu un dosis halto di informacion riba corientenan poltico den mundo, un profundisacion sumamente inspirativo di e significacion y valor di e ideologia Cristian Democrata di partido AVP y un mensahe di curason pa e cursistanan: pone Boso dilanti un strea di guia como referencia tur dia pa sirbi e BON COMUN.

Eman a mustra cu awe mas cu nunca comunidadnan ta den busqueda pa significacion, direccion y proposito pa nan mision den bida. Y Diabierna 12 di januari 2024 sigur hopi por a haya un punto importante di referencia na e session final di e “Curso Basico pa Formacion Politico” cu a cuminsa na october aña pasa. 

CURSO PROFUNDO

E fundacion a invita lider di partido AVP, mr. Mike Eman, pa sera e curso cu un analysis di “Ideologia politico y corientenan social den comunidad”. Loke hopi lo a spera di haya ta un lectura academico tradicional cu ta describi tur e diferente corientenan politico cu tabata tin den transcurso di siglonan. Enbez di esey, e cursistanan y tur hende cu a presenta, a haya un recorido historico sumamente interesante di ideologianan y nan practica politico, di figuranan importante den historia politico di mundo y kico a inspira y motiva nan pa actua manera nan a actua. E clausura di e curso basico a bira un regaldo di inspiracion pa actua! A repasa bukinan importante manera Biblia, The Wealth of Nations di Adam Smith te na Dominion di Tom Holland cu ta mustra con valornan Cristian ta parti esencial di nos civilisacion. 

BALORNAN TA LOKE MESTER GUIA UN POLITICO

E punto mas importante di e analysis ta cu ta balornan essencial di cada ideologia ta loke ta guia politiconan y movecionnan den comunidad y cu alfin ta trece cambionan, bon y malo, grandi y chikito. Den un forma masha inspirado y emocionante, e lider di AVP, Mike Eman, a splica e importancia di conoce e balornan cu a motiva partido AVP for di su lantamento como un movecion popular, pa boga pa cierto cambionan y tuma decisionnan importante pa desaroyo di nos hendenan y nos pais. Ela mustra cu e balornan di stima Bo prohimo, cu ta un balor cu ta sali di Biblia, y e balor di responsabilidad pa e mundo y e comunidad cu nos ta biba aden, ta entre e cuatro balornan mas central pa e coriente politico di Christian Democrata manera AVP. Eman a mustra tambe cu desde promer dia cu e a inicia su carera politico cu a tene na e valornan aki. E a recorda e promer dia riba escenario na su lansamento para hunto cu su reverendo, Theophilus Rolle, cu awe ta obispo na Bahamas. 

E balornan di stima Bo prohimo y responsabilidad comun a hunga un rol importante den tumamento di decision pa bienestar di Pueblo y Pais den e periodo di gobernacion di 2009-2017. Pa bienstar di bon comun. Ela mustra cu niun lucha pa trece cambio pa mehora bida di pueblo ta facil. 

INSPIRACION

E reaccion di esnan den e sala yen di Cas di Partido tabata enorme. Hoben y grandi a wak e liñanan cla entre balornan crucial, corientenan politico y maneho di partidonan politico. Hopi a sinti nan mes inspira y motiva pa ta mas activo pa trece cambio den nos comunidad tambe y lucha pa pone e BON COMUN central atrobe como prioridad pa gobernacion y comunidad. E curso di FDLH y e clausura tabata un exito grandi y un inspiracion di hopi hoben pa drenta politica cu nan balornan bon defini!       

“Unda nos yega nos grandinan ta expresa un dolor grandi cu e entrada preta cu nan tin cu biba cune. Esaki ta algo cu a bin ta bira hopi grave durante e ultimo 7 anjananan aki di medidanan cumula cu haci costo di bida inpagabel pa nos grandinan”, asina e lider di AVP, mr. Mike Eman, a expresa reaccionando riba e aumento margina cu a duna nos grandinan pa 2024.

Eman ta splica cu e cifranan di CBS ta confirma e motibo pa e tristesa aki serca nos grandinan. Na 2017 e bestaansminimum pa un persona (pensionado soltero) tabata 2066 florin. Na 2023 esaki a bira 2587 florin. E gasto basico di un persona a subi cu 521 florin. Esey kiermen cu den e caso di un persona soltero e gastonan a subi cu un paar di cien florin pa luna, miles pa aña. 

AFL 49,== PA TAPA BURACO DI AFL. 521,==

E ta un ofensa y ta haci e dolor ainda mas grandi. Despues cu a subi e gastonan mensual di un pensionado soltero cu Afl. 521,– ta duna un aumento di Afl. 49,== y ta caba tambe cune. Eman ta bisa cu e cifranan ta papia pa nan mes. E dolor cu nos ta scucha di nos pensionadonan ta worde confirma pa e cifranan di CBS y SVB. Tanto e pensionado soltero como pareha ta core cu un deficit grandi tur luna.

Dos caso di dos persona adulto, pues por ehempel un pareha pensionado mester, segun CBS, un entrada di 3880 pa luna. E pensioen di un pareha segun cifranan di SVB ta 2130 florin pa luna. Esey kiermen cu un pareha pensionado cu ta biba nan so ta core cu un deficit di 1750 florin pa luna. Anto pa tapa e deficit aki di Afl. 1750 pa luna ta duna un aumento Afl. 84,==. E lider di AVP, mr. Mike Eman ta bisa cu ta imposibel y inhusto pa laga e situacion penoso aki asina. 

PENSIONADONAN DEN POBRESA Y ABANDONO

Nos pesionadonan ta sufriendo ecomicamente y ta bibando abandona dor di un gobierno cu ta subi gastonan tur luna pa pueblo, pero gobierno no ta puntra su mes con nos hendenan por sobrebibi, e lider di AVP, mr. Mike Eman ta reclama.

Eman ta mustra cu segun SVB tin 22.164 pensionado na Aruba. E cifranan aki ta mustra cu un gran majoria di nos tata, mama, abuelo, abuela ta bibando den un situacion inhusto. E situacion aki ta hopi penoso tambe pa esnan cu salarionan bao di 3500 floriin, pesey miles tin dos trabao. Esaki tambe ta un bida inhusto y cu concecuencia pa salud fysico y social di e persona y di su famia. Nos ta mira cu hopi pensionado tambe cu por ainda y logra di haya algo extra tambe ta esforza nan mes pa sobrebibi. 

AVP KIER AUMENTO SUBSTANCIAL 

DI PENSIOEN PA NOS GRANDINAN

E lider di AVP, mr. Mike Eman ta conclui bisando cu e situacion aki ta creando un pobresa feroz y inacceptabel pa nos grandinan. E ta insisti cu e situacion doloroso aki mester conoce un cambio, un alivio mester bin urgente pa nos conciudadanonan di edad major. Eman ta bisa cu sea e placa di pensioen mester worde aumenta conciderablemente of e reparatietoeslag cu gobierno di AVP a introduci mester worde aumenta substancialmente. E ta bisa cu durante tratamento di Presupuesto 2022 y 2023 y e cambionan fiscal fraccion di AVP a presenta un prespuesto alternativa y mocionnan pa logra e aumentonan necesario pa trece un alivio pa nos grandinan. Pero e coalicion di gobierno a vota contra. 

Lider di AVP mr. Mike Eman ta bisa cu no ta promer vez cu AVP ta bisa y haci e cambionan aki pa nos pensionadonan. Asina AVP a redobla e pensioen durante Gabinete Henny Eman y den nos tempo nos a introduci aumentonan di pensioen, bijstand y reparatietoeslag y schoolkindrentoeslag pa henter e nucleo di un famia por tin un bida mas husto. 

Un record di mas di 10.000 persona a sigui e mensahe di añja nobo di ExPromer Minister mr. Mike Eman riba rednan social. Tabata manera Aruba tabata en espera di un mensahe di speranza cu nan por a brasa y Eman a provee esaki den tur sentido, E sentimientonan profundo cu e a expresa, e sitio monumental, Plaza Padu, cu e a escohe, dunando honor na e heroenan cultural di Aruba a toca curason di nos pueblo. E artistanan hoben y e declamacionnan di trabaonan di Rufo Wever cu a compaña Eman den persona di Eleen Rasmijn, Esther Gomes a duna contexto di e mensahe di mr. Mike Eman di e simianan di orguyo di Aruba. Omar Kock y su viool a laga e tononan di Rufo Wever cu “Arubanita” resona den e ambiente di e heroenan y hoben pianista Djimar van der Linde tabata sumamente inspirativo cu presentacion di un clasico di Padu, “Abo So”.  

Conmovedor tabata e presencia di Vivian Lampe, jiu muher di Padu, cu a compaña Mike y Doina cu e insrumental di e cancion di Padu, “Na’mi un Chens”. Tabata manera Padu mes tabata presente. Serando e anochi cu Reina di Dande, Raquel Lampe, a duna e toke di e espirito positivo di Eman su mensahe.. 

Eman a habri su mensahe mustrando di “ta para aki awe, memei di e estatuanan di heroenan Arubiano, rondona pa e legado di esnan cu a inspira nos cu nan idealnan, letranan y tononan glorioso cu a uni nos Pais”. 

Eman: “Na e monumento aki nos a reconoce nan pa enternidad, Padu Lampe, Rufo Wever y Lio Booi. Figuranan imponente, nos tatanan fundador den e tapiceria expresivo. E alma cu nan a proclama, declama y laga resona pa generacionnan ta e alma di nos nacion, di nos Pueblo y Pais”. 

“A lo largo di creacion di nos nacion, nan a surgi como arquitectonan di nos espiritu colectivo, dunando forma na e esencia di nos identidad.

Den nan presencia nos ta sinti cu historia, no ta cuentanan di pasado, pero e leccionnan di cambio, di compronde con por idealisa un futuro, inspira confiansa propio pa travesa retonan pa por realisa un mayan nobo.

Nos no por haci mayan mihor cu awe sin e confiansa propio, sin e convicccion cu esaki ta posibel, sin e fundeshi cu ta cementa cu valornan y virtudnan firme y duradero: Fe, speranza y amor. Geloof, hoop en liefde, Faith, hope and love. Fe y keriencia profundo ta conecta nos na nos Creador, ta duna nos significacion di bida y con pa biba, speranza ta conecta nos na sentimientonan di dedicacion y responsabilidad pa nos tera y su futuro, stimacion y amor pa nos prohimo ta conecta nos na na nos conciudadanoan pa nos biba y traha hunto cu anhelonan comparti pa crea felicidad den nos hogarnan y nos cas Aruba”.      

Mr. Mike Eman hunto cu su esposa Doina a enfatisa cu “e luz di guia aki a laga nos supera, a resona cu generacionnan den refleccion riba e proposito di bida y un comprendimento mas profundo di e experiencia humano. Awe mas cu nunca nos ta sinti falta di e compas aki. E luz di guia pa e bon comun. Un proposito cla, un direccion visible, cu sentimientonan comun”. 

Eman su mensahe acohedor a apela riba “virtudnan cu ta patrimonionan, recursonan permanente y duramente adkiri cu dedicacion, lucha y sacrificio pa henter nos Pais, pa ajera y awe, pero tambe mas cu nunca necesario pa mayan, pa calidad di e cas cu nos mester sigui construi hunto pa futuro”.  

Memei di e tononan di Dande Alma Folclorico Eman a expresa: “Ban mira e strea cu ta fiha nos riba e BON COMUN, cu Fe, Speranza y amor como nos guia pa sigui construi nos cas comun”. 

Systematicamente y diplomaticamente exPromer Minister, mr. Mike Eman y lider di oposicion di Aruba, ta trahando riba sosten pa e concepto di transferi e debe di Aruba na Hulanda di 900 miyon den un Fondo di Inversion pa desaroyo duradero pa Aruba.

Sin duda e sosten pa e idea a haya un refuerso grandi durante Eman su bishita na Corsou. Despues di a entrega Promer Minister Pik Pisas e nota riba e tema di institucion di un Sociaal Cultureel Planbureau y un nota riba e idea di Eman pa converti e debe na Hulanda den un Fondo di Inversion a sigui un deliberacion basta largo den conseho di Minister na Corsou entre Eman y Pisas. Den cual reunion Eman a worde asesora pa veterano den temanan di gobernacion drs. Rene Herde.

Promer Minister Gilmar Pik Pisas a bisa na final di e reunion cu e ta mira den locual Eman a presenta “un bon plan”. E lo kier sigui delibera cu Aruba riba e idea aki di Eman.

Durante su reunionnan na Corsou ExPromer Minister mr. Mike Eman tabata tin hunto cu drs Rene Herde un audiencia tambe serca Gobernadora di Corsou, mr. Lucille Andrea George-Wout. Durante e audiencia aki Eman a entrega e notanan riba e temanan di Sociaal Cultureel Plan Bureau y riba e conversion di debe pa Fondo di Inversion na Gobernadora di Corsou 

Otro reunion importante Eman a sostene cu Presidente di Parlamento di Corsou, Charetti Maria America-Francisca. Presidente di Parlamento a informa Prensa di lo presenta e documentonan cu Eman a entrega na e comision permanente di Parlamento di Corsou cu ta encarga cu asuntonan di Reino. 

Tambe Eman a encontra y ta den contacto permanente cu e ExPromer Ministernan di Antiyas, Maria Liberia Peters y Emily de Jong-Elhage, riba e tema importante aki. Ambos personahenan di hopi experiencia y peso politico na Corsou y den Reino ta actualmente Ministernan di Estado di Corsou. Eman ta considera nan consehonan y sosten di gran valor pa por avansa e temanan aki. 

Eman ta splica cu e proposicion ta en principio un pensamento y nota cu e a lansa pa Aruba, pero e ta mira cu cada isla lo por yega na solicita un areglo similar cu Hulanda. Esaki lo ta algo grandi pa cada isla cu tin retonan pa por tin suficiente recurso pa inverti.

Eman ya caba durante su reunionnan na Hulanda Eman a presenta e proposicionnan alternativa aki den notanan bon prepara na e nivelnan mas halto di gobierno Hulandes, for di Premier Mark Rutte te na Raad van Staten, lidernan di fraccion y tambe director general di Binnenlandse Zaken y Koninkrijkrelaties. Na su regreso for di Hulanda, mr. Mike Eman a reuni tambe cu Gobernador di Aruba, Alfonso Boekhoudt, den cual audiencia tambe e proposicionnan aki a keda presenta. 

Por ultimo, e lider di oposicion a indica cu no ta importa si ta e gobierno aki lo probecha di e aceptacion di e propuestanan di AVP, pero mas importante ta cu Aruba tin mester na e momentonan aki pa nos sali for di impasse cu Hulanda. Nos por yega na un acuerdo basa riba un cooperacion strategico y mutuo manera fraccion di AVP a propone na Hulanda. Mientrastanto e idea aki a cuminsa cana su caminda den Parlamento di Aruba tambe. Eman a presenta un mocion cu por a conta cu sosten di dos otro fraccion, esta Raiz y Accion 21. Eman ta bisa cu e hecho cu un fraccion di coalicion a sostene e idea aki ya caba ta un avance grandi pa e sosten cu e meta grandi aki pa Aruba di converti un debe di 900 miyon den un Fondo di Inversion pa Aruba tin mester.

Cu un discurso pasiona y bon argumenta durante di e Congreso di InterExpo na Den Haag siman pasa, ex-Prome Minister di Aruba y actual lider di oposicion mr. Mike Eman, a boga pa creasion di un Planbureau Social Economico pa Aruba, pero cu lo por traha pa e otro islanan di Reino den Caribe tambe. Mr. Mike Eman a pone enfasis riba e importancia di wak e aspectonan humano tras di e cifranan alarmante cu ta refleha e problemanan social y economico di Aruba.   

Cu e pesimismo creciente den comunidad caus’a door di pobresa, decadencia social, criminalidad y un diferencia cada dia mas grandi entre entradanan y oportunidadnan y tambe aumentonan dramatico di costo pa haci negoshi, mr. Mike Eman ta adverti cu nos comunidad ta para na un punto critico. Ela subraya e importancia crusial di sentido comun y confiansa mei mei di e retonan grandi aki y a haya inspiracion for di e planbureaunan Hulandes, manera e Centraal Planbureau (CPB), e Sociaal Cultureel Planbureau (SCP) y e Planbureau voor de Leefomgeving (PBL).

Eman a propone pa crea un instituto similar pa Aruba y e otro islanan di Reino Hulandes den Caribe, cu lo mester analisa y describi e bidanan humano tras di e estadisticanan social y economico. Ela mustra riba e situacion alarmante cu miles di ciudadano na Aruba ta biba aden, door di e aumento drastico di costo di bida y e situacion totalmente abnormal cu entradanan ta keda cay mas y mas bou di e entrada minimo necesario pa existi (=bestaansminimum). Den 2022 no menos cu 50.000 ciudadano, mitar di e poblacion di Aruba, tabata biba bou di of casi bou di e nivel di pobresa na Aruba. 

E proposicion di mr. Mike Eman pa un Planbureau Sociaal Economico na Aruba ta sali for di su conviccion cu ta crusial pa mustra riba e realidad humano tras di e cifranan pa por yega na solucionnan duradero. Pa ilustra esaki el mustra riba e exito di institutonan similar di Hulanda, en particular e Sociaal Cultureel Planbureau, cu e stimula e concientisacion politico y consecuentemente e tumamento di accion, despues cu e publica raportnan cu a mustra e impacto real di e maneho cu a hiba. Cu e raport “Vijf jaar Caribisch Nederland, gevolgen voor de bevolking” di e Sociaal Cultureel Planbureau di Hulanda den su man, mr. Mike Eman a cita algun fragmento di e raport: “E perdida di forsa di compra di famianan a bira hopi pio, segun majoria di esnan cu a participa (den e envestigacion) riba tur e islanan”. “Pa loke ta toca forsa di compra, majoria di ciudadanonan di e islanan ta bisa cu nan ta mas mal para cu prome cu 10 di october”. Mike Eman a sigui cita for di e raport di SCP: “E envestigadornan di SCP a nota hopi malcontento pa cu Hulanda pa motibo cu, den nan bista, Hulanda ta neglisha e islanan BES economicamente y no kier pone atencion na e necesidadnan urgente di un parti grandi e poblacion“. Ta te ora SCP y otro institutonan a mustra riba e impacto humano grave di e situacion, riba e hendenan tras di e cifranan, cu den politica na e islanan, na Den Haag y den comunidad, nan a realisa cu mester haci algo contra di e pobresa alarmante aki. Cu esaki Mike Eman a ilustra y enfatisa e urgencia di un Planbureau Social Economico pa e islanan. Eman kier crea e instituto aki den cooperasion cu Hulanda pa e resultado di e envestigacionnan y e raportnan por tin autoridad y credibilidad na Den Haag tambe. Asina Mike Eman a clausura su discurso na e Congreso di “InterExpo” riba relacionnan den Reino cu un impacto grandi riba esnan presente. 

“E liñanan invisible di amistad, hermandad, soñonan y causanan comparti ta trancende tempo y distancia. Esaki tabata e caso den añanan 40 di siglo pasa cu tabata biba na Curacao un anhelo pa ta “baas den su mes cas” pa cu Hulanda y na Aruba tabata tin un sentimiento comun di lucha pa ta baas den nos mes cas frente e systema koloniaal cu Hulanda a structura na Curacao”. Asina doctor da Costa Gomez y mi abuelo Henny Eman a encontra otro cu un lucha comun, uno pa Corsou y uno pa Aruba”. Cu e palabranan aki ExPromer Minister, mr. Mike Eman, a inicia su discurso na Gomez Plein na ocasion di desvelo di e estatua renoba di Dr. Moises Frumencio da Costa Gomez.

CAUSANAN COMPATI

HERMANDAD CU A PERDURA 

Mr. Mike Eman a conta con e tabata na Hulanda ora cu den oranan di marduga a drenta un yamda di Maria Liberia Peters cu no tabata sa cu e ta na Hulanda. Mainta trempan Eman a wak e mensahe y yama Shon Maria bek, cu cual e tin un laso di hermandad y amistad como parti di legado di e heroenan christian democrata cu partido PNP y AVP ta comparti. Mr. Eman a splica cu Maria a puntre pa ta na Corsou pa e momento grandi aki y pa duna un mensahe na e ocasión di refleccion profundo aki.

Por a tende un feneta cai den e publico grandi na momento cu Eman a referi na e promer buki cu e a pone man riba dje ora e a yega cas, for di e archivo di buki di su defunto papa, Shon A, cu e tin e preveligio di tin como benjamin di famia na su cas. Mike a comparti cu e publico cu e a busca den e seccion cu e ta corda di tin bukinan biew di su tata cu ta publicacionan di Doctor. E promer cu Eman a tuma den man y habri tabata bisa cu anotacionnan for di man di doctor: “Aangeboden aan mijn vriend Sjon A, ter aandenking, firma M.F. da Costa Gomez”. Mi no ta kere cu esaki ta casualidad Eman a expresa cu hopi emocion den su voz, mi ta kere cu esaki tabata poni den mi caminda pa a tuma lugar na e momento husto aki di un refleccion grandi riba e bida di doctor. Nan amistad tabata uno di anhelonan comparti pa nan respectivo pueblonan y esey a tracende frontera y a pasa di un generacion pa otro”. Por a sinti cu Eman a conecta claramente cu pueblo di Corsou cu e sentimientonan comparti aki.

UN LUCHA GUIA PA

FE, SPERANZA Y AMOR

Eman a cita for di e mesun buki aki, cu doctor a otorga su defunto tata asina hopi tempo pasa cu ta carga e titulo “ENKELE ONDERWERPEN VAN STAATSRECHTELIJKE AARD”. Den e ultimo pagina di e buki doctor ta bisa: “Moge God het ons geven, dat onder leiding van Hare Majesteit, de staatkundige evolutie der voormalige bezittingen en koloniên tot rust komt in een statische ordenning naar Hare beginselen van recht, waarin allen haar deugd van rechtvaardigheid zullen volgen”. E lucha cu nan a hiba na Corsou y Aruba, Eman ta bisa, a worde guia pa un pensamento mas grandi, mas profundo, e tabata basa riba e conviccion cu nan aspiracionnan pa nan pueblonan mester worde guia pa locual ta husto pa e pueblonan, inspira pa e pensamento cu locual worde lucha pe mester ta basa riba “geloof, hoop en liefde”. Nan lucha como cristiannan democrata tabata brota for di un Fe y creencia fuerte, un speranza ilumina pa e Fe aki y un sentimiento profundo di amor prohimo como e guia pa sirbi y lucha pa un mihor futuro pa nan pueblonan.